اكتشفت اني مكشوف عني الحجاب D: ، مش هما بيقولوها كده ? D:
طبعا الكلام ده مش حقيقي بس اللي خلاني اكتب البوست دي ان حصل معايا ٣ مواقف غريبة او مش غريبة
٣ صدف بمعني أصح
لإني مؤمنة بالصدف بس أكيد مش مؤمنة باللي قولته في الأول
أو بمعني أصح مش عارفة يعني ايه بالظبط حد يكون مكشوف عنه الحجاب ، مصطلح معرفش عنه غير معناه المجرد فمقدرش افتي فيه
لكن اللي متاكدة منه اني مليش علاقة بيه ^_^
أول موقف كان السبت اللي فات كنت بكلم واحدة قريبتي _بحبها قوي و بموت فيها_ المهم كنت حلمت بيها و بقولها على حاجة معينة حصلت في الحلم و لاقيتها بتقولي انها حصلت فعلا ^_^
تاني موقف
بعد اول موقف ده الواحد حس ان احلامه بتتحقق بقى و شكلها كده باينلها بجد و لا ايه ، فلما حلمت حلم تاني بعدها كان يوم الأحد الصبح ، صحيت بقول لنفسي يا سلام لو يتحقق ده كمان تبقى بصرة D:
الحلم كان اساسا سببه ان جهاز الكمبيوتر كان داخله على اسبوع مش بيشتغل و كل يوم بحاول فيه و خلاص جبت آخري و ورايا حاجات لازم اعملها فنمت حلمت انه اشتغل
بعد ما صحيت قلت اجرب يمكن تحصل بس مفتحش ^_^
فتحته من جوه و فضلت انضف فيه على امل يفتح ، الكمبيوتر بقى بيفتح بس الشاشة مش بتشتغل
تاني يوم اللي هو الاتنين جيت بالليل قلت اعمل محاولة تانية و حركت فيه كام حاجة و اكدت عالاسلاك ، لاقيته فتح !!!!!! D=
طبعا ملهاش علاقة بالحلم بس اللي عايز يتلكك بقى ^_^
تالت موقف مكنش احلام كان صدفة مضحكة !
كان حصل و قدمت طلب توظيف في صيدلية من الصيدليات الكبيرة اللي تلاقيها عندها بالحاجة و سبعين فرع _ما شاء الله_ رغم اني مكنتش مقتنعة بفكرة اني اشتغل في صيدلية كبيرة لاني بحس انهم همهم المكسب بس ، لكن واحد زميلي اقنعني اني اجرب و اخد الخبرة و فـ جميع الاحوال لو مستريحتش ممكن امشي
المهم بعد ما قدمت عندهم قلت لنفسي لو رقم غريب اتصل عالموبايل لازم ارد يمكن تكون الصيدلية ، عدا ٣ اسابيع محدش اتصل قلت يبقى خلاص مفيش نصيب و بطلت ارد عالارقام الغريبة و نسيت خالص احتمالية ان ممكن صيدلية تكلمني و رجعت لطريقتي القديمة في الرد اللي كانت _ومحدش يضحك او يتريق عليا_ اني بفتح و متكلمش و لو طلع صوت واحد بقفل مش برد و لو طلع واحدة برد يمكن تكون صاحبتي ، اصل لو رديت ممكن لو معاكسة يشتغلني و انا وقتي طبعا ضيق زي ما انتو عارفين P:
اللي حصل بعد ٣ اسابيع ان الموبايل رن و فتحت لاقيت صوت واحد _شكله صوت محترم_ قومت قفلت على طول و فجأة جه على بالي و قلت مش يمكن تكون الصيدلية ? صحيح مش معقول يفتكروني فجأة كده بس جايز , جات على بالي الفكرة رغم اني كنت لغيت من بالي خالص الصيدلية دي و قررت اشتغل في اي واحدة بعد رمضان ، رن بعدها بدقيقة تاني و رديت لاقيتها فعلا الصيدلية و بيبلغني بمعاد الانترفيو بتاعي
قفلت و انا مذهولة و بضحك ...
و خلصت القصة ^_^
هناك 6 تعليقات:
مبروووووووووووووووووووووووووووووووووك الانترفيو إمتى عشان أكثّف الدعوات :)
ربنا يكرمك يارب والله ما هيلاقوا أحسن منك ومش عشان إنتِ صديقتي أبسولوتلي
اسووووووو ربنا يخليكي يا رب
انا اتقبلت الحمد لله :)
الانترفيو كان يوم الاربع و كل اللي حصل انه شرحلي النظام هيبقى ازاي و قالي ابدأ تدريب ال ١٥٠ ساعة و استلم الشغل بعدها بعد ما يكونوا شافوا شغلي اثناء التدريب عامل ازاي ^_^
البركة في شباب صح بعد ربنا , بفضلها جالي الشغل ده =)
مبرووووووووووووووووك ربنا يثبت أقدامك
:) :)
إنتِ تستاهلي كل خير
ربنا يخليكي يا اسو بجد :)
انتي اللي تستاهلي كل خير فعلا :)
مليووون مبرووووووك ^_^ ومبروك تانية عشان النتيجة :))
بالتوفيق باذن الله في الشغل :) وحتثبتي نفسك أكيد فيه ،،، ربنا يجعلك سبب في خير ونفع المسلمين دائمًا في كل وقت وحين ويستعملك ولا يستبدلك أبدًا ان شاء الله :)
ومن نجاح لنجاح دائمًا ان شاء الله
^_^
اللهم آمين
:)
الله يبارك فيك ^_^
يااا رب ، ربنا يقدرني و احقق اللي نفسي احققه في المجال ده ، يا رب آمين و لك بالمثل ان شاء الله
شكرا جزيلا :)
إرسال تعليق