الشتا !!!

بما ان الشتا خلاص خلص :(


و بما اني دايما بأجل حاجات كتير و مش بعملها في وقتها ^_^


و رغم اني اتأخرت كتير
بس من ساعة ما الشتا بدأ 

و انا عايزة اقول للشتا قد ايه انا بحبه :)

بحب الشتا
حتى لو دخلت السرير و انا وداني بتطقطق من السقعة و صوابعي متلجة و مناخيري لونها أحمر فوشيا D:


بحب الشتا
حتى لو نزلت في يوم الهوا بيطيـّر كل حاجة حواليا و المطر مغرقني و مش عارفة امسك حاجة او اروح يمين و لا شمال ^_^


بحب الشتا 
حتى لو غرّق المطر كل حاجتي و أوراقي و اتنرفزت عليه في لحظة غضب
برجع اصالحه تاني و اتأسفله =)


بحب الشتا
حتى لو رجلي نزلت في بركة مية بسبب ان الصرف عندنا في مصر مش حلو
الذنب ذنب الصرف مش ذنب الشتا :)


بحب الشتا
حتى لو جات عربية و انا ماشية في امان الله طرطشت عليا مية و بهدلت كل هدومي


بحب الشتا
حتى لو صوابعي كانت مجمدة في الامتحان و مش عارفة احرك ايدي و اكتب الاجابة

بحب الشتا 
و من زمان قوي نفسي انزل اجري تحت المطر من غير ما حد يقولي كده هتعيي او هتتعبي =)

بحب الشتا 
و كان نفسي مصر ييجي فيها تلج زي برة و لو مرة واحدة بس و يسيح تاني يوم بعد ما العب فيه براحتي D:

بحب الشتا 
و كل مرة ببقى ماشية تحت المطر ببقى نفسي المسافة تطول قبل ما اوصل و بعمل بس كإني مستعجلة بس بكون مبسوطة قوي


مش بزعل من الشتا غير بس لما الاقي حد فقير مش عارف يتدارى منه فين
رغم انه برضه مش ذنب الشتا
ده ذنب الحكومة اللي سايبة الفقير ده في الشارع

بحب الشتا 
و ببقى نفسي اندمج مع قطرات المطر و نبقى انا و هي حاجة واحدة
اطير مع الهوا و النسيم
و اختفي و ارجع في آخر اليوم
او حتى مرجعش خالص و اعيش بقيت حياتي نقطة مطر =)


آسفة .. هو انا قولت بحب الشتا ?
لا انا كان قصدي


بمووووت في الشتا
بحبه بجنوووون
الشتا ده أحسن فصول السنة

لا انا آآآآسفة برضه مش ده قصدي ^_^
انا قصدي كاااااااااااان
.
.
.

بعشق الشتا :)))))))

أجمل و أغرب !!!

امبارح !!!
كان مـن أغرب و أجمل أيام حياتي :)


أغرب ^_^


علشان لأول مرة في تاريخ صيدلة اتفاجئ انا و صاحبتي (-----) اننا عندنا امتحان عملي فاضل عليه ساعة الا ربع
صحيح الامتحان مش صعب قوي بس محتاج مذاكرة و ترتيب أفكار و استعداد نفسي
الحقيقة ولا حاجة من دول كانت موجودة
ههههههههههههه


المفروض ان المعاد الطبيعي للسكشن يوم الأحد مش السبت
بس كان نازل جدول للامتحان ملهوش علاقة بالمواعيد الأساسية غير بس انه برضه يوم السبت و الاحد
الجدول ده نازل من زمان قوي يعني اكتر من اسبوعين
و رغم اني بصيت عليه كتير، كل مرة كنت ببص عليه كنت باخد بالي من الساعة كام و بشكل تلقائي بشوف اليوم على انه يوم الاحد
شيء مفروغ منه طبعا مش المعاد اصلا يوم الاحد ? ^_^




بالصدفة اكتشفنا ان صحابنا رايحين يمتحنوا السبت
فانا بصيت لصاحبتي و قولتلها : لا نكون احنا غلطنا في اليوم !!!
بس من جوايا كنت مقتنعة تماما ان مش معقول هيطلع فعلا في امتحان


لما اتأكدنا بقى كانت مصيبة
لان كان فاضل زي ما قولت ساعة الا ربع و المادة دي مادة منتهية يعني مش ترمين و الامتحان ده امتحان فاينال مش هزار

اتوترنا جامد و كان مسيطر عليا احساس ضيق وكنت حاسة بالذنب لاني كل مرة كنت بكلم صاحبتي كنت بتكلم على اساس انه يوم الاحد
فهي كمان بقت عاملة حسابها على كده
و بما اننا _الشعب المصري_ بيحب يستنى لآخر لحظة
كنت عاملة حسابي هذاكر السبت D:

ففي الحظة دي مكنتش قريت حرف واحد و لا فاكرة احنا مفروض نعمل ايه
و مش قادرة افتكر السكشن كان عبارة عن ايه !!!!!! O_o

طبعا مكنتش عايزة نضيع وقت عالتوتر و كان عندي امل اننا نلحق نلم الموضوع في وقت قياسي فكان نفسي اقول لصاحبتي في ساعتها متقلقيش هنلحق علشان اطمنها
بس مكنتش قادرة لاني انا الي دبستها في المصيبة دي و هي كانت عايزة تجرب البرنامجين قبل الامتحان على الكمبيوتر
فخوفت اقول حاجة زيادة اوترها اكتر
و هي كانت نازلة من بيتها قلبها حاسس ان هيحصل حاجة فجابت معاها المذكـّرة و انا جيبتها برضه على اساس آآآل يعني اذاكر في الوقت الفاضي ^_^

سبحان الله يعني الحاجة جاهزة معانا و مش فاضل غير اننا نذاكر بقى و نهدى
D:
و دخلنا السكشن اللي وراه طبعا لاننا على ما استقرّينا و ذاكرنا كان فاضل تلت ساعة عالسكشن
و الحمد لله حلينا حلو قوي و طلعنا مبسوطين
و الا مكنتش هكتب البوست ده ^_^

بصراحة انا مكنتش هتخطى الموضوع ده و اذاكر بسرعة لولا ان صاحبتي كانت معايا و ساعدتني و شرحتلي كمان :)
لاني فتحت المذكرة و انا حاسة اني بقرأ لوغاريتمات ^_^
برغم صعوبة الموقف بس انا كنت سعيدة قوي علشان حسيت اننا مع بعض فيه و اننا واقفين جمب بعض و اننا بنعدي المصيبة دي سوا
اكيد كنت هرتاح اكتر لو مكنتش هي اتفاجأت بحاجة كده
بس حسيت اننا بنشارك بعض في حاجة :)))))))


و سبحان الله ساعتها كمان اتأكدت ان العقل البشري يقدر يستوعب حاجة بسرعة و يسجلها تحت الضغط و بدل ما كنت هذاكر الجزء ده براحتي في البيت على اربع خمس ساعات ذاكرته في ساعة واحدة D:


هو الغرابة مش في اننا اتزنقنا او ذاكرنا في وقت قليل
هي حصلت قبل كده
بس طبعا مش للدرجادي , مش لدرجة ساعة
الغريب اننا لاول مرة نتسطل و مناخدش بالنا من معاد امتحان فاينال ^__^

------------------------

أجمل :)

علشان خرجنا مع بعض انا و هي
و دي حاجة من الحاجات اللي صعبة جدا انها تحصل بسبب ظروفي و ظروفها الأباهاتية ^_^

كنت خارجة مع اخواتي
و كنت فاكرة اني هخرج خروجة عادية
لاقيتها بتكلمني بدون سابق انذار و بتفاجئني انها جاية معايا
:))))))))

و طبعا مش هقولكم الخروجة حصل فيها ايه
خليكم كده تموتوا بغيظكم P:
ههههههههههههههههه
هو كل حاجة هقولها ?!
مش كفاية اني حكيت الموقف الاولاني
دي لو عرفت اني سيحت بالطريقة دي ، هـتـقـتـلـنـي
و اتفضحنا و الحمد لله ^___^

انا حاطة الصورة دي علشان الصورة دي بتعبر عن الدهشة من المفاجأة المختلطة بسعادة
يعني لو كانوا صوروا الطفل ده بعدها بثانية
أكيد هيكون بيضحك :)))))))

" اعصر قلبك " !!!

" اعصر قلبك "
بقلم : خديجة غتوري
-----------------------

لما ييجي الألم
اعصر قلبك و بقوة
متسيبهوش يدخلك جوة
و اعمل فيها ألف فتوّة
لانه لو دخل !!!
هتنزف ضلوعك دم
و هتصرخ من الألم
هتشرب دموعك
وتسهر عينيك
و هتحس السعادة
بتطير من بين ايديك
و حالك لازم هيصعب عليك
قلبك يوجعك
و محدش يسمعك
الدنيا شوية هتخدعك
و بزيفها تضيّعك
للحزن من تاني ترجّعك
هتفكر تنتقم
و هتنشف جراحك
من غير ما تلتئم
في الاول هتتوهم
و تبدأ تبتسم
و تكتشف بعدها انك
بترجع تنزف كل ما تفتكر !!!

أصل الجراح صعب تشفيها
و من ذكرياتك مستحيل تلغيها
و ازاي بأستيكة ..تمحيها
ده قلبك كل ما تنشف
من دمك هيرويها
.....................................
عارف لما تنجرح تعمل ايه ؟
لا ف جرحك تفكر و لا تدور عليه
و لا تجيب سيرته و لا تبكيه
انت كده من جديد
بتنعشه و بتصحيه

اعتبره من اعدائك
و اطوي عليه أوراقك
و متحاولش أبدا
تلملم في أشلائك
و انساه زي ما بتنسى
ماضيك و أعبائك

و سيبه ينزف في هدوء
و صلي و ادعي
يمكن يشفيه الوضوء
و الدم يجري في العروق
و يزور قلبك ضيّ الشروق
باذن ربك عليه قادر
هو اللي عارف باللي فيه
و ازاي ممكن تاني يداويه!!!
.......................................
عارف كمان ايه اللي اصعب ؟
يكون جرحك نفسه مش ملكك
ملك اللي جرحك بيتحكم فيه
يسيبه يهدا أو يضغط عليه
و دايما قادر يسيطر عليه
مش جرحك و سابك
تضمّد جراحك
ده حالف لجرحك لازم هيكبر
و يوسع و ينزل لأعمق و يتقل
و حمله عليك حالف ليصعب
و يفضل وراك لحد ما تتعب
و حالف يمين يخلّص عليك
و تسلّم الراية و تسيبله قلبك
يتسلى و يلعب !!!

اعصر قلبك و انقذه
اعصر قلبك ... اعصره
قبل ما غيرك يملكه !!!
.................................
متعملش زي ناس
الحزن سيطر عليهم
طار النوم من عنيهم
و الكسل بقى مغطيهم
و مبقاش يأثر فيهم
مرور جبال الوقت
أيام و شهور عليهم
نسيوا الحياة و العمل
نسيو الفرح و الأمل
و داقوا طعم الملل

اعصر قلبك و انقذه
اعصر قلبك ... اعصره
قبل ما الموت يخطفه !!!
______________

كـُتبت في الاثنين ١٢_٤_٢٠١٠
الساعة ٠٤:٠٠ م

نمت !!!

هو انا لو دخلت نمت النهاردة
و مصحتش بكرة هيحصل ايه ???

ولا حاجة !!!!!!!

=' (

عيد ميلاد حـبـيـبـي !!!

قالها : أنا زعلان منك !

قالتله : ليه ? خير ?!

قالها : مش عارفة ليه ?!

قالتله : لأ مش عارفة

قالها : من أول اليوم النهاردة و انتي غريبة و متغيرة معايا !

قالتله : إزاي ?!!!

قالها : أولا ، انتي عارفة اني بحب اقرأ جرنال معين كل يوم قبل ما انزل الشغل و مع ذلك طنشتي و طلبتي من عم عبده يجيب جرنال واحد بس.. اللي انتي بتحبيه و مجبتيش بتاعي

قالتله : بس مش احنا اتفقنا اننا هنقرى نفس الجرنال ?

قالها : لأ محصلش ده كان هزار و انتي اللي بدأتيه امبارح ، ولو افترضنا انه حصل ، ليه يكون بتاعك مش بتاعي ?

قالتله : خلاص متدقش معلش النهاردة غصب عني سرحت

قالها : يبقى متزعليش بقى لما انسى انا كمان أجيبلك حاجة بتحبيها

قالتله : خلاص متزعلش مجاتش من مرة ، متبقاش غلس ، و بعدين انا جبتهولك بعدها و موجود دلوقتي لو عايز تقراه !

قالها : مانا هقراه بس امتى فـ آخر اليوم ? دانا حتى مرضتش اقرى جرنال حد تاني علشان متعود باخده منك انتي =)

قالتله : طب في ايه تاني مزعلك ? مش معقول ده بس !

قالها : كل ما اطلب منك حاجة النهاردة ، يا تتأخري عليا يا تنسي خالص لحد ما افكرك ، كإنك بالظبط بتنسيني انا ! و لا كإني موجود !

قالتله : لا لا مش للدرجادي ، دي حاجات بسيطة و يمكن حصلت مرة او مرتين ، مش لدرجة انساك

قالها : حصلت اكتر من سبع مرات !!! قوليلي بقى انك نسيتيهم كمان !!!

قالتله : متزعلش مني آسفة غصب عني ، بالي كان مشغول

قالها : بحد غيري ?!!!!

قالتله : هو لازم يكون حد ?! لا كانت حاجة مدايقاني

قالها : طب مفضفضتيش معايا ليه ?! زي ما بتعملي على طول

قالتله : مكنش جايلي نفس اتكلم ، هبقى اقولك بعدين

قالها : بعدين تاني ? اول امبارح نزلتي و مش راضية لحد دلوقتي تقوليلي روحتي فين ، و برضه الاسبوع اللي فات عملتي نفس الحركة و انا صابر و ساكت و كل اللي قدرتي تقوليه ان المشوارين في نفس المكان ، كإني هشم على ضهر ايدي !!! استفدت ايه انا كده ?!

قالتله : مانا ساعتها قولتلك هتعرف بعدين

قالها : آه صح ، و اكون آخر من يعلم !!! انتي عارفة اللي مخليني ساكت اني واثق فيكي و بحبك و علشان دي اول مرة تعملي كده معايا ، عمر ما كان في بينا أسرار

قالتله : متقلقش خلاص التالتة لو حصلت تبقى تابتة :) ، طب ده بس اللي مزعلك ?

قالها : لا كل ده كوم و الحاجة اللي جاية دي كوم تاني !

قالتله : هي ايه ?!

قالها : النهاردة كام في الشهر ?

قالتله : آآه مانا عارفة النهاردة عيد ميلادك ، و قولتلك كل سنة و انت طيب ، هي بس الهدية اتأخرت شوية علشان مفلسة اليومين دول

قالها : مش عالهدية خالص ، انا كفاية عندي انك تفتكري عيد ميلادي و تقوليلي كل سنة و انت طيب !

قالتله : طب فين المشكلة ?!

قالها : المشكلة ان أهم شخص في حياتي يقولي "كل سنة و انت طيب" آخر واحد !!!

قالتله : انا فاكرة من زمان بس مش عارفة ازاي النهاردة نسيت خالص !!!

قالها : تخيلي كل اللي اعرفهم كلموني و قالولي ، ده حتى عم عبده البواب قالي ، و انتي …..آآآخر واحدة !!!!!!

قالتله : هو للأسف حظك جه في النهاردة ، و انا من أول اليوم مش على بعضي ، و كل حاجة بنساها

قالها : بس النهاردة المفروض بالنسبالك يوم مميز ، بغض النظر عن أي حاجة ، ملقيتيش غير النهاردة ?? ده كمان ناس كتير ميعرفونيش قابلتهم النهاردة و ضحكولي من غير سبب زي ما يكونوا حاسين ان النهاردة يوم مميز بالنسبالي او يوم مهم

قالتله : و الله بجد مش عارفة اقولك ايه ، محرجة منك !

قالها : طب أقولك على حاجة !، بلاش نقول نسيتي عيد ميلادي و انا اللي قعدت ألمحلك و افكرك لحد ما افتكرتي اخيراً، طب ليه بالذات النهاردة كنت حاسك متغيرة معايا?! كإنك ملقيتيش غير النهاردة ! كإنك قاصدة !

قالتله : طب ما انت نسيت يوم عيد جوازنا، و ده أهم من يوم ميلادي و ميلادك

قالها : أولا، بالنسبالي عيد ميلادك أهم لان ده اليوم اللي انتي جيتي فيه للدنيا :)، ثانيا، انا مكنتش ناسي حتى بالأمارة الهدية كانت مستخبية في الدولاب من الاسبوع اللي قبليه و انتي استغليتي فرصة انك بتصحي قبلي و انا صاحي من النوم مدروخ و مش مركز و عايزاني اول ما اصحى و اشوفك قدامي بتضحكيلي ضحكة ليها معنى، اعرف و اسبقك و اقولك: " كل سنة و انتي حبيبتي " و ده قبل ما اكتشف ان الريسبشن كله ورد بره =)

قالتله : خلاص يبقى احنا كده خالصين، مرة انت انشغلت و مرة انا، مانا كمان كنت فاكرة

قالها : لا غير بعض، انا بس اتأخرت شوية على ما قلتلك لكن انتي قعدتي اليوم كله، كان مفروض بلمحة بسيطة تفهمي، شكلك كنتي ناسية

قالتله : لا كنت فاكرة قلتلك

قالها : و انا ايه اللي يثبتلي ?

قالتله : يعني هضحك عليك ? مش مصدقني ?! انت حر !!!

قالها : لا و كمان زعلتي ?! يعني حتى شوية عتاب مش مستحملاهم ?! عتاب من جوزك حبيبك !!

قالتله : لا خلاص هستحمل، هاه قووول كمان

قالها : طب ايه رأيك بقى هقول

قالتله : قول فضفض متسيبش حاجة فـ قلبك :)

قالها : لا و المستفز أكتر انك سامعاني برد على صاحبي بقوله "وانت طيب" قومتي سألاني: "هو بيعيـّد عليك من دلوقتي ? لسه اسبوع على ذي الحجة !"

قالتله : بقولك ايه، انت مش جعان? انا عاملة الأكلة اللي انت بتحبها علشان نتعشى بيها سوا :)

قالها : لا مليش نِفس، و انتي غيري الموضوع و اهربي ماشي

قالتله : لا مش هروب و الله، اقرأ بس الجرنال بتاعك علشان تبقى عارف الأخبار و مترجعش تلومني ان فاتك خبر مهم، و انا هجيب الاكل علشان لازم تاكل :)

بصلها بيأس و …

قالها : اعملي اللي انتي عايزاه !

ابتسمت بجنون و راحت المطبخ …

فتح الجرنال عالصفحة التانية … لقى صورته بحجم كبير …و مكتوب تحتها بالخط العريض: " كل سنة و انت طيب يا حبيبي... متزعلش مني... كل اللي حصل كان لزوم المفاجأة... عيد ميلادك أهم من أي يوم... مستحيل انساه... بحبك... زوجتك حبيبتك =) !!!"

♥ ♥
_______________________

مـن وحـــي خيــالــي :)

يناير ٢٠١٢

فقدت نفسي !!!

بفقدانكِ أكون قد فقدت نفسي
أنا الآن حائرة


أرى الحزن الدفين بين عيونكِ
و ليس بيدي ما أفعله لأساعدكِ
فأنا سبب حزنكِ

أشعر بالحزن داخلي
و لا أستطيع أن آتي عليكِ لأخبركِ
عن شعوري بعيدا عنكِ
فلن يغير ذلك أي شيء
لأنكِ لن تصدقين !!!

كلما سألتني عن سبب ظهور
حزن و هم على وجهي
أجهل ماذا أقول
سأكتفي بقربكِ الآن
و انتي صامتة
سأكتفي بصمتي
و سأنتظر !!!

٧_٤_٢٠١٢

I really didn't mean to hurt you,

if I hurt you, I'm hurting myself,

I wish I can give you my heart but it's hurt too,

It's hurt by being far away from you =' (

بدونك !!!

آآآهٍ لو أعرف ماذا فعلت ?!
لأخسركِ ?!!!
يا لحماقتي و غبائي
أريد أن أقتلني !!!

=' (

إنها تلك اللحظات التي تتمنى فيها أن تخترق قوانين الطبيعة
لتمتد روحك فتصل إلى روح أعز صديق
و تمتزج بها
ليعرف هو كم تحبه
و تعرف انت كيف يراك !!!

و ما الذي عجز عن إخبارك به
و اكتفى بالحزن الصامت !!!
=(

آآآهٍ لو تعرفين كيف أرى الحياة بدونكِ
ستغفرين لي كل أخطائي
!!!


سألتزم الصمت الآن حتى تأتي لحظة البوح بكل شيء

لم يبدأ ألمي يوم فقدتك حقيقة على الواقع
و لكن بدأ عندما عرفت كم تتألمين بسببي
و كيف هو شعورك اتجاهي
و كيف أنكي صرتي لا تؤمنين بصداقتي

لمجرد أنني أحيانا أكون غبية
و لم أفهم !!!


كرهت نفسي لأجلك
لعل ذلك يغفر لي ذنوبي عندك

ربما جرحتك عن دون قصد مراتٍ عديدة
ترفضين انتي ذكرها
ربما أسأت إليكِ
أعرف أنني قصرت في حقكِ

و لكني أكتب هذه الكلمات
و انا واثقة من شعوري اتجاهكِ
فما الذي سيدفعني لأكتبها ?
لماذا ترفضين تصديقي ?!
=' (

سأظل أحبك
لأن الحب في الله أقوى من كل شيء
الحب عندي دائما بلا قوانين او شروط
الحب عندي يكون بلا أسباب
لأننا نشعره دون مقدمات
ليس نحن من يبدأه
نؤمن به و نعجز في التعبير عنه

سأظل أحبك
لأن الحياة بدونك
ليست حياة
فأنتي أعز صديقة
=' )

ماذا أقول ?!!!
ليس عندي ما أقول
سوى
سامحيني لأنني أحبك
سامحيني و اغفري لغبائي
فهو ما زال طفلٌ صغير
يتعلم منك كيف هو الحب
كيف هي الصداقة

ليس عندي ما أقول
عندي شعورٌ بداخلي
لا تكفيه الكلمات !!!
=' (

سأظل أحبك
و سأستعيدك يوما ما !!! =)

بدأ يوم ٣١_٣_٢٠١٢ في مكان

و انتهى في نفس المكان !!!