الحياة دي غريبة جداااا !!!!
إزاي الشخص اللي بيعكنن عليك و يخنقك و يجرحك في مواقف يبقى هو نفس الشخص اللي بعد كده بيكون ليك معاه أيام حلوة و ذكريات جميلة و سعيدة , يعني إزاي دلوقتي حد يقولي أوازن بين الاتنين ؟ تناقض فظيع و صعب عليا و خصوصا لما يكون الموقفين الاتنين مفيش بينهم مسافة أو وقت كافي ان الواحد يتوازن , ازاي يكون الشخص ده لسه جارحني امبارح و ييجي تاني يوم متوقع مني اني اكون نسيت المواقف التانية ؟!!!!!! ده المصيبة الأكبر انه ممكن بعدها بخمس دقايق و لا حتى ساعة يرجع يبتسملك و عايزك تبادله الابتسامة أو يهزر معاك و متوقع منك انك تضحك !!!!! شقلبة و وجع دماغ صعب!
.................................
ليه ؟
...........................................
ليه ؟
ليه الستات بيصغروا سنهم ؟
أو ليه دايما الناس واخدين فكرة مقتنعين بيها تمام الاقتناع ان كلللللللل الستات بيصغروا سنهم و ان محدش بيقول سنه الحقيقي ؟
ليه الناس فاكرة كده مع ان مش كل الستات بيعملوا كده ؟
و لو صح بيعملوا كده ؟ ليه بيعملوا كده ؟
ليييييييه ؟ ^____^
انا عن نفسي كنت 50 او 60 أو حتى 70 سنة , عادي هقول سني يعني , أصل كده كده جوزي هو كمان بيكبر معايا و لا انا يعني بكبر لوحدي ؟ و الاعمار بيد الله و ده عمر يعني مش عيب مثلا , و أديني بقول أهو انا مواليد 90 يا جماعة و اللي هيقرأ الكلام ده كمان 50 سنة يعرف اني هيكون عندي 70 سنة ساعتها دة لو ربنا طوّل في عمري ان شاء الله
^___^
و الله حاجة غريبة بجد , معلش هو تساؤل غريب انه يتكتب هنا او موضوع غريب للطرح لكن هو فعلا موجود و بيستفزني
مرة كنت عند دكتور السنان و كان معاه دكتور تاني بتاع جراحة علشان يستشيره في حاجة, المهم سألني عندك كام سنة فأنا بوضحله بقول هكمل 18 بعد شهرين
بدل ما أقول 17 و عشر شهور قلت 18 الا شهرين , لقيت الاتنين غمزوا لبعض بالكلام كده , هو كان هزار بس برضه معناه اني كنت بكبّر سني
يا عم انا مكنتش أقصد ما كان ممكن أقولك 18 و اسكت , طبعا انا ساعتها مكنتش عارفة اتكلم علشان فاتحة بقي فكبرت دماغي , بس فعلا الموضوع ده بيستفزني جدا باعتباري هبقى واحدة من الستات اللي الناس بيبصولهم انهم على طول بيصغروا سنهم , لييييييييييه حد يقولي ؟
الامتحانات
سؤال سخيف و غلس يطرح نفسه و دايما بنسأله لنفسنا قبل الامتحانات النهائية للترم بأسبوع : انا ليه مذاكرتش من اول السنة و لميت نفسي و احترمت نفسي و بقيت بني آدم ؟؟؟؟؟ و كل مرة بعد طرح هذا السؤال العجيب يشتد العزم ان على الترم الجديد باذن الله هشوف من نفسي شغل تاني و مختلف,و يعود الحال الى ما هو عليه, و ليه دايما طول السنة ببقى شايفة المنهج صعب و أفضل أؤجل فيه و لما أتزنق أيام الامتحانات و أذاكره أكتشف انه كان سهل و اني كااااااان ممكن أذاكره على مراحل متفاوتة و ألحق أخلصه بدل ما أنا مزنوووووقة دلوقتي ؟
هناك 4 تعليقات:
بالنسبة لنقطة الحياة غريبة جدا فهي كدا فعلا وكل ديه اساليب حياتية الواحد بيكتشفها وهوا عايش وبيتعلم التعامل معاها بيكون ايه انسب طريقة له
بالنسبة لنقطة الامتحانات
فكل سنة بيكون في تحسن ^_^
وعلي قدر العزم وصدقه علي قدر ما حتكون النتيجة
لان ساعات العزم بيكون روتيني :)
صح فعلا الواحد بيتعلم كل مدى و كل ما يشوف أكتر من الحياة بيعرف يتعامل معاها اكتر
و بيعرف يتجاهلها امتى , و امتى يرد عليها , التعامل مع الحياة ده فن و فعلا بنكتسبه بالوقت
معاك حق
و ساعات الواحد بيذاكر لمجرد ان عنده امتحان و مش بيكون مستمتع في المادة و يمكن اللي بيخليه روتيني اننا بنتأخر فبنذاكر في وقت قليل و مش بنلحق نستمتع بالمذاكرة
أما التحسن فده في رأيي بيختلف من شخص لشخص
شكرا جزيلا
:)
لن أضيف كثيرًا لما قيل.. ولكن أود قول شيء بسيط
لا ترهقي نفسك بأسئلة استفهامية كثيرة وخاصة هذه التي تبدأ بــ"ليه؟" لأن أغلبها ليس له إجابة وإن وجدت فلن تلبي حاجتك في الإجابة بل ستؤرقك أكثر
أريد أن أختصر عليكِ طريق سيأخذ من وقتك الكثير وعاجلًا أو آجلا ستتركينه لتكملي بطريق حياتك..
وفقك الله خديجة.. تقبلي مروري
..
@ ايمان
معكي حق في كل كلمة
الاستفهام ب"ليه" لا يأتي سوى بالمتاعب
و لكن ربما سؤال منهم او اثنين وجدت له اجابة فاستطعت تغيير الواقع!
او ربما لا !
و لكننا لم نــُخلق لنتقبل ما نجده كما هو فقط , و لكن لنغير الواقع في ما يشاءه الله و يأذن به ^__*
أشكرك لمرورك
زيارتك لي تسعدني :)
إرسال تعليق