ليست عشوائية !!!

في حاجات في حياتنا بنعملها بشكل عشوائي 

وفي حاجات بنكون مخططين اننا نعملها.. 

بشكل معين 

في وقت معين 

بعدد مرات معين 

لشخص معين 

لسبب معين 

أهو البوست ده بقى مش عشوائي !!!

P:

=)

مكشوف عني الحجاب D: !!!

اكتشفت اني مكشوف عني الحجاب D: ، مش هما بيقولوها كده ? D:
طبعا الكلام ده مش حقيقي بس اللي خلاني اكتب البوست دي ان حصل معايا ٣ مواقف غريبة او مش غريبة
٣ صدف بمعني أصح
لإني مؤمنة بالصدف بس أكيد مش مؤمنة باللي قولته في الأول
أو بمعني أصح مش عارفة يعني ايه بالظبط حد يكون مكشوف عنه الحجاب ، مصطلح معرفش عنه غير معناه المجرد فمقدرش افتي فيه
لكن اللي متاكدة منه اني مليش علاقة بيه ^_^




أول موقف كان السبت اللي فات كنت بكلم واحدة قريبتي _بحبها قوي و بموت فيها_ المهم كنت حلمت بيها و بقولها على حاجة معينة حصلت في الحلم و لاقيتها بتقولي انها حصلت فعلا ^_^




تاني موقف
بعد اول موقف ده الواحد حس ان احلامه بتتحقق بقى و شكلها كده باينلها بجد و لا ايه ، فلما حلمت حلم تاني بعدها كان يوم الأحد الصبح ، صحيت بقول لنفسي يا سلام لو يتحقق ده كمان تبقى بصرة D:
الحلم كان اساسا سببه ان جهاز الكمبيوتر كان داخله على اسبوع مش بيشتغل و كل يوم بحاول فيه و خلاص جبت آخري و ورايا حاجات لازم اعملها فنمت حلمت انه اشتغل
بعد ما صحيت قلت اجرب يمكن تحصل بس مفتحش ^_^
فتحته من جوه و فضلت انضف فيه على امل يفتح ، الكمبيوتر بقى بيفتح بس الشاشة مش بتشتغل
تاني يوم اللي هو الاتنين جيت بالليل قلت اعمل محاولة تانية و حركت فيه كام حاجة و اكدت عالاسلاك ، لاقيته فتح !!!!!! D=
طبعا ملهاش علاقة بالحلم بس اللي عايز يتلكك بقى ^_^




تالت موقف مكنش احلام كان صدفة مضحكة !
كان حصل و قدمت طلب توظيف في صيدلية من الصيدليات الكبيرة اللي تلاقيها عندها بالحاجة و سبعين فرع _ما شاء الله_ رغم اني مكنتش مقتنعة بفكرة اني اشتغل في صيدلية كبيرة لاني بحس انهم همهم المكسب بس ، لكن واحد زميلي اقنعني اني اجرب و اخد الخبرة و فـ جميع الاحوال لو مستريحتش ممكن امشي
المهم بعد ما قدمت عندهم قلت لنفسي لو رقم غريب اتصل عالموبايل لازم ارد يمكن تكون الصيدلية ، عدا ٣ اسابيع محدش اتصل قلت يبقى خلاص مفيش نصيب و بطلت ارد عالارقام الغريبة و نسيت خالص احتمالية ان ممكن صيدلية تكلمني و رجعت لطريقتي القديمة في الرد اللي كانت _ومحدش يضحك او يتريق عليا_ اني بفتح و متكلمش و لو طلع صوت واحد بقفل مش برد و لو طلع واحدة برد يمكن تكون صاحبتي ، اصل لو رديت ممكن لو معاكسة يشتغلني و انا وقتي طبعا ضيق زي ما انتو عارفين P:


اللي حصل بعد ٣ اسابيع ان الموبايل رن و فتحت لاقيت صوت واحد _شكله صوت محترم_ قومت قفلت على طول و فجأة جه على بالي و قلت مش يمكن تكون الصيدلية ? صحيح مش معقول يفتكروني فجأة كده بس جايز , جات على بالي الفكرة رغم اني كنت لغيت من بالي خالص الصيدلية دي و قررت اشتغل في اي واحدة بعد رمضان ، رن بعدها بدقيقة تاني و رديت لاقيتها فعلا الصيدلية و بيبلغني بمعاد الانترفيو بتاعي
قفلت و انا مذهولة و بضحك ...
و خلصت القصة ^_^

عابر سبيل !!!

قال رسول الله (صلى الله عليه وسلم)

"‏كن في الدنيا كأنك غريب أو عابر سبيل" ... :)

نـقِّ قلبك !!!

إنها تلك اللحظات ... عندما تكتشف أن قلبك لم يعد نظيفا كما كان ، و أن القرار بيديك ، إما أن تحافظ على ما تبقى و تحاول إعادته إلى سابق عهده ، و إما أن تتركه يتسخ أكثر مما هو عليه !!!

 ____________________

إنها تلك اللحظات !!!

لحظات قد تطول و قد تقصر ... قد تستغرق ثوانٍ معدودة أو دقائق ... و قد تزداد لساعات ... و يمكن أن تصل لأيامٍ و شهور ... و أحيانا قد تطول لتبلغ أعواماً !!!

رمضان :) !!!

رمضان ..

 

شهر المغفرة
شهر الرحمة
شهر التوبة
شهر العتق من النار

أول أجمل حاجة في رمضان
ان كل اللي حواليك بيشجعوك على
العبادة و التقرب إلى الله
_باستثناء صناع المسلسلات طبعا_
 

بيكون جو عام من التقوى :)

تاني أجمل حاجة في رمضان
ان الناس بتتجمع على الفطار مع بعض
على عكس الأيام العادية :)
 

تالت أجمل حاجة في رمضان
انه بييجي معاه احساس جميل
بالهدوء و اليقين و الرحمة
احساس بالراحة و الطمأنينة :)

رمضان هو الشهر الوحيد
اللي بيحسسني قد ايه
الوقت بيجري بسرعة !!!

احنا داخلين على خامس يوم من رمضان اهو
و كإن معداش غير يوم واحد
بيخلي الواحد يزعل في اوله
علشان عارف ان آخره هييجي بسرعة
بس المهم يستغله كويس :)

جملة عجبتني من إمام المسجد في الخطبة بتاعة التراويح
" مهمتك في رمضان انك تجمـّع حسنات .. تـُأُش حسنات ^_^ و متطلعش منه إلا و التقوى عندك زادت عن الأول "

ربنا يتقبل منا و إياكم
كل عام و أنتم بخير
يا رب بلغنا ليلة القدر
و أعتق رقابنا من النار
يــــا رب :)

عم حـُزنبل !!!

عم حـُزنبل عم حـُزنبل
سيبه يحكيلي حكاية البلبل =(

 
 

اليــوم خـُلـُص

^_^

مــوقـف !!!

أكـــــره تـلك اللحظة
و أرجو ألا أكون جزءا منها
و لا أتمنى لأي أحد أن يمر بها !!!

قــُـدرة !!!

قــُدرة الناس على مواجهة الواقع بتختلف من واحد للتاني
في ناس بتواجه الواقع بتفاؤل لانها بتبقى واثقة انها تقدر تغيره
و في ناس بتواجه الواقع بالأحزان و الوجع علشان ..

بتحاول تتقبل فكرة إنها مش هتقدر تغيره
فلما تلاقوني ..

 موجوعة لأي سبب .. اوعوا تلوموني

لاني من النوع التاني !

" كــُرّاسة " !!!

"كــُرّاسة" !!!

بقلم : خديجة غتوري

-------------------------------

يا حبيبتي .. يا روحي

يا نور عينيا ..

وحشتيني ..

و عايز أقعد معاكي شوية

نتصارح و نتصالح

و أقولك ع اللي فيا

انا عايزك تسمعيني

و تحسي بيا ..

و تفهميني

و تسيبيني أقول و أفضفض

و متزعليش من كلامي

و تقربيلي ..

ده انتي كنتي كتير بعيدة

عني شريدة ..

و ده خلاني متدايق

ركزي معايا لدقايق

و اسرحي ف عينيا دول

عينيا اللي سهرت على راحتك

عينيا اللي تعبت ف حراستك

دانا شيــّال الحــُمول

و لو كل يوم هبات مذلول ؟

عمري ما نسيتك

و عمري ما جرحتك!!!

اسمعيني و بطلي تبصيلي بنفور

انا عمري ما غنيتلك من غير شعور

و لا دقيتلك عالطبول

و لما بكون منك زعلان .. بقول !

و يمكن اكون عنيد

لكن عــِندي و اصراري

هما اللي جابوا حقك

و رجعولك و رجعولي نهاري

و انا مش طالب بليد

انا طالب حبك بشطارة

و بفهم من أقل اشارة

بس انتي تديني أمارة

و سواء كنت ساكن

 في فيلا أو حارة

نزلت أجيب حقك بكل حضارة !!!

و بلاش يا حلوة نظرة عتاب

أنا اللي ليا عندك حساب

و جه الوقت اني اعرف الأسباب

ورا سكاتك و اخلاصك

لناس تانية مش ناسك

و ليه قفلتي ف وشي الباب ؟

و ليه كدبتي احساسك ؟

و سيبتيني و روحتيلهم

مع انك عارفة اني بحبك

أكتر كتير منهم !!!

روحتي لناس ..

الخيانة عندهم عادة

اخدوا حبيبتي مني

و انا مسلوب الإرادة

حبهم لعب و تسالي

و عمرهم ما حسـّـوا الوطن غالي

و انتي شايفاهم من خلالي

كإني انا شــفـّـاف

و هما يبصولي باسـتـخـفـاف

و راسمين صورتهم قدامك نــُـضاف

و حاطين على وشوشهم غــُلاف

قـطـّعته و شفتيهم

كشفتيهم ..

و اديكي انتي اللي سبتيهم

ده حبك كان بيحميهم

و ضعفك كان بيغريهم

لكن خلاص انا مش هخاف !!

متعيطيش ..

و متزعليش ..

الحب مفهوش مجاملة

الحب بيبان ف المعاملة

و انا مقولتش كلام جارح

و مش هفكر ف امبارح

و دلوقتي نقدر نتصالح

و اللي راح ده كإنه مفيش

بس عايزك تعرفيني ..

من غير غلاف

انا مش بفهم في السياسة

و لا أقدر أقول

دي قضية تافهة و لا حساسة

أنا كل اللي عندي كــُرّاسة

مليتها كلام في حبك

و كل ما أفتح و اقراها

بلاقي حزن و تعاسة

و ميت مليون انتكاسة

لكن بعد النهاردة

تعالي نتفاهم بكياسة

انا هقفل كــُـراسي بدبـّاسة

و هبدأ معاكي من جديد

صفحة جديدة ..

صفحة بيضة

اول سطر فيها شهيد

مش هقول فيها غير سعيد

حاسس ده اللي جاي

ان شاء الله أكيد ..

وهدافع عنك بكل شراسة

و ساعديني نعمل

من كل ظالم .. و كل من خانك

دوّاســـــــــــــــة !!

السبت ٢\٤\٢٠١١م

انت أول واحد !!!

قالها  : ممكن اسأل سؤال عارف إجابته  ?

قالتله : يعني هتسأل و تجاوب ?!

قالها  : لأ انتي هتجاوبي إجابة انا متوقعها ، بس فضولي مخليني عايز اتأكد  :)

قالتله : اتفضل

قالها  : عرفتي حد قبل مني ?

 - سكتت شوية و …

قالتله : و ليه بس نقلـّب في الماضي اللي راح   !

قالها  : ليه ، بتخافي من الماضي  ?

قالتله : لأ بس مش بحب اجيب سيرته

قالها  : معلش جاوبي المرادي علشاني

قالتله  :متأكد انك عايز تسمع الإجابة ?

قالها )بثقة  : (متأكد

قالتله  :ما بلاااااااش

قالها  : أنا واثق و مطـّمن =)

قالتله : خلاص انت حـُر

قالها  : طب إيه الإجابة  ?

قالتله) بتردد: ( … عرفت … عرفت ســبـعة !!!

 -  اتخض و …

قالها  : ايه ??? بس انتي مقولتيليش حاجة زي دي قبل كده !!!

قالتله )بكل برود(  :ما انت مسألتـنيش

قالها  : و هو انا لازم اسأل  ?!

قالتله  :أهو اللي حصل بقى مجتش فرصة

قالها  : مجتش …. فرصة ?  ..لا لا انا مش مصدق ، انتي أكيد بتهزري صح ?

قالتله  :لا مبهزرش انا بتكلم بجد

قالها  : يعني السبعة دول حبيتيهم  ولا اتقدمولك و اترفضوا ولا ايه اللي حاصل بالظبط ? أكيد مجرد عرسان اتقدموا و اترفضوا ، انا واثق فيكي و متأكد

قالتله  :مانا كنت حاسة ان ثقتك الزيادة فيا دي هتعمل مشكلة قدام

قالها  : قصدك إيه ?!!!

قالتله  :قصدي واضح ، انا طول عمري بقول لنفسي انتي متستاهليش الثقة دي

قالها  : طب مجاوبتيش عالسؤال

قالتله  :لا مكنوش ناس اتقدموا و اترفضوا ، احنا فاتحين ايه ? مكتب جواز? ، انا عرفت واحد واحد فيهم و كل واحد له قصة مختلفة معايا و كل واحد فيه حاجة مميزة عاجباني فيه

 - فضل ١٠ دقايق مذهول و هي مستنية منه أي كلمة … مفيش !!!

قالها  : انا مش عارف اقولك ايه بس انا بجد مش مصدق

قالتله  :لا اللي بقولهولك حقيقة ما احنا متعودين عالصدق و الوضوح مع بعض من البداية

قالها  : صدق ?!!! طب لو اللي بتقولي عليه ده حصل فعلا ، ليه مقولتيليش قبل كده ?

قالتله  :مانا قلتلك مجتش فرصة و بعدين جلّ من لا يسهو

قالها  : بس انتي عارفة ان دي حاجة مهمة ، ده مش فستان اشتريتيه و لا خروجة خرجتيها و نسيتي تقوليلي على اساس يعني مش قصة ، لكن دي ….. !!!

قالتله  :لا مجتش على بالي الصراحة ، و كده كده كانت هتيجي سيرتها فـ وقت من الاوقات

قالها  : ده معناه ان لو مكنتش جات سيرتها كان هيبقى القفا اللي انتي متجوزاه ده مش هيعرف حاجة منها خالص طالما ذكاءه الخارق و عقله النبيه مجبهاش لوحده

قالتله  :لا أكيد مفكرتش فيها كده ، فكرتها حاجة طبيعية مش غريبة

قالها  : حاجة طبيعية ?!!! ، لا بجد في حاجة غلط ، مش انتي اللي بتكلميني دلوقتي ، ايه اللي حصل ? فين الصدق و لا الوضوح اللي على طول كنت بشوفهم منك ? دانا كنت بضرب بيكي المثل لنفسي ! سامعاني ? لنفسي  :( !!!

قالتله : موجودين ، ماهو لو مكنتش صادقة معاك مكنتش هقول

قالها  : طب و الوضوح ? كنتي مفروض قولتي من غير ما اسأل

قالتله : خلاص بقى متدقش غلطة و عدت و كنت نسيتها أصلا

قالها  : غلطة ?!!!!!!!!

قالتله : شوية غلطات تقصد? المهم انها من الماضي

 - ضرب نفسه بالقلم و …

قالها  : لا انا مش قادر اصدق ان الكلام ده حقيقي ، انتي أكيد بتهزري مش دي انتي اللي اعرفها و واثق فيها

قالتله : رجعنا للثقة تاااني  !!!

قالها  :  لو ده حقيقي فـ انا بجد هزعل قوي لاني بجد واثق فيكي بشكل ….. و مش قادر أصدق اني لحد اللحظة دي بكدّب اللي بتقوليه ده ، مستحيل يكون حقيقة ، هزعل قوي عليكي و هزعل على سذاجتي ، مش معقول تكوني خدعتيني ، لا لا لا

قالتله : لا حقيقة ، و بعدين خدعتك ليه ? احنا لسه فيها ، لسه معملناش فرح تقدر تنسحب انا لا خدعتك و لا حاجة ، كل الفكرة ان مجاش على بالي

قالها  : انسحب ? هو ماتش كورة ? انتي مالك النهاردة ايه حكايتك ? لولا اني مش بصدق في الخزعبلات كنت قلت ان كائن فضائي بيكلمني دلوقتي

 - ضحكت و …

قالتله : طول عمرك دمك خفيف

 - سكت و مردش عليها …

قالتله  :طب مش عايز نتكلم في الموضوع ? يمكن تلاقيلي مبرر تسامحني بيه

قالها  : مش لما اصدقك الاول !! انتي فاكراني لو كنت مصدقك كنت هفضل قاعد انا و انتي و البحر اللي اتعكنن زيي ده ? ، كنتي هتبقي قاعدة لوحدك بالدبلتين ، كنت هسيبلك الدبلة بتاعتي حتى و مش هاخدها

قالتله : على طول كده ? دا انت ما صدقت بقى !!!

قالها  :  ماهو لو حقيقة  ..و مش ندمانة عليها يبقى همشي طبعا ، ده غير اني اصلا مش مصدق

قالتله : لا صدق بقى علشان نقدر نتكلم

قالها  : انتي ازاي بتقوليها بالبساطة دي ?!!! سبعة !!! مش حاسس ان قاعدة قدامي واحدة حاسة انها غلطت

قالتله : و احس اني غلطت ليه ? مش يمكن ليا عـُذري ?

قالها  : سبعة ?!!!

قالتله : هنتكلم و لا امشي ?

قالها  : مش هقدر اقولك امشي علشان مش مصدقك ، عايزانا نتكلم في ايه ما احنا بنتكلم اهو

قالتله : هحكيلك عنهم يمكن تحس قد ايه هما مميزين زي مانا شايفاهم .. فتعذرني

قالها  : و بتقوليهالي فـ وشي ? انتي لسه حاسة انهم مميزين ?

قالتله : ايوة و عمري ما هغير رأيي

قالها  : ها ها ، ده اكيد هزار طبعا … متجيش ، ممكن مثلا تكوني لسه متعلقة بواحد و لو خيال علمي هنقول اتنين ، لكن سبعة ده مش خيال علمي ده حاجة تفوق الخيال هههههههههه

قالتله : لا لما يكون في حاجة مميزة فـ شخص طالما انت شوفتها هتفضل موجودة مش هتروح و خصوصا لما يكون كل شخص مختلف في الميزة دي عن غيره بس مش معنى كده اني متعلقة بـ سبع اشخاص ده يبقى جنان رسمي

قالها  )بتهكـّم : (طب و انا فيا ايه زيادة بقى علشان تختاريني دونا عنهم كلهم ?

 قالتله : لا احنا مش هنحوّل الحوار لمقارنة

قالها  : انتي مش حاسة انك غلطانة ? و كمان بتمدحي فيهم و بتقوليلي انهم مميزين ? ، طب و انا ? يا ترى هتحكي عني لحد تاسع ? و لا يمكن متلاقيش اصلا حاجة مميزة تقوليها

قالتله : هتسمعني و لا امشي ?

قالها  : هو مفروض مين فينا اللي يمشي ? و بعدين انا بحاول استفزك يمكن تعترفي ان كلامك مش حقيقة مفيش فايدة ، شكلك بتتكلمي جد

قالتله : أومال بهزر ? بص انا ليا عـُذرين في الموضوع ده

قالها  : اتنين ? طب ممكن اسمعهم قبل ما يجيلي السكر و الضغط و السـُل و الطاعون و انا قاعد ? و انتي عارفة الطاعون مـُعدي ، لو خايفة على نفسك بقى

قالتله : هههههههههههه حتى و انت متغاظ دمك خفيف ^_^

قالها  :  ما خلاص مرحلة الغضب انا تخطيتها  ..الا لو عندك مفاجأة تانية  …انجزي علشان لو حصلي حاجة هيبقى فـ رقبتك

قالتله : اول عـُذر زي ما قلتلك هو اني اكلمك عنهم و ازاي كل شخص فيهم دخل حياتي

قالها  : لا معلش نفسيا مش مستعد اسمع الجزئية دي ، التاني ايه ?

 قالتله : بص هو تاني جزء يعتبر حاجة بتحصلنا كلنا ، يعني مفيش حد مش بيغلط ، فكوني غلطت دي حاجة بتعلم منها علشان مكررهاش تاني

قالها  : مش فاهم عايز توضيح

قالتله : يعني سن المراهقة بيبدأ من كام و بينتهي تقريبا امتى ?

قالها  :  و انا مالي بسن المراهقة ? ما كل البشر بيعدوا بيه ? يعني لازم كل البشر يغلطوا نفس الغلطة ?

قالتله : يعني انا بنت و طبيعي في سن المراهقة الواحد بيتعرض لضغوط من كذا نحية فممكن يغلط

قالها  : مش معترض عالنقطة دي مع ان ممكن اي حد يحافظ على نفسه لو هو عايز ، بس في نقطتين ، عارفة لو كانوا واحد او اتنين كانت هتبقى مقبولة مش سبعة ، و تاني حاجة هي اني احس ان اللي قدامي مثلا ندمانة و متدايقة فهحاول اسامح ، لكن اللي شايفه منك و الرقم القياسي ده كمان مش مخللي الواحد اصلا عارف يصدق علشان يبدأ يفكر يسامح !!!

قالتله : ماله الرقم ? على فكرة مش رقم قياسي و لا حاجة ، سن المراهقة بيبدأ تقريبا من ١٢ لحد ١٨ ، يعني لو عديتهم هتلاقيهم بالظبط ٧ ، كل سنة غلطة ، عاااادي

قالها  : يا شيخة ده رئيس الوزرا نفسه مش بيغير عربيته كل سنة ، انتي عايزة تستفزيني ?

قالتله : ده ربنا بيسامح ، انت ليه مش قادر تسامح ?

 قالها  : طب بوصي هنفترض اني مصدقك ، تمام ?

قالتله : هو انت كل ده لسه مصدقتش ? ، عالعموم ماشي اوكي

قالها  : مش بس خدعتيني ، ده انتي مش ندمانة و كمان عايزاني اسامحك ببساطة عادي جدا كإنك أكلتي الآيس كريم بتاعي من ورايا مثلا ، طب حتى حاولي تصالحيني ، ده انتي مفكرتيش تقولي آسفة ، علشان اصلا مش حاسة انك غلطتي

قالتله : خلاص اهو ، آسفة

قالها  : أصرفها فين دي ? ، ما هي سهلة ، ألف .. سين .. فـه .. تـه مربوطة ، لو كنتي حاساها كنتي هتقوليها من نفسك ، عرفتي ليه لو حد مكاني و مصدقك مكنش هيسامح ?

قالتله : على فكرة بقى انت من جواك مصدق ، بس خايف تقول علشان لو طلعت انا بهزر هتبقى ليلتك سودة ، بس متخافش علشان انا قررت اكون صريحة معاك و مش هخبي عليك تاني

قالها  : اهو اهو ، يعني انتي كنتي مخبية !!! وقعتي !!! بس انا مش مصدقك ، انتي نسيتي كلمتك اللي كنتي بتقوليها اول ما اعملك حاجة تفرحك ?

قالتله : هي ايه ?

قالها  : كنتي بتقولي " انا اول مرة في حياتي  …كذا كذا كذا " … مكنتش بتبقى اول مرة فعلا ? و كنتي بتقولي " انت أول واحد  …كذا كذا كذا " … كنتي بتكدبي ? مش مصدق !

قالتله : لا هي كانت بتطلع تلقائية كتعبير عن الفرحة لكن غير مقصود بيها كدب ، زي انك تقول ان الموقف الفلاني اسعد موقف في حياتك رغم ان ممكن يكون في اسعد منه بس انت في اللحظة دي نسيته

قالها  : حرام عليكي قوليلي انك بتهزري بقى !

قالتله : خليني أكمل علشان ابقى برأت ذمتي و قلتلك كل حاجة و مترجعش بعدها تقولي خبيتي عليا ، طالما الموضوع اتفتح و اتعرف يبقى تعرفه كامل ، حتى لو مش هتكمل بعدها معايا و هنلغي معاد الفرح ، انا اهم حاجة عندي ان ضميري يرتاح

قالها  : مكنش واجعك زمان ?

قالتله : الوقت بيقتل الاحساس بالذنب

قالها  : اممممم ، طب ممكن اتشرف بالحضرات ?

قالتله : اول واحد اسمه محمد و انبهرت بيه علشان بيفكرني بوالدي و أخلاقه كانت عالية في التعامل و انا في السن ده كنت متعلقة بوالدي قوي و كان نفسي اتجوز حد شبهه فده كان عذري اني لاقيت في الشخص ده حاجة مميزة خلتني اتعلقت بيه غصب عني

قالها  : و اتعرفتوا ازاي ? و يا ترى خرجتي معاه و لا جه اتقدم على طول ?

قالتله : خللي التفاصيل دي للآخر مش لازم تاخد الصدمة مرة واحدة

قالها  : طب كملي

قالتله : تاني واحد اسمه مصطفى و كانت أحلى حاجة فيه قلبه الطيب و ابتسامته الهادية و حرصه على مصلحتي دايما

قالها  : لا حريص فعلا ما شاء الله

قالتله : لو سمحت ده بالذات متقولش عليه كلمة واحدة

قالها  : الله الله !!! و كمان بتدافعي عنه ، اقوم امشي و ييجي هو احسن ?

قالتله : تالت واحد اسمه يوسف و كان اصغر مني بسنتين و دمه خفيف قوي و دايما يضحكني و لما بكون متدايقة كان بيخرجني برة المود بتاعي و يخليني عايزة اطير من الفرحة ، فرحتي بيه طبعا

قالها  : اومال فرحتك بيا يعني ? ، أكيد بيه ، ربنا يخليكوا لبعض ، كملي

قالتله : آمين ، المهم الرابع ده اسمه حسن و بيحب والدتي قوي قوي و دايما كان بييجي يزورنا في البيت

قالها  : طب الحمد لله والدتك كانت عارفة

قالتله : الخامس ده سنه كان كبير عليا شوية بس قلبه كبير و دافي و كنا بنتجمع عنده كل عيد نقضي اليوم هناك

قالها  : ده انتي و صحابك يعني ?

قالتله : حاجة زي كده

قالها  : اشمعنا ده مقولتيش اسمه ? مش هروح اغتاله متخافيش

قالتله:  دانا اقتلك فيها

قالها  : لا انتي اديني السلاح و انا هموت نفسي مش مستاهلة اتعبك معايا ، اسمه ايييييه ?

قالتله : عبد الله

قالها  : امممم … محمد .. مصطفى .. يوسف .. حسن .. عبد الله ….. مش عارف ليه الأسامي دي مش غريبة عليا

قالتله : جايز يطلعوا كانوا صحابك ، مش عايز تعرف آخر اتنين ?

قالها  : مش واخدة بالك ان الأسامي كلها ناس أعرفها ?

قالتله : و انا مالي ، انا اعرفهم قبل ما انت تعرفهم ، ما روحتش عرفتهم عليك ، و لا و احنا مخطوبين ، ده من قبلها

قالها  : اعترفي .. انتي انكشفتي .. متكابريش بقى خلاص ، عايز افوق من الكابوس ده ارجوكي تصحيني

قالتله : فاكر الكلمة اللي كنت بقولهالك لما كنت بتعملي حاجة تفرحني ?

قالها  : انتي هتعيدي الكلام اللي انا قولته تاني ?

قالتله : المرادي  …انا اول مرة في حياتي أعمل فيك مقلب و افرح فيك قوي كده و اشوفك و انت متغاظ هههههههههههههههههههههههههههه

قالها  : آآآآآآآآآآآآآآه يا جبارة يا قاسية … فعلا كيدكن عظيم بجد ، حرام عليكي يا مفترية ، ليه عملتي كده ? ما كان ممكن نختصر الحوار ده كله في كلمة " لأ "

قالتله : هههههههههههههههههه عارف ليه ?

قالها  : ليييييييييييه ????????

قالتله : علشان بعد كده تحرّم تسأل سؤال عارف اجابته

قالها  : حرّمت خلاص … توووووووبة ، ده انتي هتشوفي أياااااام …….

قالتله : خلاص بقى ميبقاش قلبك اسود

قالها  : لولا اني بحبك كنت قلتلك خلصت ….. بس مقدرش اعيش من غيرها علشان كده مش هقولها ، طب افرضي كنت صدقتك و مشيت و سيبتك ، كنتي هتعملي ايه ?

قالتله : و لا تقدر أصلا ، تقدر ?

قالها : هكدب عليكي لو قلت اقدر :)

قالتله : عارف ?

قالها  : ايه تااااااني ?

قالتله : انت ..  أول  .. واحد!!!

:)

___________________________

مـن وحـــي خيــالــي :)

١٧_١٢_٢٠١١