دخل عليها المطبخ و هي بتجهز الغدا و باين عليه الجوع و بدأ يراقبها و هي بتطبخ و فضل يبوصلها .. عملت نفسها مش واخدة بالها ..
قالها : إيه بقى؟! ^_^
قالتله : لا متبوصليش كده .. لسه شوية .. ده انا لسه محطتش الخضار عالنار
قالها : نعم؟؟؟ .. أومال كل ده بتعملي ايه؟! :D
قالتله : كل ده؟ .. انا بقالي تلت ساعة بس في المطبخ .. ملحقتش :D
قالها (بغلاسة) : انتي بطيئة قوي .. ده انا فــ أي مطعم بعد نص ساعة الأكل بيكون عالترابيزة .. و انتي لسه هتحوطي الخضار؟ ^_^
قالتله : يا سلاااااام .. طالما بتقارن بقى .. مين أكله أحلى؟
قالها (بسرعة) : انتي طبعااااً
قالتله : طب عيني فـ عينك كده؟
ضحك و قال : لا بس انا بجد بحب أكلك قوي .. طعمه بيطلع مميز .. انتي بس ناقصك السرعة
قالتله : ما انت واخد أجازة النهاردة و قاعدلي في البيت .. أصلاً احنا مش وقت غدا لسه .. علشان كده بحب اطبخ في رمضان .. متقدرش تستعجلني :P
قالها : ده على أساس ان معاد الغدا ده معاد رسمي بتوقيت القاهرة؟ :D
قالتله : ههههههههههه .. بقولك ايه انت بتعطلني كده
قالها : أصلاً الموضوع سهل و مش محتاج كل الوقت ده .. انتو بس اللي بتكبروا المواضيع .. كل الستات كده :P
قالتله (بلهجة تحدي) : و الله؟ طب إيه رأيك تيجي تجرب و نشوف اللي بعمله في ساعة هتعمله انت في قد إيه؟
قالها : لا طبعاً مفيش مقارنة .. لان انتي بالممارسة المفروض هتبقي أسرع مني ^_^
قالتله : مش انا بالممارسة و بطيئة .. يبقى انت مفروض سريع و من غير ممارسة .. يعني متساويين .. و لا مين اللي كان بيقول عليا بطيئة من شوية؟
قالها : عالعموم ماشي ممكن مرة تخرجي و تسيبيلي المطبخ و لما ترجعي هتلاقي أكلة و لا أحسن مطعم في مصر
قالتله : هههههههههههه لا انا هقعد اتفرج عليك و انت محتاس :P
قالها (بثقة) : لااااا .. عدم وجودك ده شرط أساسي علشان متغشيش الأصناف مني :D
قالتله : آه طبعاً .. علشان تجيب أكل من برة و تقولي انت اللي عامله .. فاهماك انا
قالها (باستنكار مزيـّف) : ايه ده فين الثقة؟ انا اعمل كده برضه .. مخوّناني؟ 3:)
ضحكت و بعدين بصتله بنظرة فيها مـَكـْر و على وشها ابتسامة شريرة ..
و قالتله : طب إيه رأيك تساعدني دلوقتي شوية ؟ واهو تاخد شوية خبرة؟
قالها (بترحيب) : قوي قوي .. قوليلي انتي بس اعمل إيه و هتشوفي شغل جاااامد
ضحكت ضحكة شريرة و قالتله : لما نشووووووف! 3:)
طلّعت بصلتين و سكينة و ادتهومله ..
قالت : تعرف تخرّطلي البصل ده مربعات كبيرة؟
قالها : آه طبعاً .. شوفت الطريقة قبل كده في برنامج .. هقشرها و بعدين هقطعها بالطول و العرض صح؟
قالتله : آه صح .. بس خلي بالك السكينة حامية
رد (بثقة) : عيب عليكي ^_^
قشـّرها و شال جذورها و بعدين قالها : أهو .. سهلة جداً .. احنا جامدين قوي
قالتله : هههههههه انت ضيّعت حتة كبيرة من البصلة بس ماشي .. كمل كمل .. اللي جاي أهم
قالها : ماشي يا ستي .. دقايق و اخلص
بدأ يقطع بالسكينة و بعد دقيقة .. عينيه احمرّت و بدأت تدمّع ..
قالها : ايه ده؟ هو في ايه؟ ....... انتي حاطالي حاجة في البصل؟!!! ....... مش قادر افتح عيني ...... ايه ده بتحرق جاااااااامد .. دي فيها غاز مسيل للدموع ...
قالتله : هههههههههههههههههه هكون حقنتها غاز مثلاً ؟ :P :P
قالها (بضيق) : بتضحكي؟ انا بتكلم جد .. مش قادر!
خلص واحدة و بعدين فضل مغمض عينه شوية و قام ..
قالتله : رايح فين؟ لسه واحدة كمان
قالها : كفاية عليكي واحدة .. مشـّي حالك بيها .. مش قادر
قالتله : لا واحدة مش هتكفي .. محتاجة اتنين
قالها : خلاص اعمليها انتي ..
قالتله : نعم؟! .. لا مليش دعوة انت اتوليت المهمة كملها للآخر .. و لا انت كده بتعلن استسلامك؟! :P
قالها (بغيظ) : مفترية .. طب هاتي منديل علشان مناخيري ساحت .. و امسح وشي علشان اقدر اشوف ..
ادتله المنديل و وقفت تضحك على شكله و هو بيفتح عينيه بالعافية
قالتله : أومال لو قولتلك شوّحها عالنار هتعمل ايه؟
قالها : انتي آخرك معايا اخلصلك التانية و امشي ..
قالتله : تمشي؟!! ده انت على كده ممكن تغدينا بصل بس ههههههههههه :P
قالها : ماشي ياختي .. اضحكي اضحكي .. هيجيلك يوم
قالتله : يوم ايه؟ ده انا بعمل البصل كل يوم .. بطــّل دلع :D
قالها : طب سيبيني اركز و روحي كملي اللي بتعمليه ..
راحت تغسل الرز و هي بتضحك .. هو خلص و قام يغسل وشه و بعدين رجع ..
قالها (بلهجة انتصار) : تمت المهمة بنجاح .. تاتااااااا :D
ردت عليه : مش بطـّال .. يلاّ عاللي بعده
قالها : بعده ايه .. هو في بعد اللي عملته ده حاجة تتعمل؟ محتاج ريست عشر دقايق
قالتله : هههههههههههه .. انت عارف انك أخدت ربع ساعة علشان تعمل البصل بس؟ على كده لو كنت شغال في مطعم من اللي بتقول عليهم .. هيرفدوك من أول يوم .. قال نص ساعة قال :P
قالها : لا ممكن ابقى متخصص سلطة بصل باللمون
قالتله : مفيش حاجة اسمها سلطة بصل باللمون -_-
قالها : ماهو ده هيبقى اختراع جديد ليا :D
قالتله (بحزم) : طب يلاّ .. خود شوية الكوسة دي قشـّرها بالمقشرة زي مانا بعمل كده في الخيار .. دي تاني مهمة ليك ..
قالها : امممممم .. و اشمعنى ادتيني الكوسة و أخدتي الخيار؟ أكيد هي كمان بتعمل حاجة
قالتله : متخافش عينيك في أمان المرادي :D
بصلها بشك و مسك الكوسة و بدأ يقشرها .. و بعد شوية
قالها : خلصت .. بس مال ايدي نشفـت كده ليه؟
قالتله : روح اغسلها
قالها : مانا غسلتها .. مفيش فايدة .. نشفـت و قـشـّـفـت كده زي ما يكون عندي جفاف
قالتله (بغلاسة) : آآآه ماهي الكوسة كده .. بتنشف الايد شوية .. معلش :P
قالها : و الله؟ و طبعاً حضرتك كنتي عارفة انها بتعمل كده و اختارتي الخيار و ادتيهالي .. ماشي ماشي
قالتله : ههههههههه ماهو انت في فترة تدريب و مفروض تعدي على أصعب حاجات بس انا كده اتساهلت معاك جامد و اديتك حاجات سهلة .. فاضلك حاجة كمان و تبقى عديت المرحلة الأولى
قالها : صدقتي نفسك انتي .. عايشة الدور عليا :D
ردت عليه : انا مش عرضت عليك تساعدني و انت وافقت؟ يعني انا الشيف المرادي .. لما ييجي الدور عليك هبقى اساعدك
قالها : خلاص اتفقنا .. انتي اللي جيبتيه لنفسك .. مترجعيش تزعلي -_-
ضحكت و قالتله : المرحلة الأخيرة هسميها مرحلة "الطبخ الثنائي" .. هتخلص حاجتين مع بعض
رد (باستنكار) : ليه هو انتي شايفاني عندي كام ايد ان شاء الله؟!
قالتله : و لما انت بتطلب مني أعمل كذا حاجة في نفس الوقت أو وقت قصير .. بتبقى شايفني أخطبوط؟ :D
قالها : ههههههههههه خلاص فهمت رسالتك و مش هطلب كذا حاجة تاني بعد كده .. هاه اعمل مين فيهم بقى؟
قالتله (بحزم) : انت مش هتطلب .. بس انا بقى هطلب و النهاردة يوم الانتقام .. هتعمل شوربة كنور اللي بتحبها و تقلي بطاطس و قدامك دقيقتين الاتنين يكونوا عالنار
قالها : على فكرة انا مش مـُجبـَر اني اعملهم و انتي أصلاً تلاقيكي متعرفيش تعملي كده .. اختاري حاجة بدل ما اقولك مش عامل حاجة خالص :P
قالتله : لا سهلة عملتها قبل كده .. بس ماشي هعديها المرادي .. لا و هسيبك كمان تختار انت ..
قالها : اوك .. هعمل الشوربة .. هي الحلة اللي فيها لبن دي للشوربة؟
قالتله : آه .. فاضل بس تدوّب فيها كيسة كنور و تقلبها عالنار كويس و متسيبهاش .. لحد ما تتقـل و بعدين تطفي عليها
قالها : سهلة جدا .. كإني بعمل مية بالسكر .. مش عارف ليه محسساني انها حاجة يعني :P
قالتله : طب متسبقش الأحداث بس ^_^
وقف يقلب الشوربة و بعد 10 دقايق ..
قالها : انا زهقت .. مش بتتقل .. شوية و هرجعلها
قالتله (بسرعة) : لا مينفعش هتكلكع .. لازم تفضل جمبها تقلب فيها
قالها : طب خودي قلبيها شوية
قالتله (بغلاسة) : لا انا بقلي البطاطس زي ما انت شايف ..
قالها : اييييه الملل ده .. اتخنقت .. انا ريحة هدومي بقت أكل !
بصت في الحلة و قالتله : هي كده سخنت .. دقيقتين كمان و هتبدأ تتقل
قالها : حلوة كده و عاجباني .. هشربها كده
بصتله بصة تهديد و قالت : متنساش ان انا الشيف النهاردة و مفيش حاجة هتطلع من مطبخي أي كلام .. الطبيخ له قواعد
قالها (بنرفزة) : انا مش فاهم انتو بتستحملوا الكلام ده ازااااااااي؟
قالتله (بسرعة) : أيوااااااااا .. بس خلاص سيب الشوربة .. انا كده وصلت :D :D
رد (باستغراب) : وصلتي فين؟
بصلها لقاها بتضحك ضحكة انتصار ذات معنى و رفعاله حواجبها ..
قال : أوبااااااا .. انا كده فهمت ^_^
قالتله (بلهجة تحدي) : هاه؟ لسه شايف اننا بنكبّر المواضيع و ان الطبيخ ميستاهلش؟ و نص ساعة و يخلص؟!
قالها (بذهول) : يا لهوي .. انتي بتعملي كل ده علشان توريني بتتعبي قد ايه؟
قالتله (بفخر) : بالبرهان و التجربة العملية ^_^
قالها : يا شيخة كنتي اسأليني .. كنت هقولك اني مقدر مجهودك و اني عارف ان اللي بتعمليه في البيت مش سهل طبعاً
قالتله : سبحان الله .. واحد تاني اللي بيكلمني دلوقتي
قالها : هههههههههههه .. لا بس انا بجد بقدر اللي بتعمليه فعلاً .. لكن بصراحة كنت متخيل الطبيخ أسهل من كدة
قالتله : أديك شوفت بنفسك احنا بنتعب قد ايه .. ابقى اسمع بعد كده تريقة على طبيخي
قالها : بس مكنش له لزوم يعني التعذيب ده .. كنتي قوليلي و انا هصدقك على طول :D
قالت : هههههههههه و ازاي افوّت لحظة انتصار زي دي! 3:)
قالها : شريرة .. كيدكن عظيم فعلاً :D
قالتله (بتهديد) : طب علشان الكلمة دي بقى انت اللي هتقشر التوم
قالها : لالالا.. انتي جميلة .. حد قال حاجة غير كده .. طيبة و قلبك حنين .. انا هروح بقى استحمى علشان مش مستحمل الصهد اللي في المطبخ ده .. الدنيا حر جدااااا
قالتله : هيييييه .. و آدي كمان هدف ليا .. خلي بالك لو طلعت من المطبخ دلوقتي يبقى الماتش انتهى لصالحي
قالها (بغلاسة) : انا عندي روح رياضية
قالتله : اعمل حسابك الأجازة الجاية الدور عليك :P
قالها : الأجازة اتمنعت عندنا لحد آخر السنة
قالتله : كده كده هييجي عليك يوم انت اللي هتطبخ .. و عايزة أكل حقيقي .. مش مية بسكر -_-
قالها : نسيتي أهم حاجة ..
سألته : إيه؟؟
ابتسم ابتسامة شريرة و قالها : إنك هتساعديني ! :)
__________________
من وحي خيالي ^&^
فكرة 2013
كتابة : 11_8_2014
