يوم مميز !!!

النهاردة
يوم مميز قوي
أولا مزاجي متظبط من ساعة ما بدأت المؤشرات تظهر ان الرئاسة لمرسي باذن الله
كان عندي امتحان النهاردة فاينال و قاعدة الفجر بذاكر و أخويا داخل طالع بيقولي آخر المستجدات و كل ما عدد اللجان اللي تتفرز يزيد عدد دقات قلبي تزيد
بقيت عمالة بدعي و مرعوبة
يا رب مرسي يا رب
شفيق لأ
مش مهم الامتحان طز فيه
المهم النتيجة يا رب
استرها يا رب !!!!!!!!
مش قادرة اوصفلكم الرعب اللي كنت فيه
الحمد لله نزلت من بيتي و انا مبسوطة و رايحة الامتحان مبسوطة رغم اني مكنتش مخلصة
مش مهم بقى اي حاجة خلاص D:
طبعا لسه المشاكل منتهتش
دي لسه هتبدأ
بس عالأقل في حاجة ممكن نبني عليها أمل
شفيق مخدهاش !!!
الحـــمــــد لله ^__^

مش بس كده
النهاردة يوم مميز كمان علشان آخر امتحان لمادة صيدلانية
آخر امتحان شفوي
آخر بهدلة هنشوفها في صيدلة
و هتوحشنا :)))))))

كنا بنودع كل حاجة النهاردة و احنا فرحانين علشان كانوا بيصالحونا فجابوا الامتحان سهل ^_^
و علشان ربنا ستر و مرسي كسب :)

يوم مفهوش حاجة تزعل
الحمد لله :)))))))))

حقيقة الوضع الراهن !!!

حقيقة ما نحن عليه الآن في مصر ، حوار دار بين شفيق و مبارك قبل تنحيه !!!

-----------------------------------


مبارك : الناس عايزيني امشي ، اعمل ايه ?
 
شفيق : متعملش حاجة بكرة هيروحوا بيوتهم متقلقش
 
مبارك : لا ده واضح انهم بيتكلموا جد المرادي مش بيهزروا
 
شفيق : يا عم الناس دي مش فاهمين حاجة في البطيخ ، اسمع مني ، هعرف اضحك عليهم كلهم ,استنى عليهم شوية
 
مبارك : ماهو بعد الخطاب بتاعي في ناس صدقتني و ناس فضلوا في الميدان و لولا انك ضربتهم و سرّحت عليهم البلطجية و قتلتهم كانوا باقيتهم روّحوا بس دلوقتي خلاص مفيش أمل
 
شفيق : مقتلتهمش لوحدي و بعدين مش كله علشانك ?
 
مبارك : طب الحقني باي حاجة يا عم اعمل ايه دلوقتي ? ، الحقني باي حل الناس جابت آخرها

شفيق : بص يا معلم ، انا عندي ليك خطة متخطرش على بال عفريت ازرق
 
مبارك : اشجيني ، بس مش عايز مصايب ما انت المرة اللي فاتت قلتلي غير الحكومة و حطني انا رئيس عليها هظبطك ، الناس هاجت أكتر
 
شفيق : لا المرادي الطبخة متسبكة عالآخر
 
مبارك : الحقني بيها
 
شفيق : بس ركز معايا دي خطة طويلة و هتاخد وقت و عايزة منك صبر شوية بس ناجحة ناجحة مفيش كلام يا باشا
 
مبارك : ما تنطق الناس فاضلهم شوية و هيطلعولي فوق
 
شفيق : بص يا سيدي انت تسلمهالي و انا هحافظلك عليها و ارجعهالك تاني بعد ما تكون الناس نامت
 
مبارك : هي ايه دي اللي اسلمهالك ?
 
شفيق : مصر يا حسني ، هتاخدها تاني متخافش ، شوية كده بس لزوم التمثيلية
 
مبارك : كده برضه ? مكنش العشم ، عايز تاخد الكرسي مني ، ده انت صاحبي و حبيبي ، طمعان في مركزي ?

شفيق : عيب يا راجل متقولش كده الكرسي بتاعك و هيفضل بتاعك انت و جمال ، دانا بعتبره زي ابني ، اسمع الخطة للآخر بس و انت تفهم 

مبارك : معاك يا سيدي كمل !
 
شفيق : اولا انت تبعت تجيب سليمان يطلع دلوقتي يعلن خبر تنحيك ، الناس هتعيش يومين حلوين و هيصة و رقص و مزيكا و هيحسوا انهم كسبوا و الثورة نجحت ، انما ده بعينهم دانا بنفسي هقفلهالهم خالص ، علشان بعد كده يفكروا يجوروا على اسيادهم
 
ثانيا : الجيش بقى هيبقى هو حبيب الناس و الناس هتمسك في الجيش و يحطوا عليهم امل ، و نمسك الأمانة لطنطاوي شوية و يفضل هو ينيم في الناس كل يومين كده ببيان عالنت لأ و فين عالفيس بوك علشان يحسوا ان الجيش زيهم عصري و بيحب الحاجات دي و بيعترف بالشباب و هيلا هوب بدأت التمثيلية و كل ما نقرب نتفضح يطلع الجيش ببيان و الله الموفق و المستعان
معايا لحد هنا ?

مبارك : معاك يا دماغ يا عالية ، كمل !

شفيق : نبدأ بقى نحسس الناس بالحرية و نخليهم يعيشوا دور الديموقراطية شوية ، مرة استفتاء و بعديها انتخابات مجلس شعب نزيهة و فل الفل كله على سنجة عشرة ، طبعا ساعتها الاسلاميين و الفئات الحرة هيبقوا عايزين يدخلوا المجلس يلا هنسيبهم يدخلوا ما هي بقت هيصة ، بس نستحملهم شوية علشان الناس تصدق و هيشتغلونا كل مرة في الاجتماعات بتاعتهم بس مش مشكلة خلي اللعب يحلوّ ، هنسيب مصر بقى من غير رئيس سنة كده و لا حاجة قال يعني بنظبط بقى الاحكام و الحاجات السياسية اللي الناس مش هتفهمها ، اصل لو استعجلنا هنتفقس ، و خلال الوقت ده نكسر في الاسلاميين من كل حتة علشان الناس تبدأ تتخنق منهم و طبعا مفيش حد مبيغلطش فهنعرف نوقعهم كويس و مجلس الشعب اللي اتعمل انا و انت عارفين ان في قانون هنطلع بيه في الوقت المناسب نحله كله تاني بس استنى لسة مجيناش للخطوة دي ، ايه رأيك لحد كده ?

مبارك : طب و انا الوقت ده كله هبقى فين ?
 
شفيق : جايلك انا عالحتة دي ، معلش انت و ولادك و رجالتك هتستحملوا معانا شوية بهدلة كده لزوم التمثيل ، تدخلوا السجن .......

مبارك : ايه ??????? انت اتجننت ??!!!!!!!!!
 
شفيق : اهدى بس عاملك انا خطة حلوة ليك مخصوص
 
مبارك : قال سجن قال ، شكلك بدأت تخرف يا شفيق
 
شفيق : عيب عليك ، انت هتعمل عيان و بتموت فهتقضي اغلب الوقت في المستشفيات و هندلعك يا سيدي ، هاه ، مرضي ?
 
مبارك : طب و علاء و جمال ?
 
شفيق : لا دول مش هنعرف نلاقيلهم حل غير انهم يدخلوا السجن مع العادلي و عز و باقيت الشلة علشان تبقى شكلها واقعي و احنا هنظبطهم جوة من تحت لتحت ، المهم الشعب هيبدأ يطمن ، اغلب رموز الفلول الكبيرة في السجن ، و الدنيا ماشية زي الفل
هنيجي بقى بشوية ناس من بتوع آسفين يا ريس يعملوا دوشة الفترة دي و معاهم ناس يشجعوني و بنحب شفيق و الافلام دي
ثالثا بقى هنفضل نماطل في القضية بتاعتك و نأجلها شوية
 
مبارك : هو القضاء معانا ?
 
شفيق : هو اللي اكيد ان الجيش في جيبنا اليمين و الشرطة في الجيب الشمال ، القضاء مش عارف لسه بس هنلاقيله طريقة متخافش ، يجيلنا شمال نجيله يمين لحد ما نعدي ، و لو كنت خايف من المحاكمة فعلى ما تحصل فيها اجراءات هتكون كل الادلة محروقة يا معلم و ولا من شاف و لا من دري !!!

مبارك : معلم !!!!!!!

شفيق : المهم علشان مطولش عليك السنة هتعدي و انتخابات الرئاسة هتقرب و يبدأ الترشح للانتخابات ، ادخل انا و موسى نعملهم شوية زغللة الاغلبية هتركز مع موسى و مش هيبقى في مني قلق قوي و هيبقى في اتنين فلول و الناس هتبدأ تقلق و ساعتها نطلع بالناس اللي عايزين شفيق يبدأوا ينتشروا و ييجي سليمان يعمل حركتين كده قال يعني هيرشح نفسه و يخلع المهم شوية زغللة و صداع كله تمام و الترشح للانتخابات يحصل و نعدي انا و موسى بالكوسة !!!
طبعا لو كسبت من اول جولة هنتقفش ، بس برضه هنلعب في الاصوات و نبعد الناس القوية زي ابو الفتوح و حازم و حمدين ، ده اذا مكنش في حد منهم طار من قبل الانتخابات ، المهم نبعدهم عن التصفيات و يتبقى انا و مين ???

مبارك : مين ???

شفيق : الاخواااااااااان ، طبعا هنكون خوفنا الناس منهم كفاية و صورتهم مهزوزة عالشاشة فطبيعي جدا يحصل انقسام بين الناس اللي هيقاطع و اللي عايزني و اللي عايزهم فشكل الموضوع من بعيد ديموقراطي عالآخر
في خلال الفترة اللي قبل الاعادة اعملي انا كام حركة كده حلوين على كام خطاب اي كلام واقنع الناس الغلابة اني هرجع الامن لان طبعا البلطجية دول بتوعنا و فـ ثواني نلمهم كلهم و اقنعهم بكل حاجة علشان تكون برضه في فئة عايزاني بجد و على عائلات العسكر كلهم على ناس بتوع مصالحهم و بتوع فلوس تكمل التمثيلية و يبقى في شوية اعداد محترمة عايزاني وقبل الاعادة نطلع بالقانون اللي يحل مجلس الشعب اللي كنا احنا سايبينه بمزاجنا اصلا بحيث تبدأ الاعادة من غير ما يكون في مجلس و بما ان الاخوان قصادي لو كسبت انا بالتزوير هيبقى شكلها منطقي لان ناس كتير مش عايزين الاخوان و انا في الخطابات بتاعتي كمان هجيب ناس كتير تسقفلي و تبقى محبوكة التمثيلية عالآخر
بعد ما اكسب خلاص كده الكورة بقت في ملعبنا و مجلس الشعب اللي تشاور عليه يبقوا في ثواني قاعدين في اماكنهم و الناس كل ده يا عيني فاكرين انهم بيكملوا الثورة !!!
من ساعة ما امسك كده بقى اديني سنتين كده نكون عملنا خطة جديدة ازاي نرجعلك الكرسي تاني
و لو زنقت معانا قوي هكمل انا اربع سنين و تاخدها بعد مني و ممكن خلال الاربعة دول تحكم من ورا الكرسي ايه رأيك

مبارك : طول عمري بقول لسوزي شفيق ده تربيتي و هيطلع عبقري زيي ، لا معلم معلم معلم !!! بس افرض معرفتش امسك تاني 

شفيق : يا سيدي نضمن انك عالأقل متاخدش اعدام و كل الحكومة بتاعتك  و لو زنقت قوي قوي قوي ياخدها بعد مني جمال على طول زي ما كان نفسك تعمل

مبارك : صحيح طب مقولتليش محاكمتي آخرتها ايه ?

شفيق : معلش وقعت مني دي ، محاكمتك هتبقى في نفس ايام الانتخابات علشان ضربتين في الراس توجع و في خلال شهر واحد نكون ضربنا المصريين في دماغهم كذا ضربة مش هيلحقوا يفهمومها

مبارك : الحكم هيبقى ايه ?

شفيق : دي معرفش اضمنهالك بس من غير ادلة انت ممكن تاخدلك كام سنة سجن و نطلعلك ولادك براءة يا سيدي ، مرضي كده و لا عايز تعدل عالخطة?

مبارك : لا يا عم , انا مش بكتب الخطاب بتاعي اصلا هعدل على خطتك برضه ? ، على بركة الله بس في تفاصيل كتير متكلمناش فيها

شفيق : مش مشكلة كله في وقته يا باشا ، يلا اسند ضهرك بقى استعدادا للتمثيلية و ابعت هات سليمان و يلا نبدأ و ..... أكشن

مبارك : الا صحيح مقولتليش مين المخرج ?

شفيق : انا البطل و المنتج و المخرج

مبارك : طب بما انك المخرج و المنتج انا مش عايز ادخل اي محاكمة من غير نضارة شمس ، مش هبقى عارف ابص فين ، لازم تضمنلي انهم يسيبولي واحدة من بتوعي الأقل , و لا انت عايزني امثل المشاهد دي من غير نضارة ?
 
شفيق : يا سيدي نسيبلك الدولاب كله ، محدش هيركز متخافش
 
مبارك : يلا أكشن يا جدع و مبروووووك علينا مقدمااااااااااا
------------------------------------------------------------

ده تخيل بسيط لحقيقة الواقع اللي احنا عايشينه دلوقتي
و للمصايب اللي اعتقد من وجهة نظري انها بتحصل من ورانا بشكل مشابه لده
آسفة طولت عليكم

سيناريو و حوار : خديجة غتوري

مصر .. يا رب !!!

احساس غريب حسيته
كنت عايزة أعيط
كإن حاجة بتتاخد مني
و انا ايدي مربوطة
و كل ما يقول حرف زيادة
دماغي تسخن زيادة
و ابقى عايزة اصرخ
و ادخل اسحبه من جوة التلفزيون
و اقوله كفااااااااااية
كفااااااااااية كدب بقى !!!!!!!!!

ده حتى الكدب مش عارف تكدبه
مش لايق عليك دور "هنبني و هنصلح مصر"
مش لايقة عليك التمثيلية
انت كدبت و صدقت الكدبة و لا ايه ??!!

النهاردة سمعت خطاب شفيق في المؤتمر بتاعه
كان جوايا شعور قوي بأمنية معينة
كان نفسي المشهد بتاع مقتل السادات يتكرر تاني
علشان كل المصريين في بيوتهم يقوموا يسقفوا
ردا على الناس اللي كانت بتقوم تسقفله

بجد مش قادرة اوصف احساسي
مش لاقية غير اني استنجد بربنا و ادعيه
انه يسترها معانا
هو في ايده كل حاجة
يا رب !!!!!!!!!!! =' (

مبارك و البيو أسـّـاي !!!

النهاردة ........ امممممم يوم غريب !!!!!!!
مش عارفة
انا متنرفزة فمش عارفة ازاي ابدأ الكلام بالطريقة اللي مفروض ابدأها زي كل مرة في بوست جديد

امبارح .....
كنت بقول لأمي
انا حاسة اني هاخد بكرة علقتين !!!
علقة امتحان البيو أساي (Bio-assay) و علقة اللي هيحصل في محاكمة مبارك

و قد كان !!!

مش مهم الامتحان دلوقتي ، هو حظه انه جه في يوم زي ده ، و يمكن نسيت فرع بحاله و بقيت بشوف الكلمة عارفاها بس مش عارفة مكانها في المنهج و لا تفاصيلها ، بس مش مهم ، الحمد لله عدت ... 

بس !!!!!!!!!

نتيجة المحاكمة !!! ، بالاضافة للي كان حاصل الكام يوم اللي فاتوا بعد نتيجة الانتخابات الظريفة ، نتيجة اول انتخابات مفروض انها ديموقراطية و نزيهة في مصر ، نتيجة اول انتخابات مفروض يحصل فيها صراع بين اتنين يستاهلوا ياخدوا المنصب و الناس تحتار بينهم ...
مش يطلع فلوووووول ، من اول انتخابات نشارك فيها كلنا ?
اول مرة نحس اننا بنختار ...
يطلع برضه فلوووول
هو ايه ده ??!!!!
اتنرفزت بس مسكت اعصابي على اساس لسه في أمل الاخوان ياخدوها و اللي مش عايزهم .. يستحملهم ٤ سنين مش مشكلة و هيحصل حاجات كتير و كله هيبقى تحت عنينا , ايا كان ايه اللي هيحصل ، هيبقى ارحم من ان اي فلّ حرامي قتال قتلة يمسكنا تاني
علشان لو حصل هيبقى أكبر اثبات ان "مفيش فايدة" !!!

يطلع فلول و هو اللي يكسب ??!!!!!!!
دي تبقى مصيبة
منقدرش نستحمل فلول ٤ سنين و منقدرش نسيبه يلمس الكرسي بعد ما نضفناه و غسلناه بدم الشهداء اللي هو قتلهم ...

بعد الاستفزاز ده اللي استمر كام يوم و مش بس من الاخبار لكن كمان من الناس اللي حوالينا اللي لسه مصرين يختاروا شفيق
و من الناس اللي قررت تكون سلبية علشان مش عاجبها شفيق و لا الاخوان
رغم انهم عارفين لو منزلوش يبقى شفيق هياخدها
ده اذا مخدهاش بالتزوير
بعد كل ده !!!!!!!!!!
تحصل مهزلة النطق بالحكم ? ٢_٦_٢٠١٢ ???
يعني خلاص ? مفيش فايدة ?
مفيش حاجة هنعرف نغيرها ?

انا متنرفزة
مش قادرة حتى اكتب الغيظ اللي حاسة بيه في قصيدة
مشلولة مش قادرة اعبر !!!
بس مش قادرة برضه امسح من جوايا احساس الامل
و ان مينفعش نيأس علشان ده أقل حق ليها علينا
أقل حق لمصر !!!
يا رب عايزين نشوف تغيير حقيقي
مش مزيف
علشان بجد تعبنا
و مش هنستحمل يموت ضعف الاعداد اللي ماتت 
علشان الحلم يتحول من حقيقة لمزيف !!!!


ليه كل ده بيحصل ?
أكيد في حكمة !!!
بس نفهمها أو نقرب منها
يــــــا رب !!!!!!!!!!!!

حـِـداد !!!

حدااااااد

حداد على أرواح الشهداء

حداد على كرامة المصري الضائعة

حداد على المصابين و المعتقلين

حداد على أبشع انواع المعاملة

حداد على عــِـرض النساء المــُنتـَهـَـك

حداد على دمِ الشباب المــُسال


حداد على جيش مصر الذي مات و اندفن منذ زمن

جيش مصر الذي اختــُطــِـف و تم استبداله بكائنات غريبة


حداد على الإنسانية

حداد على النـّـخـْوَة

حداد على الرجولة


حداد على من مفترض انهم حاموا الثورة

حداد على من كانوا خير جنود الأرض


أين ذهب الجيش المصري ?


أين ذهب الرجال ?


لكِ الله يا مصر


حداااااد !!!

:' (

مبروك يا لـيـبـيـا !!!

امبارح
يوم 20 أكتوبر 2011
عالساعة 3 و نص كده

كنت قاعدة في أمان الله
لاقيت "المصري اليوم" باعتينلي عالموبايل
بـخبـر مـقـتل القذافي !!!

بصراحة انا مصدقتش و قلت ده اكيد خبر كاذب
ممكن يكونوا لسه مش متأكدين
زي الخبر اللي جالي قبل كده ان "علي عبدالله صالح" قرر يتنازل عن منصبه
و في الاخر طلع بيهزر هههههههههه لا و بيتشرّط كمان
ما علينا المهم
ساعتها مصدقـتـش
و أول تعليق كتبته عالفيس كان

"القذافي مات فعلا ؟؟؟؟؟ و لا هيطلعلنا من تحت الارض يقول : زنجة زنجة ؟؟؟"

و كنت مستنية بشوق و نفسي حد يرد عليا يقولي : "لا هو مات فعلا"
بس الحقيقة محدش رد عليا ^_^ و مأخدتش غير لايك واحدة بس ساعتها
بعدها فتحت التلفزيون لاقيت كل قنوات الأخبار جايبين الخبر
قلت لا بقى ده اكيد صح و بعدها جابوا صورته و هو مقتول

بس بأمانة ^_^ ساعتها جه على بالي تخيل غريب و مضحك قوي
و قلت ممكن يكون القذافي مماتش و لا حاجة و انه عامل حاجة كده زي فيلم
face off
أو فيلم
mission impossible
و ان اللي مات ده واحد تاني لابس وش القذافي و ان القذافي دلوقتي مستخبي تحت قناع لشخص تاني
هههههههههههههههه
هي الفكرة مجنونة بس مش جديدة
و الراجل كده كده ما شاء الله كان مجنون و عايش حياته و مفيش حاجة معملهاش
قلت جات على دي و تفوته ؟
أكيد مفاتهوش يعمل كده
ههههههههههههههه
بس طبعا رجعت بعد شوية سرحان كده لأرض الواقع علشان أشارك الليبيين فرحتهم بالنصر
بجد كنت فرحانة قوي قوي كإن مصر اتحررت تاني
الحــمــد لله !!!!!!
بجد صبروا كتير و اتعذبوا كتير و جاهدوا كتير و استشهد منهم كتيييييير لحد ما وصلوا و ربنا نصرهم
و حسيت قد إيه ربنا مش بيضيع حق حد و مش بيسيب ظالم إلا لما ياخد جزاته
و لو بعد حين !!!!!

شكلهم و هما بيحتفلوا بالأعلام كان جميل قوي و مذهل
كان نفسي أقف في البلكونة أصرخ بصوت عالي و اقولهم إن مصر هنا فرحانة بيهم قوي
و إننا بنحتفل معاهم بقلوبنا
حتى لو منزلناش الشارع
و ان النهاردة يومهم , النهاردة عيدهم , النهاردة أهم لحظة في حياتهم كلها
أهم لحظة في تاريخهم اللي هيحكوه لولادهم


الحـــمـــد لله
مـــبـروك يا لـيـبـيا
:) :) :)

"آسـفـــيــن يا ريــــّـس " !!!

"آسـفـــيــن يا ريــــّـس " !!!

بقلم : خديجة غتوري

آسفين يا ريّس ...

ع المفاجأة

الشعب كله قام

و فجأة .. الأرض هزّت

و وقعت من عالكرسي

آسفين يا ريّس ...

مش كنت فاكرنا شعب مهيّس؟

متــيــّس ؟!!

ملناش غير في الكورة و السيما

و الكافيهات ...

و الموضة و الخروجات ...

و تقول كويّس

خليني قاعد لحد ما اشبع

و في البنك نوت أكيّس أكيّس!

و ياخدها من بعدي ضنايا

و هو يديها لضناه ..

اللي هيديها لضناه ...

لكن يا خسارة يا ولداه ..

ملحقتش تكمّل ..

و خسرت كله في وقت واحد

حب و قوة و سلطة و جاه

و مهما قعدت تزوّق ..

و ف كلام تجمّل ..

علشان يسيبوك شوية

آسفين يا ريّس ..

محدش قادر يتحمّل

طلع الشعب جريء و صاحي

الشعب فـــــاق !!!

و كل اللي قالوا بنحبك

آسفين ... ده كان نفــاق

و لما وقعت سابوك

و عارفك هتبكي من الفراق

لكن معلش ... نصيب

و لو تعبان ..

و لو زعلان عليه قوي

خد معاك الكرسي

و هنجيب كرسي جديد لمصر !

ماهو بفضلك بقينا

عايشين في عصر

فيه الكرسي جوّه القصر

حواليه عيون ملهاش حصر

عيون حزينة ..

عيون خايفة على مصر

و عيون تانية طمعانة !!!

-------------------------

آسفين يا ريّس ...

ع الخضة

بس الدهب و الفضة

غــِـليوا قوي في السوق

سألنا قالوا أصلنا

بنعمل بيهم معالق

من واسطة

للناس الكبيرة

ياكلوا بيها الحقوق!

-------------------------

آسفين يا ريّس ...

ع الشتايم !

دي مش أخلاقنا

بس انت كنت فاكرنا بهايم

و بنتساق زي الغنم

و احنا اتخنقنا !

و شايف الفقير عاللقمة دايخ

و تطلع تقول ف كلام عالفاضي

الشعب راضي .. الشعب راضي ..

الشعب راضي ..

بذمـّــتك .. مش كنت بايخ ؟

و تقول لنفسك ..

بينك و بينها ...

الشعب نايم !!

و طول ما الفقير لوحده

هيسكت و يكتم في قلبه

و لا حد عارف .. و لا حد حاسس ..

ولا حد فاهـم !!!

-------------------------

آسفين يا ريّس لما قلنا

تمشي انت بالتحديد

انت و نظامك البغيض

يمكن كان أسلوبنا شديد

لكن حقــنا ...

ده انت كنت شايفنا عبيد

و مش بيهمك حالنا ايه

و لا الفقير إزاي هيعيش

و هو مش لاقي الرغيف

و بياكل اللحمة ...

من العيد للعيد !!!

و ف بحر من الشقا غرقان

و يا ريته بحر نضيف

و انت عامل نظرك ضعيف

و مش شايفه من بعيـــد

و مهما قعدت تعيد وتزيد

ف كلام

برضه مفيش جديد !!!

-------------------------

آسفين يا ريّس ...

ع المقاطعة

بس كل يوم المـيـّة قاطعة

جرّبت تشرب مية صفرا ؟

مية مجاري ؟

كنت بايع بلدك و لا شاري ؟!

جرّبت تعيش جمب مصنع أسمدة ؟

جرّبت تتنفس هوا من غير فلاتر ؟

كنت فين يا شاطر من كل ده ؟!

جرّبت تقرا على شمعة ..

و لمبة جاز ؟

جربت تتبهدل علشان ..

أنبوبة البوتاجاز ؟!

-------------------------

آسفين يا ريّس ...

ع الاعتراض

بس احنا بنواجه أمراض

أمراض كتيــر .. وهمية

و قبل ما نعالج الأعراض

كان لازم نشيل راس الفساد !!

-------------------------

آسفين يا ريّس ...

ع الاستعجال !

لكن سياستك ..

كانت كلها استغفال

و مش معقول بعد تلاتين سنة

كدب و تزوير و وعود بور

هنصدق وعودك في ست شهور

يــا عم خلاص ما قلنا غور

و لازم نعملك استـئصال

و لو انت شايف ده استهبال

فمعلش .. من حقنا نثور

و من حقنا الانفعال !!!

-------------------------

آسفين يا ريّس ...

ع الإقالة

انت كنت شايل رسالة

بتقول للشعب لأ

و رجالتي هما الحق

و نسيت معنى العدالة

و ف زمنك ظهرت وظيفة

جديدة ... اسمها البطالة !

و سايب ولاد بلدك

ياكلوا من صناديق الزبالة

و تهتم ليه ! ..

ما احنا ف نظر سيادتك ...

حــثــالة !!!

-------------------------

آسفين يا ريّس ...

ع الشماتة !

بس انت كنت خيال مآتة

ياما استنجدنا بيك

و سبت رجالتك

يتحكّموا فينا بعباطة !

و ماسك في حكمك باستماتة

قلنا ماشي ...

يمكن عايز تخدم زيادة

و تصلــّح ... بس تاتا تاتا

و سيبناك ..........

لقينا كل الأفلام إعادة !

-------------------------

آسفين يا ريّس ...

ع الرحيل

بس انت بجد ملكش مثيل

قلبك كان في البداية طيـّب

لكن بيحركه ألف عميل

لحد ما اتحوّل حجر !

و كان ممكن تثبت حبك

لمصر ...

بمليون دليل و دليل !

شوف لما مشيت ازاي

الدنيا اتغيرت ؟

شوف لما مشيت ازاي

الشباب عيونهم نوّرت ؟

و الحياة و النشاط

عادوا من تاني

بعد ما كان الشعب مات

عرفت دلوقتي ...

مصدر اليأس و الإحباط ؟!

-------------------------

آسفين يا ريّس علشان قولنا

مــــــــــش بنــحــبــك

بس احنا ياما بسببك اتألمنا

لكن مقدرناش نقولها

و الا كنا

اكتر ماحنا متبهدلين ...

اتبهدلنا !!!

و عمرنا ما نافقناك زي رجالتك

و لما لقينا فرصة اتكلمنا !

-------------------------

آسفين يا ريّس علشان نسينا

كل خير عملته لمصـر

ده احنا ياما صرخنا و بكينا

و لا حد سمع بكانا

و لا حد طبطب علينا

و انت شايف اللي بيجرا فينا

و تقول شوية و الحياة هتاخدهم

و كنت فاكر مرور الوقت هينسينا

و ان 6 أكتوبر و انتصاراتك

باقية لينا ..

و هتخلينا نسكت و نقول

ده فضله كبير علينا !

و كل سنة

بشوية احتفالات بتخدعونا

علشان نعيش في وهم النصر

و ندوّر على سعادتنا في الماضي

و ف الآخر ... كله فشـنـك

و ع الفاضي !

و انتصرنا على اسرائيل

لكن من جوّة مـُـحتـَـلين

و مطحونين و مقهورين

و حتى برّة متهانين

و ملناش ضهر !

و الصمت هو لغـتـنا

و الخوف هو حياتنا

و اسمنا في البطاقة مصريين

و كإن كل حقوقنا خدناها

كــامـــلة

في تلاتة و سبعين !

-------------------------

و قبل ما تقول افتكروا

أنــا عملت ايه لمصر

شوف النسبة كام

بين نجاحك و الفشل

بين جهد و عمل ...

و بين نظام مليان خلل

غرقان خلل !!!

هتلاقيها متساويش نسبة نجاح

و كان مصيرها أكيد رسوب

و ركــود ...

و اختفاء نور الصباح ...

عن عيوننا

و كانت اكيد هتجيب

ريــــاح عاصفة

من الشمال للجنوب

و انتهت شمسك ..

و جه وقت الغروب !!!

-------------------------

آسفين يا ريّس ع الرحيل

بس انـت تــوب ...

ف الوقت الباقي من عمرك

و استغفر ربك م الذنوب

و ع التقصير ف حق وطنك

هو عارف صدق القلوب

و عارف مصيرك فين

هو علاّم الغـيــوب !!!

-------------------------

تاريخ الانتهاء من كتابته :

28-2-2011