قالها : أنا زعلان منك !
قالتله : ليه ? خير ?!
قالها : مش عارفة ليه ?!
قالتله : لأ مش عارفة
قالها : من أول اليوم النهاردة و انتي غريبة و متغيرة معايا !
قالتله : إزاي ?!!!
قالها : أولا ، انتي عارفة اني بحب اقرأ جرنال معين كل يوم قبل ما انزل الشغل و مع ذلك طنشتي و طلبتي من عم عبده يجيب جرنال واحد بس.. اللي انتي بتحبيه و مجبتيش بتاعي
قالتله : بس مش احنا اتفقنا اننا هنقرى نفس الجرنال ?
قالها : لأ محصلش ده كان هزار و انتي اللي بدأتيه امبارح ، ولو افترضنا انه حصل ، ليه يكون بتاعك مش بتاعي ?
قالتله : خلاص متدقش معلش النهاردة غصب عني سرحت
قالها : يبقى متزعليش بقى لما انسى انا كمان أجيبلك حاجة بتحبيها
قالتله : خلاص متزعلش مجاتش من مرة ، متبقاش غلس ، و بعدين انا جبتهولك بعدها و موجود دلوقتي لو عايز تقراه !
قالها : مانا هقراه بس امتى فـ آخر اليوم ? دانا حتى مرضتش اقرى جرنال حد تاني علشان متعود باخده منك انتي =)
قالتله : طب في ايه تاني مزعلك ? مش معقول ده بس !
قالها : كل ما اطلب منك حاجة النهاردة ، يا تتأخري عليا يا تنسي خالص لحد ما افكرك ، كإنك بالظبط بتنسيني انا ! و لا كإني موجود !
قالتله : لا لا مش للدرجادي ، دي حاجات بسيطة و يمكن حصلت مرة او مرتين ، مش لدرجة انساك
قالها : حصلت اكتر من سبع مرات !!! قوليلي بقى انك نسيتيهم كمان !!!
قالتله : متزعلش مني آسفة غصب عني ، بالي كان مشغول
قالها : بحد غيري ?!!!!
قالتله : هو لازم يكون حد ?! لا كانت حاجة مدايقاني
قالها : طب مفضفضتيش معايا ليه ?! زي ما بتعملي على طول
قالتله : مكنش جايلي نفس اتكلم ، هبقى اقولك بعدين
قالها : بعدين تاني ? اول امبارح نزلتي و مش راضية لحد دلوقتي تقوليلي روحتي فين ، و برضه الاسبوع اللي فات عملتي نفس الحركة و انا صابر و ساكت و كل اللي قدرتي تقوليه ان المشوارين في نفس المكان ، كإني هشم على ضهر ايدي !!! استفدت ايه انا كده ?!
قالتله : مانا ساعتها قولتلك هتعرف بعدين
قالها : آه صح ، و اكون آخر من يعلم !!! انتي عارفة اللي مخليني ساكت اني واثق فيكي و بحبك و علشان دي اول مرة تعملي كده معايا ، عمر ما كان في بينا أسرار
قالتله : متقلقش خلاص التالتة لو حصلت تبقى تابتة :) ، طب ده بس اللي مزعلك ?
قالها : لا كل ده كوم و الحاجة اللي جاية دي كوم تاني !
قالتله : هي ايه ?!
قالها : النهاردة كام في الشهر ?
قالتله : آآه مانا عارفة النهاردة عيد ميلادك ، و قولتلك كل سنة و انت طيب ، هي بس الهدية اتأخرت شوية علشان مفلسة اليومين دول
قالها : مش عالهدية خالص ، انا كفاية عندي انك تفتكري عيد ميلادي و تقوليلي كل سنة و انت طيب !
قالتله : طب فين المشكلة ?!
قالها : المشكلة ان أهم شخص في حياتي يقولي "كل سنة و انت طيب" آخر واحد !!!
قالتله : انا فاكرة من زمان بس مش عارفة ازاي النهاردة نسيت خالص !!!
قالها : تخيلي كل اللي اعرفهم كلموني و قالولي ، ده حتى عم عبده البواب قالي ، و انتي …..آآآخر واحدة !!!!!!
قالتله : هو للأسف حظك جه في النهاردة ، و انا من أول اليوم مش على بعضي ، و كل حاجة بنساها
قالها : بس النهاردة المفروض بالنسبالك يوم مميز ، بغض النظر عن أي حاجة ، ملقيتيش غير النهاردة ?? ده كمان ناس كتير ميعرفونيش قابلتهم النهاردة و ضحكولي من غير سبب زي ما يكونوا حاسين ان النهاردة يوم مميز بالنسبالي او يوم مهم
قالتله : و الله بجد مش عارفة اقولك ايه ، محرجة منك !
قالها : طب أقولك على حاجة !، بلاش نقول نسيتي عيد ميلادي و انا اللي قعدت ألمحلك و افكرك لحد ما افتكرتي اخيراً، طب ليه بالذات النهاردة كنت حاسك متغيرة معايا?! كإنك ملقيتيش غير النهاردة ! كإنك قاصدة !
قالتله : طب ما انت نسيت يوم عيد جوازنا، و ده أهم من يوم ميلادي و ميلادك
قالها : أولا، بالنسبالي عيد ميلادك أهم لان ده اليوم اللي انتي جيتي فيه للدنيا :)، ثانيا، انا مكنتش ناسي حتى بالأمارة الهدية كانت مستخبية في الدولاب من الاسبوع اللي قبليه و انتي استغليتي فرصة انك بتصحي قبلي و انا صاحي من النوم مدروخ و مش مركز و عايزاني اول ما اصحى و اشوفك قدامي بتضحكيلي ضحكة ليها معنى، اعرف و اسبقك و اقولك: " كل سنة و انتي حبيبتي " و ده قبل ما اكتشف ان الريسبشن كله ورد بره =)
قالتله : خلاص يبقى احنا كده خالصين، مرة انت انشغلت و مرة انا، مانا كمان كنت فاكرة
قالها : لا غير بعض، انا بس اتأخرت شوية على ما قلتلك لكن انتي قعدتي اليوم كله، كان مفروض بلمحة بسيطة تفهمي، شكلك كنتي ناسية
قالتله : لا كنت فاكرة قلتلك
قالها : و انا ايه اللي يثبتلي ?
قالتله : يعني هضحك عليك ? مش مصدقني ?! انت حر !!!
قالها : لا و كمان زعلتي ?! يعني حتى شوية عتاب مش مستحملاهم ?! عتاب من جوزك حبيبك !!
قالتله : لا خلاص هستحمل، هاه قووول كمان
قالها : طب ايه رأيك بقى هقول
قالتله : قول فضفض متسيبش حاجة فـ قلبك :)
قالها : لا و المستفز أكتر انك سامعاني برد على صاحبي بقوله "وانت طيب" قومتي سألاني: "هو بيعيـّد عليك من دلوقتي ? لسه اسبوع على ذي الحجة !"
قالتله : بقولك ايه، انت مش جعان? انا عاملة الأكلة اللي انت بتحبها علشان نتعشى بيها سوا :)
قالها : لا مليش نِفس، و انتي غيري الموضوع و اهربي ماشي
قالتله : لا مش هروب و الله، اقرأ بس الجرنال بتاعك علشان تبقى عارف الأخبار و مترجعش تلومني ان فاتك خبر مهم، و انا هجيب الاكل علشان لازم تاكل :)
بصلها بيأس و …
قالها : اعملي اللي انتي عايزاه !
ابتسمت بجنون و راحت المطبخ …
فتح الجرنال عالصفحة التانية … لقى صورته بحجم كبير …و مكتوب تحتها بالخط العريض: " كل سنة و انت طيب يا حبيبي... متزعلش مني... كل اللي حصل كان لزوم المفاجأة... عيد ميلادك أهم من أي يوم... مستحيل انساه... بحبك... زوجتك حبيبتك =) !!!"
♥ ♥
_______________________
مـن وحـــي خيــالــي :)
يناير ٢٠١٢
ليست هناك تعليقات:
إرسال تعليق