" اعصر قلبك "
بقلم : خديجة غتوري
-----------------------
لما ييجي الألم
اعصر قلبك و بقوة
متسيبهوش يدخلك جوة
و اعمل فيها ألف فتوّة
لانه لو دخل !!!
هتنزف ضلوعك دم
و هتصرخ من الألم
هتشرب دموعك
وتسهر عينيك
و هتحس السعادة
بتطير من بين ايديك
و حالك لازم هيصعب عليك
قلبك يوجعك
و محدش يسمعك
الدنيا شوية هتخدعك
و بزيفها تضيّعك
للحزن من تاني ترجّعك
هتفكر تنتقم
و هتنشف جراحك
من غير ما تلتئم
في الاول هتتوهم
و تبدأ تبتسم
و تكتشف بعدها انك
بترجع تنزف كل ما تفتكر !!!
أصل الجراح صعب تشفيها
و من ذكرياتك مستحيل تلغيها
و ازاي بأستيكة ..تمحيها
ده قلبك كل ما تنشف
من دمك هيرويها
..........................
عارف لما تنجرح تعمل ايه ؟
لا ف جرحك تفكر و لا تدور عليه
و لا تجيب سيرته و لا تبكيه
انت كده من جديد
بتنعشه و بتصحيه
اعتبره من اعدائك
و اطوي عليه أوراقك
و متحاولش أبدا
تلملم في أشلائك
و انساه زي ما بتنسى
ماضيك و أعبائك
و سيبه ينزف في هدوء
و صلي و ادعي
يمكن يشفيه الوضوء
و الدم يجري في العروق
و يزور قلبك ضيّ الشروق
باذن ربك عليه قادر
هو اللي عارف باللي فيه
و ازاي ممكن تاني يداويه!!!
..........................
عارف كمان ايه اللي اصعب ؟
يكون جرحك نفسه مش ملكك
ملك اللي جرحك بيتحكم فيه
يسيبه يهدا أو يضغط عليه
و دايما قادر يسيطر عليه
مش جرحك و سابك
تضمّد جراحك
ده حالف لجرحك لازم هيكبر
و يوسع و ينزل لأعمق و يتقل
و حمله عليك حالف ليصعب
و يفضل وراك لحد ما تتعب
و حالف يمين يخلّص عليك
و تسلّم الراية و تسيبله قلبك
يتسلى و يلعب !!!
اعصر قلبك و انقذه
اعصر قلبك ... اعصره
قبل ما غيرك يملكه !!!
..........................
متعملش زي ناس
الحزن سيطر عليهم
طار النوم من عنيهم
و الكسل بقى مغطيهم
و مبقاش يأثر فيهم
مرور جبال الوقت
أيام و شهور عليهم
نسيوا الحياة و العمل
نسيو الفرح و الأمل
و داقوا طعم الملل
اعصر قلبك و انقذه
اعصر قلبك ... اعصره
قبل ما الموت يخطفه !!!
______________
كـُتبت في الاثنين ١٢_٤_٢٠١٠
الساعة ٠٤:٠٠ م
هناك تعليقان (2):
انا عندي تعليق علي العنوان ان فيه قسوة :)
انا فكرت في كلمة عصر القلب حسيتها صعبة جدا .. أشبه بايذاء النفس .. يمكن مش قادر اتخيل فكرة ان قلب يتعصر اصلا ! او مش قادر اتخيل اشوف صورة او فيديو لقلب بيتم عصره .. ممكن عمليات اخري تجري للقلب كال "تنقية" .. لكن العصر؟ انا عن نفسي مش متخيل ان حد يعصر قلبه .. ففي هذا موت كمن يعصر مُضغة حياة حية ترزق او كمن يعصر كائن حي او يقتل روحا تسكنه .. فهو ليس جمادا يعصر ولكنه حياة تسكن حياة
يمكن كانت اللفظة تكون أدق شوية لو كانت احمي بدل اعصر او امنع .. طالما الهدف ان شعور زي الانتقام مثلا ميدخلش جوا القلب زي السرطان فيسيطر عليه بشكل يدمره
انا مقدرة وجهة نظرك و معاك حق فعلا :)
بس الفكرة ان الكلمات بتستخدم للتعبير عن الاحساس
و كون ان احساس الألم او الوجع يوصلك
يبقى انا كده الحمد لله نجحت في توصيل احساسي بالألم عن طريق القصيدة و الكلمات :)
مش معنى كده اني قاسية ، لا و الله ^_^
بس الفكرة مش مقصود منها عصر القلب يعني أذية النفس
الفكرة مقصود منها انك لما تعصر قلبك ، مش هتسيب اي مكان لاي حاجة تدخل
و خصوصا الالم
عارف زي السفنجة مثلا لما تعصرها
مش هتقدر تشيل مية
و برضه لما تبقى مش عايز مثلا حاجة تدخل تملى الاودة غير بس حاجات معينة
هتديق الاودة على قد الحاجات اللي فيها و هتملاها بحاجات على مزاجك علشان محدش يحطلك فيها حاجة كمان
نفس الفكرة بقى
انا هعصر قلبي
بس مش معنى كده اني هموته
انا هعصره على قد الحاجات اللي فيه علشان ميكفيش ان حاجة تانية تدخل عليه زيادة
يعني هيفضل فيه الحاجات الحلوة
بس مش هسمح لحاجة وحشة انها تدخل
لانها لو دخلت هيحصل مصايب :)
فده قصدي
ان الواحد يستموت و يعمل فتوة و ميسمحش للالم انه يفكر يدخل قلبه
لكن مش مقصود بيها اعصر قلبك و خلص عليه :)
لكن الكلمة برضه رغم انها وصلتلك الفكرة قاسية قوي
بس انا شايفاها مهمة جدا
علشان فيها احساس الالم و الوجع الجامد قوي
و ده للاسف استخدام الكلمات اللي بتطلع تلقائية مننا حسب شعورنا
و كما لما واحد يكون موجوع اول حاجة هيفكر فيها هي
انا هعصر قلبي
مش هيكون منطقي و عقلاني و يقول انا هنقي قلبي او هحميه
لان عصر القلب بيحقق نفس الفكرة بس مختلط باحساس الوجع :(
اصلي لو استخدمت احمي او امنع
اللي هيوصل للي يقراها هو احساس الحماية و الدفاع بس ، هيحس بالحماس بس
هتوصل كإنها قصيدة حماسية تشجيعية
فاهم قصدي ?
لكن يمكن مش هيحس بالألم اللي بيخلي الشخص الموجوع يفكر يعصر قلبه
فالفكرة مش هتوصل كاملة :)
إرسال تعليق