فرحة العيد :-)

كل سنة و انتم طيبين ^_^
النهاردة الأحد و الساعة عدت 12 فنعتبر دخلنا رسميا في يوم الاتنين
 اللي هو مفترض هيكون أول أيام عيد الفطر المبارك ..

حابة بالمناسبة دي أتكلم عن فرحة العيد و عن معادها ..
العيد يوم الاتنين بس انا المرادي دوقت فرحته يوم السبت ^____^
علشان كده بقول إنه مفترض يوم الاتنين ..
فرحة العيد المرادي جات قبل العيد و جات أكبر من كل فرحة دوقتها في أي عيد قبل كده من ساعة ما وعيت عالدنيا ..
:-' )))
 
الحمد لله ربنا قالنا في كتابه الكريم " .. وتلك الأيام نداولها بين الناس.."  .. صدق الله العظيم ..
بعد ما حصل ان عيد الفطر في 2010 و 2011 عدا عليا بلحظات صعبة و مؤلمة ..
و بعدين عدا عليا عادي في 2012 و 2013 .. وكان ناقصه حاجة مخلياني مش قادرة افرح من قلبي ..
بعد الأعياد دي كلها و السنين دي كلها ..
ربنا عوضني بفرحة كبيرة .. كبيرة قوي .. 
و جات تدابيره الرائعة بأحسن شكل يخلي العيد ده أجمل عيد يعدي عليا الفترة اللي فاتت كلها 
:)))))))

فرحة العيد بالنسبالي يعني إني أدوق طعم العيد حتى لو قبل معاده :-) ..
فرحة العيد يعني أفرح بجد فرحة تخليني مفيش أي حاجة ممكن تدايقني مهما حصل في العيد ده ..
فرحة العيد يعني الحاجة اللي كانت ناقصة تكون موجودة ..
يعني أضحك طول النهار ..
يعني أشرب أخيرا رشفة مية و اقعد في الضل شوية بعد سكة سفر طويلة تحت الشمس تكاد تكون مدتها سنة ..
فرحة العيد يعني زي ما انا حاسة دلوقتي :)))
الحمد لله من قبل و من بعد ^&^
الحمد لله الكريم اللطيف الخبير بينا ..
الحمد لله اللي عطاني هدية العيد اللي خلتني أحس ان في عيد المرادي
:) :) :)

انا فرحانة بالعيد ^&^ ..
و يا رب انتو كمان تكونوا فرحانين :) :) :)
و العيد الجاي تكون الفرحة أكبر و الحلم أقرب يااااااا رب :)))


P.S.
فرحة العيد .. يعني نفس الأرقام تكون تاريخ ليوم أفضل بعد ما كانت تاريخ ليوم نفسي يتمسح من الأحداث ..
#السبت 26_7_2014

كم هو مؤلم!

كم هو مؤلم أن تكتشف واقعاً تتمنى لو أنه من نسج خيالك ..
كم هو مؤلم أن تنتظر لذلك الواقع أن تغيره الأيام ..
و تمضي الأعوام لتكتشف أن لا شيء يتغير ..
بل ربما تزداد الأمور تعقيداً ..
فتنظر لنفسك و قد سرقت حلماً ..
سرقت عن دون قصد حلماً لغيرها ..
لا تدري من يملك الحلم من البداية ..
و لكنك قد تسببت بآلام لأناسٍ مثلك ..
يحلمون بنفس الحلم الذي تحلمه!

و تسأل نفسك .. عن مقدار استعدادها للتضحية بالحلم؟!
فتجدها تخذلك بأنانيتها .. هاربة من الإجابة عن سؤالك ..
فهي لا تملك الإجابة لأنها لا تستطيع الرحيل ..
فالرحيل سيكون مؤلما ..
و الانتظار أيضا مؤلم بينما تشاهد الآخرين يتألمون ..
متظاهرين أمامك بالقوة ..
لا تستطيع مواجهتهم فربما تخسرهم ..
و لكنك تتمنى لو تستطيع التواصل معهم حول هذا الأمر .. 
و هل حينها سوف تجد حلاً .. أم أنك ستكون سببا في زيادة ألمهم ..
و ألمك الناتج عنه !
ربما اعتقادهم بأنك لا تعلم .. يجعلهم قادرين على إبقاءك في حياتهم!

كم هو مؤلم أن تقف حائراً تائهاً متألماً .. لا تدري ما يمكنك فعله؟! :'(
فهل كل هذا من نسج خيالك؟!!

20_7_2014

ليست مجرد حـِـلية ^_^

إنها ليست مجرد حـِـلية عادية من الحـِلى التي أمتلكها ..

كنت قد اشتريتها من صديقة لأختي تصنع الحـِلى .. 

و تصادف وجود ذلك الرمز الذي يعبر عن "شريك الحياة" ..

فأضفت إليها هاتين النجمتين و اعتبرتها بذلك فيها كل ما أحتاج من علامات ..

و بعد مرور ما يقارب عام من الزمن .. و أثناء ارتدائي لها في أحد هذه الأيام ..

كنت اتأملها و خطرت ببالي تلك الفكرة .. 

أن أقوم بمعرفة عدد الكـُرات التي فيها ..

فاكتشفت أنني كل ذلك الوقت لم أدرك وجود الرقم الذي أحب في تلك الحـِلية ..

أحمله معي كلما ارتديتها دون أن أشعر

 ^_^

لتصبح بذلك حـِلية مميزة .. و تنضم إلى إحداهن في قائمة الحـِلى المفضلة

 :-))

عن الكتابة ^&^

قال لها : أفتقد أشياءًا كثيرة .. منها الكتابة

قالت : فلتكتب إذاً

قال : لا أجد الوقت

قالت : و أنا أيضاً أفتقدها بشدة

سألها : الكتابة؟

قالت : لا .. القراءة .. قراءة ما تكتب .. أفتقد كتاباتك التي كنت أنتظرها من وقت لآخر .. صارت تغيب كثيراً و صرت أنتظر طويلاً!

قال : أعذريني

قالت : لماذا تجعلني دائماً أنتظر أن أقرأ لك شيئاً ؟! و عندما أجد أن هناك ما اقرأه و أقبل عليه بلهفة .. أكتشف أنها كلمات قليلة عابرة أو ربما كلمات لأحد غيرك؟ .. لقد تكرر كثيرا ذلك الأمر و أصبحت تختفي طويلا بين المرة و المرة أو تنتهز كتابة الآخرين لتعبر عما بداخلك

قال : و ما المشكلة في ذلك؟ أن أعبر بكلمات غيري؟ و هل الكلمات بكثرتها؟

أجابت : المشكلة أنني أريد تعبيرك أنت و كلماتك أنت .. هل تظنني أفتقد القراءة بذاتها؟ و قد امتلأت أرفف المكتبات بعدد من الكتب لا حصر لها .. و لكنها صارت لا تغنيني عن كتاباتك! .. و بالطبع ليست الكلمات بكثرتها فكلمة منك تعني لي الكثير و لكن أن أقرأ كلمات قليلة بعد انتظار أشبه بأن أبحث عن ماء ثم أجد كوباً لا يمتلئ سوى ببضع قطرات!!

قال : أتقصدين رسائل من أجلك؟

أجابته بسرعة : لا .. أكتب أي شيء .. لا أريد كلمات لأجلي .. أريد إفصاحك عما في داخلك .. بحرية .. كما كنت تفعل سابقاً .. أكتب عن الحياة .. عن الله .. عن طموحاتك .. عن أمنياتك .. عن لحظات سعادتك .. بلدك .. أسرتك .. أي شيء!

قال : و هل تهتمين بما أكتب لهذه الدرجة مهما كان مضمونه؟ هل ستقرأين كل ما أكتب؟

قالت : نعم أهتم .. هل تريد إجابة أكثر صراحة من هذه لتفهم ما أعني؟ :)

قال ممازحا إياها : نعم ^_^

أكملت حديثها متظاهرة بأنها لم تفهم الممازحة : ما تكتب يخرج من داخلك .. فهو جزء منك .. و كل ما يعنيك يعنيني .. بالقراءة أشعر أنني تحدثت معك لبعض الوقت عن شيئا ما في داخلك ... فهمت؟

قال مبتسماً : هل تقدّرين ما أمر به من مصاعب في عملي تمنعني عن الكتابة؟ إذا وجدت الوقت بالطبع ما كنت تأخرت هكذا :)

قالت : بالتأكيد أقدّر .. أقدر كل ما تفعل .. و لكني أريدك أن تمنح الكتابة ساعة من وقتك في نهاية يوم العطلة .. فما رأيك؟ :-))

#عن_الكتابة_أتحدث ^&^

مشهد من المستقبل! =)

كما كانت توقظه للفجر و هما سوياً .. فعندما يسافر توقظه بالهاتف و لا تطمئن حتى تسمع صوت المياه تنساب في وضوءه .. و إذا لم تسمع ذلك الصوت .. أغلقت هاتفها اليوم بأكمله .. أو تركته يتصل بلا رد .. حتى يصالحها في الفجر التالي .. موقظاً إياها للصلاة !
:)

لا يقوم للصلاة لأجل إرضاءها و لا هي أيضاً .. و إنما لأنهما تعاهدا على أن يكون زواجهما بيتاً معموراً بذكر الله و طريقاً يقرّبهما إلى الله أكثر .. و أن كليهما سيعين الآخر على ذلك قدر استطاعته .. و أن كل ما يساعد من مؤونة في رحلة الحياة يجب اتخاذه .. و أن غير ذلك سيعود عليهما بالحزن و الهلاك .. و أن العقاب شيء واجب على المتقاعص منهما حتى لا تتوه السفينة عن الوصول للجنة و حتى لا يصل أحدهما دون الآخر .. و من يتساهل في العقاب فذلك لا يعني إلا شيئاً واحداً .. أنه قد تنازل عن شريك العمر شريكاً في الجنة .. و هنا يكون العقاب جميلاً و مُنتـَظراً ممّن يستحقه .. فإذا غاب العقاب .. نزل على القلب شعورٌ بالحزن و الريبة من سبب غيابه .. لأنه ينتظره دلالةً على الحب و تحفيزاً للتمسك بطريق الله .. و للتذكير عملاً بقوله تعالى "و ذكّر فإن الذكرى تنفع المؤمنين" ..

و كما هو الحال في الصلاة .. فالحال بينهما على نفس النهج في كل شيء آخر في هذه الدنيا .. لتكون كل المؤونة المتبقية معهما عند الوصول من نوع واحد يثقل ميزانيهما .. فلا تبتعد السفينة عن طريقٍ يرضاه الله لهما ..

فطاعة الله أمر واجب تكون فيه النية خالصة لله وحده و من أجل جنة تجمع الأحبة بعد الفراقِ الأول ! :-))

............

https://www.facebook.com/photo.php?fbid=613787785350239&set=a.300108753384812.73789.151329168262772&type=3&src=https%3A%2F%2Ffbcdn-sphotos-h-a.akamaihd.net%2Fhphotos-ak-prn2%2Ft1.0-9%2F1395891_613787785350239_22919820_n.jpg&size=403%2C403

...................

https://m.facebook.com/photo.php?fbid=554942934587143&id=208988529182587&set=a.210301849051255.52940.208988529182587&notif_t=like&ref=m_notif

مشاركة معنوية ^_^

عن صوت بتستناه بالأيام و الشهور

و تسمعه فـجـأة! ^&^

 #تليفون

عن مشاركة معنوية من بعيد

امتى ييجي اليوم و تبقى ... ! :-)

#امتحان

عن حلم بيقرب

و كل ما يقرب بخاف .. يروح! :))

#شعور

إشارة :-)

وقفت أمام الحضور لتـُلقي كلمة .. 

بحثت عن عينيه من بين العيون .. 

لم يكن يعنيها شيءٌ من كل ذلك سوى وجوده .. 

رغم أهمية ما سوف تلقي عليهم من كلمات .. 

و رغم كل التحضير و الإستعدادات لذلك اليوم .. 

كان كل شاغلها الشاغل أن ترى عينيه دون أن يلحظ أيٌ من الحاضرين ذلك .. 

أن ترى عينيه و هو يتابعها باهتمام في حديثها .. 

أرادت أن تطمئن بوجوده .. و جدته .. 

و رغم طول المسافة تلاقت أعينهما و شعر بها تنظر إليه .. 

فأشار بعينيه لها ليمدها بالقوة قاصداً "رائع استمري" .. 

رأت بريق عينيه فابتسم قلبها و اطمأنت نفسها و استطردت في الحديث .. 

ما أسعدها أكثر من وجوده .. 
 ...

هي تلك الإشارة التي ظلت محفورة في خيالها .. لم تنساها أبداً !

^&^

 30_4_2013

عـُـمــق !

الأحداث أو المواقف الحلوة اللي بيكون تأثيرها جواك عميق ..

كل ما تفتكرها بيكون شعورك بنفس العُـمق .. 

لإنها كنت صادقة قوي لما أثرت فيك .. 

و انت كنت صادق في شعورك لما استقبلتها ..

بتنبهر بيها كل مرة زي أول مرة .. و بتحس بنفس رد الفعل ..

بتحمد ربنا قـوي عليها و بتفضل مش مصدق إنها حصلتلك!

 :-)))

عـن تجربة ^&^

مــش زي النــاس !!!

(10)

مــش زي النــاس !!!
_____________

قالها : ممكن اسألك سؤال ؟ .. بس من غير زعل ؟

قالتله : رغم ان الدخلة دي بتقـلـقـني على فكرة ^__^ .. بس ماشي إيه السؤال ؟

قالها : و إيه اللي يقلق بس ؟ .. انا لسه فتحت بـُقي ؟ ^__^

قالتله : عشان انت عارف اني مش بزعل منك .. فطالما قولت كده يبقى حاجة خطيرة

قالها : ههههههههههههه .. لا مانا كل مرة بدخل الدخلة دي .. و لا مبتاخديش بالك ؟

قالتله : مانا كل مرة بقـلـق !

_ ضحك ... و ضحكت

قالها : المهم متهربيش من السؤال .. انتي مبسوطة ؟؟؟

قالتله : يا سلاااام ! .. هو ده السؤال اللي يزعـّـل ؟!!!

قالها : مانا لسه جايلك في الكلام اهو .. جاوبي بس .. مبسوطة ؟

قالتله : آآآه الحمد لله = )

قالها : يعني سعيدة معايا ؟ مش حاسة ان في حاجة نقصاكي ؟

_ ابتسمت و ... قالتله :

مش هرد عالسؤال ده =)

قالها : لأ ردي .. و لا انتي مش عايزة تحرجيني ؟

قالتله : أحرجك ايه !! ما انت عارف إجابة السؤال !

قالها : لأ مش عارف .. هاه ؟ جاوبي !

_ بصتله بشك و ...

قالتله : آآآه قول كده بقى .. انت بتحاول تستدرجني في حوار رومانسي ؟! .. لأ انسى :P

قالها : هههههههههههه .. نفسي تبطلي نظرية المؤامرة دي .. هو انا قولتلك قولي مبسوطة ليه ؟ و لا قولتلك حــِـبي فيا ؟ .. انا عايز إجابة بـ آه أو لأ = )

قالتله : خلاص يبقى لأ

قالها : هو ايه ده اللي لأ

قالتله : لأ مش ناقصني حاجة

_ ابتسم و ... قالها :

يعني مش بتزعلي لما تشوفي أي اتنين مخطوبين ؟ و تحسي اننا مش زي باقيت الناس ؟

قالتله : ما احنا برضه مخطوبين و في زينا كتير قوي على فكرة .. بــُص .. ادخل دوغري في الموضوع علشان شكلك انت كده اللي زعلان و متدايق من الموضوع ده !!

قالها : بصراحة .. انا خايف تكوني انتي اللي بتزعلي و بتحسي ان ناقصك حاجة .. كل ما تشوفي اتنين مخطوبين و مأنكجين أو ماسكين ايدين بعض .. او كل ما تسمعي ان فلانة راحت مع خطيبها السينما .. او مثلا كل ما واحدة تحكيلك على الكلام الحلو اللي قاله خطيبها .. حاجات كتير مش موجودة فـ حياتنا .. و كنت عايز افكرك باتفاقـنا لو كنتي ناسياه .. علشان متبقيش متدايقة !

_ ابتسمت ابتسامة طمأنينة .. و بصت في الأرض

قالها : مش هتعلقي ؟!

قالتله ( بتنهيدة ) : الحمد لله !

قالها : هو ده التعليق ؟ طب فهميني

قالتله : انا كنت خايفة تكون انت اللي زعلان .. و مش سعيد و ناقصك حاجة أو صبرك خلص .. و نسيت كلامنا عن بركة ربنا .. بس كلامك طمني الحمد لله = )

قالها : يعني انتي لسه على اتفاقنا ؟

قالتله : أكيد طبعًااا .. الاتفاق ده أصلا احنا بانيين عليه حياتنا ..  ده اللي هيضمنلنا السعادة في المستقبل .. و انا سعيدة جداً بخطوبتنا كده .. بالطريقة دي .. هي دي الطريقة الصح و مش ناقصني أي حاجة !

ابتسم في اطمئنان و ... قال :

الحمد لله ! = )

قالتله : و بعدين احنا حياتنا مش هتقف عند الخطوبة .. بالعكس دي كده لسه مبدأتش

قالها : ده رأيي بالظبط

قالتله : طب ايه اللي خلاك تسأل السؤال ده ؟

قالها : لسببين .. اول واحد اني كنت خايف تكوني زعلانة

قالتله : و ايه اللي خلاك تحس كده ؟

قالها : علشان كل ما كنا بنصادف في طريقنا اتنين مخطوبين بالطريقة التانية .. كنتي بتبـُصيلي

قالتله : كنت ببصلك علشان اشوف رد فعلك ، فآلاقيك باصصلي

قالها : و انا كمان ههههههههههههههه

قالتله : سبحان الله و محدش فينا كان بينطق :D

قالها : كنت بقول جوايا الحمد لله ان ربنا رزقني واحدة زيك .. حاسباها صح !

قالتله : طب و السبب التاني ؟

قالها : علشان عايز النهاردة اختار معاكي معاد كتب كتابنا .. فقولت نأكد الأول عالمبدأ اللي كنا متفقين عليه مع بعض .. و نتفق ازاي عايزين فترة كتب الكتاب تمر علينا = )

قالتله : فاكر أصلاً الاتفاق بتاع الخطوبة حصل ازاي ؟

قالها : آآه فاكر

قالتله ( بغلاسة ) : فكرة مييييييين دي ؟!

قالها : خلاص بقى انتي هتذلينا و لا ايه ^__^

قالتله : ههههههههههه عارف أحلى حاجة في الفكرة كانت ايه ؟

قالها : اننا تقريبا قولنا نفس الكلام و الأفكار من غير ما نتفق و من غير ما حد فينا يغشش التاني

قالتله : طب ما تيجي نكررها .. بس المرادي على فترة كتب الكتاب

قالها : خلاص ماشي .. طلعي ورقة و قلم يلا و اكتبي

قالتله : طب عينيك في ورقتك بقى و الغش ممنوع

قالها : هههههههههه قدامك خمس دقايق بالظبط و هسحب الورقة

_ مسكت الورقة و كتبت كلمة واحدة بس و ...

قالتله : خلصت !!!

قالها : نعم ياختي ؟ ^__^ لأ متستهبليش .. اكتبي حاجة بجد

قالتله : كتبت حاجة بجد

قالها : كام كلمة ؟

قالتله : واحدة

قالها : لاااااااااااااااا .. الكلام ده مش هينفع :D

قالتله : انت عارف الأول هي ايه علشان تعترض ؟

قالها : ايوة عارف و فاهمك كويس .. متبقيش مفترية حرام عليكي .. دي فترة جديدة لازم يبقى في اختلاف

قالتله : مليش دعوة

قالها : فــ حدود المعقول يا ستي .. انا مش طمــّـاع و هرضى بالقـليل

قالتله : اديني أمثلة طيب

قالها : مثلاً .. اديني مساحة شوية في الكلام .. آخد راحتي شوية

قالتله : مساحة قد إيه ؟ كام فـ كام ؟ ههههههههههه

قالها ( بغيظ ) : اندهيلي طنط علشان انا اتضحك عليااااا فـ الجوازة دي

قالتله : مين ضحك عليك ؟ قالولك ايه ؟

قالها : انتي ضحكتي عليا .. كنت فاكرك طيبة مش مفتررررية .. اندهيلي طنط بدل ما ادخلها بنفسي

قالتله : هتعمل ايه ان شاء الله ؟!

قالها : هحكــّـمها ما بيننا و هي تقول بقى رأيها ايه

قالتله ( بغلاسة ) : شوفت ؟! .. مع أول خلاف حصل ما بيننا دخــّـلت  طرف تالت على طول .. بانت بانت !

قالها : ماهو انتي مفترية .. و انا محتاج حد ينقـذني و يلحقـني قبل ما اموت فـ ايدك .. اعمل ايه ؟!

قالتله : ههههههههههه .. طب في ايه تاني ؟ و في الآخر هنتفاهم

قالها : في تفاصيل كتيرة لازم نتفق عليها .. بس كنت عايز الاتفاق يكون زي ما اتعمل المرة اللي فاتت بنفس الطريقة

قالتله : ما احنا عملنا كده و النتيجة معجبتكش

قالها : علشان انتي عارفة انها مش منطقية .. خليكي طيبة بقى ^__^

قالتله : طب غششني

قالها : انتي كنتي كاتبة كلمة ايه بالظبط ؟

قالتله : Same !

قالها : خلاص .. سيبيها زي ما هي و زودي عليها كام نقطة كده استثناءات .. ما احنا برضه مش هنبعد كتير

قالتله : طب و ليه نغيـّـر ؟ خلينا زي ما احنا

قالها : علشان تاخدي عليا شوية

قالتله : مانا واخدة عليك اهو .. انت فاكرني بكلم أي حد كده ؟ ^__^

قالها ( بغلاسة ) : ايه .. بتكلمي باقيت الناس ازاي ؟ بالهندي و لا بالايطالي ؟

قالتله : ايوووووه عالغلاسة .. طب تصدق ؟ انا كنت هـغـّـير في الاتفاق بس بعد الكلمة دي خلاص فرصتك راحت :P

قالها : خلاص خلاص آسف يا ستي .. هاه ؟

قالتله : انت بجد مش شايف اننا واخدين على بعض ؟

قالها : واخدين ايه بس .. ده انا المرة اللي بغلط فيها غصب عني و اقولك حاجة .. وشك بيقلب ألوان الطيف السبعة .. اومال لو مسكت ايدك هتعملي ايه ؟ هتضربيني بالقلم ؟! .. و لا يمكن تطلبيلي بوليس الآداب !

_ ضحكت

كمل و قال : فاكرة الأسبوع اللي فات ؟ لما قولت كلمة واحدة بس و طبعـًا مش هينفع أكررها تاني .. بس انتي عارفة قصدي على انهي مرة .. و بعدها قاطعتيني يومين كاملين .. مرضيتيش تكلميني !

قالتله : علشان كسرت الاتفاق

قالها : كان غضب عني و الله .. طلعت غصب عني .. علشان كده دلوقتي عايز شوية مساحة !

قالتله : طيب موافقة بس بشرط !!! .. لو حسيت انك زودتها في الكلام .. هيبقى في عقاب صارم .. و هنرجع زي الأول .. مترجعش تزعل بقى !

_ نفخ و طلع صوت يدل عالزمجرة و .. قال (ببرطمة) :

نتحاسب بعدين .. ده انتي هتشوفي أيام !

قالتله : في اعتراض و لا حاجة ؟

قالها (بغيظ) : لا أبدا و انا اقدر افتح بــُقي ؟

قالتله : آآه بحسب .. يعني اتفقنا ؟

قالها : طبعا .. نكمل ؟

قالتله : نكمل ايه ؟ .. خلاص كده !

_ قام وقف و قالها بلهجة تهديد :

طب بعد اذنك بقى انا داخل لطنط جوة .. و لا ليه صحيح .. عمي فين ؟ هروحله هو دوغري .. أكيد هينصفني !

ردت (بسرعة) : قومت ليه بس ؟ الكلام أخد و عـطا !

قالها : أخد و عطا .. مش ذل و مهانة !

قالتله : ههههههههههههههه خلاص معلش .. اقعد ما تزعلش :)

قالها : ادينا قعدنا .. بس المرة الجاية لو قومت مش هقعد تاني

قالتله : يعني بلاش اهزر ؟

قالها : يا ستي هزري زي ما انتي عايزة بس خلينا نخلص الورقة الأول ^_^ .. المصيبة اني فاهمك و عارف لو عقلتي هتكتبي نفس الكلام في ورقتك علشان احنا بنفكر زي بعض .. خليكي طيبة بقى :)

 _ ابتسمت و قالتله :

حاضر =)

_ قعدوا يكتبوا و بعد شوية

قالها : خلصتي ؟

قالتله : خلصت

قالها : بجد المرادي ؟!

قالتله : بجد و الله انا كنت بغلس بس

قالها : طب يلا امضي عالاتفاق و انا همضي .. و الورقتين المرادي هيبقوا معايا انا .. مش انتي خدتي بتوع الخطوبة ؟

قالتله : لأ انا اللي هاخدهم

قالها : لا لا لا .. مش مطمنلك مليش دعوة .. و دلوقتي بقى امضي عالاعتراف ده .. انك مش هتتراجعي عن الاتفاق مهما حصل

قالتله (بغيظ) : مش بيفوتك حاجة

_ مضت و طبق الورق و حطه في جيبه

قالها : تمام ؟

قالتله : تمام =)

_ بصلها بصة انتقام و قالها :

في حااااجة نفسي اقولهالك من ساعة ما جيت النهاردة

قالتله : اوعى تكون نفس الكلمة اياها .. انا بحذرك !

قالها : هتعملي ايه يعني ؟ انتي خلاص مضيتي عالاتفاق :P

قالتله : بس احنا لسه مكتبناش كتابنا

قالها : لأ .. كتبنا !

قالتله : نعم ؟!!!!!!

رد بسرعة : وحــشــتــيــنــي  ! =)

♥

 __________________________

من وحي خيالي
ديسمبر 2012

إختلاف !

لما سرحت امبارح في حالي دلوقتي و افتكرت حالي زمان .. حمدت ربنا قوي قوي :)))

...

في نفس الأيام دي .. في 2012 .. كنت بمر بأصعب أيام حياتي ..

كانت أيام صعبة قوي بدأت من شهر سبتمبر 2011 و فضلت مستمرة السنة اللي بعدها مدة طويلة ..

لا كنت فاهمة انا بعمل إيه و لا هعمل إيه ..

و رغم إني كنت عارفة انا عايزة ايه و ايه اللي هيسعدني .. كنت بكابر و بتحدى نفسي و بحاربها ..

منه يأس و استسلام و احباط .. بالإضافة لشعور الخوف من إني أعشم نفسي قوي و اتصدم في الآخر من النتيجة ..

و كنت خايفة ده يحصل مع غيري برضه .. و اني أكون سبب في جرح ليهم بشكل غير مباشر ..

ده نتج عنه سلبية صادرة مني طول الوقت و تناقض غريب و تصرفات أغرب ..

لدرجة إني ممكن في الوقت اللي فاكرة نفسي بعمل حاجة في مصلحة الناس اللي تهمني في الدنيا دي كلها .. كنت في الحقيقة بسببلهم ألم و ضيق ..

كنت بتألم و بتظاهر بالقوة قدام كل الناس .. جوايا صراعات مستمرة و مش بتكلم مع حد ..

و أوقات كنت بعيط قبل ما انام بيني و بين نفسي .. كل الناس حواليا كانوا فاكريني مستقرة داخلياً .. و أيامي ماشية تمام قوي ..

و فضلت عالحال ده .. مش قادرة افضفض .. و الناس اللي محتاجة افضفضلهم أكتر من أي حد هما أكتر حد مينفعش افضفضله ساعتها :-(
و لما كانت تضيق بيا قوي كنت بكتب حاجات مش مفهومة أو غامضة .. يمكن يفهموني ..
كنت بكلم نفسي و ارد عليا .. اوقات اقول خلاص تمام انا كويسة و اوقات اكتشف اني بضحك على نفسي ..
كنت بضيع لحظات كتير حلوة مش عارفة استمتع بيها .. لحظات دلوقتي بستناها بالشهور .. في اللحظات دي كنت ببقى فرحانة بس مينفعش يبان عليا .. و كنت ببقى زعلانة علشان انا فرحانة .. لاني عارفة انها فرحة مؤقتة مش هتستمر .. لإن اللحظة مسيرها تنتهي و الاقي نفسي لوحدي تاني !!

و كنت بخاف أواجه الناس اللي حواليا باللي بيدور جوايا لإني كنت حاسة ان محدش هيفهمني و يحس بيا و يدعمني .. و مكنتش مستعدة أواجه نقد .. كان اللي فيا مكفيني ..

لو قعدت أوصف في حالي ساعتها مش هخلص .. فكفاية لحد كده :)))
...

لكن حصل معايا لحظة اختلاف و صدق مع نفسي .. كانت مسيرها تحصل لانها لو مكنتش حصلت مش عارفة كان ممكن يحصلي إيه من كتر التفكير و الكتمان و الضغط على نفسي في انها تتخلى عن أسباب سعادتها ..
لما حصلت اللحظة دي .. بعدها كان سهل عليا قوي إني أتغير 180 درجة .. بقيت متفائلة بشكل غير عادي .. بقيت حاسة اني كده في مكاني الصح و الطبيعي .. و ان ده كان مفروض يحصل من زمان .. ازاي اتأخرت كل ده .. و أذيت نفسي و أذيت غيري كل ده؟!
التأخير مكنش له علاقة بصدقي اتجاه مصدر سعادتي .. و لا باقتناعي ان الحاجة دي مصدر سعادتي .. و لا برغبتي فيها ..
لكن كان ضعف مني و سلبية أكيد ليها حكمة من ربنا ..
قعدت افكر الحكمة ممكن تكون ايه .. وصلت لنتايج كتير و احتمالات كتير .. بعدها مشغلتش بالي بإيه الحكمة لإن دي عند ربنا .. المهم إني أؤمن من جوايا إنه معانا بيدبرلنا أمور حياتنا بشكل عمرنا ما بنقدر نتخيله :-)

دلوقتي ببص لحالي و انا كل يوم بدعي ربنا و جوايا يقين و تفاؤل و حسن ظن و إيمان بإن حلمي هيتحقق .. و قبل كده كنت بدعي نفس الدعوة بس الروح كانت مختلفة ..

دلوقتي انا عارفة الاتنين .. عارفة انا عايزة ايه و بعمل ايه ..

مفيش حاجة ممكن تهزني أو تحبطني زي زمان ..

Can nothing bring me down ^_^ 

مش قادرة اوصف الاختلاف بالظبط .. يمكن كل حاجة متغيرتش عن الأول .. لإن مفيش حاجة قبل كده كانت مفروض تتغير غير حاجة واحدة ..
درجة التفاؤل جوايا ! :)))

لما خدت القرار ده و حصل الاختلاف الحقيقي معايا .. واجهت كل الناس من غير خوف أو قلق .. في اللي اتصدم لإنه مكنش متخيل إن كل ده بيدور جوايا .. و في اللي كان طول الوقت حاسس ..

بس الغريب إني ملاقتش رد الفعل اللي كنت خايفة منه :)

دلوقتي بقيت بحاول قدر الإمكان أعوض الناس اللي أذيتهم زمان بدون قصد .. بحاول أديهم أقل حاجة يستاهلوها .. ناس عارفة إني لو عملت المستحيل مش هوفيهم حقهم .. و بدعي ربنا إنهم يغفرولي و إنه يساعدني أسامح نفسي!

و بدعي ربنا يديني الفرصة لإسعادهم :-)

دلوقتي بقيت بعيش بالأمل ..

دلوقتي برضه الأيام مش سهلة .. بس كل ما هنالك بعض الصبر :)
"و سيجزي الله الصابرين"
^&^
 

الحمد لله من قبل و من بعد ..

الحمد لله إنه رزقني ناس في طريقي ساعدوني و متخلوش عني و صبروا عليا ..
الحمد لله إنه رزقني ناس هما مصدر سعادتي و بتمنى من ربنا إني أكون مصدر سعادتهم دايماً ..
الحمد لله إنه رزقني التفاؤل و الايمان و اليقين بإن الأحلام مش مستحيلة مهما كانت كبيرة!!!
الحمد لله إنه خلاني طلعت من المرحلة دي و مطولتش فيها عن كده علشان مأذيهومش أكتر من كده!
الحمد لله إنه ساعدني أوصل لنفسي في الآخر .. و احس بالاستقرار! :-)

الحمد لله :)

7 مارس 2014

حــلـــم !!!

 من فترة كنت منزلة أبليكاشن على موبايلي الجديد اسمها "SwiftKey" ..

ده عبارة عن كيبورد متطور جدا و تحفة بس للأسف مش مجاني و له فترة تجربة بتنتهي ..

المهم ان من خواص الكيبورد إنه بيعمل "keyboard predictions" للكلمات اللي ممكن تكون على بال اللي بيكتب بناءًا على الحروف اللي بيكتبها ولو كلمة من الكلمات اللي هو توقعها عجبتك بتختارها تكمل بيها الجملة بدل ما تفضل تكتب حرف حرف .. و من ضمن التوقعات اللي هو بيعملها بيحط الكلمات اللي انت استخدمتها كتير قبل كده حتى لو كانت أسامي فكان بيريحني قوي الحقيقة :))

 و كان بيتوقع 3 كلمات جمب بعض تختار منهم ..

...

المهم .. حصل مع الأبليكاشن دي موقف غريب من فترة مقدرتش أعديه بسهولة و كان لازم اكتب عنه ملحوظة و أسجله بالسكرين شوت ^&^ 

 

 مرة لاقيت جملة حد اعرفه كاتبها عالنت كانت ..

"Let the note say hello to SwiftKey ;-)"

بعدها بمدة فهمت إن ده شعار الأبليكاشن عالنت لما دورت في جوجل على نفس الجملة ..

بس ساعتها لما قريتها قولت يا ترى إيه السبب من الجملة دي .. هل قصدهم إني أنزل الأبليكيشن دي عالنوت بتاعي ؟! طب و اشمعنى ساعتها؟ مانا منزلاها فعلاً .. ظهرتلي ليه دلوقتي ؟! مكتوبة ليه؟!

فكنت هكتب جملة أسجل بيها لحظة التساؤل دي على أكونت تويتر بتاعي و بدأت اكتب " بس يا ترى ايه السبب ... "

 و بعدين فجأة دماغي جابت فكرة .. يمكن قصدهم أكتب كلمة "hello" باستخدام نوع الكيبورد ده؟ و ساعتها في رسالة هتوصلني يمكن؟! :-)

معرفش جات في بالي ليه الفكرة بس حسيت ان ممكن ده المطلوب :D :D

فمن غير ما امسح اللي كتبته .. نقلت الكيبورد انجليزي و بدأت اكتب الكلمة .. و اتفاجئت من النتيجة !!!

^__^

قولت دي أكيد صدفة .. جربت امسح الكلام و ابدأ من الأول .. من غير كلام عربي .. مكنش بيطلع حاجة مميزة .. لكن لما كنت بكتب كلمة "hello" في نص جملة مش في أول الجملة كانت كل مرة بتطلع نفس النتيجة ..

جربت اقلب الكيبورد فرنساوي .. لاقيت النتيجة هي هي رغم ان الكيبورد بيتوقع الكلمات باللغة الفرنسة ..

كان بيتوقع كلمة "he" .. و ده مش غريب لان دول أول حرفين من كلمة "hello" .. فلما كنت بكتب h و بعدها e كان بيتوقع he .. بس الغريب كان في الكلمتين اللي جمبها .. لان ملهومش اساس يختارهم علشانه .. و ملهومش اي علاقة بالجملة .. ده غير ان اصلا انا بكمل على جملة عربي .. فلو كان ذكي جدا كان ممكن لو كاتبة جملة انجليزي يتوقع على اساسها كمالة الجملة .. لكن انا كنت بكتب بالعربي و مش فاكرة اني استخدمت الكلمة اللي هو متوقعها دي قبل كده كتير للدرجة اللي تخليه يتوقعها من قبل حتى ما أدوس على زرار ال"space" !!!

و بعدها كررت الموضوع و بدأت آخد السكرين شوت بتاعي لزوم تسجيل اللحظة :)

...

الكلمة كانت believes .. 

he believes ! :-)

ساعتها ضحكت و قولت لنفسي و هي كمان

also she believes :-))

كملت حرف ال"l" لاقيته طبعا شال he بس كلمة believes فضلت موجودة :))))))

... 
و ده اللي دفعني ساعتها إني اكتب ..
.. he believes.. ? :-) #keyboard_predictions? :-)
...

الله أعلم حد غيري خد باله من الموضوع ده و لا لأ .. و الله أعلم ساعتها الجملة كانت مكتوبة ليه .. بس المهم .. ان الموقف ده حصل بالاشتراك ما بين طرفين حتى لو واحد فيهم مكنش قصده ^&^

.....

I believe :)))

We believe 

:-)

...

يا رب حقق لنا أحلاماً باتت تحدثنا في صحونا و نومنا ..في جدنا و هزلنا ..في هنائنا و شقائنا ..أحلامٌ صارت جزئاً منا لا يتجزّأ عنا ..أحلامٌ باتت تصيح بنا من داخلنا لتصبح واقعنا..ظناً منها أننا قد أجّلناها بمحض إرادتنا و هي لا تعلم كم ندعو لها كل يوم لتتحقق .. أحلامٌ ليست مستحيلة .. فلا يوجد مستحيل و أنت ربنا .. و أنت الكريم القدير عليها .. الرؤوف الرحيم بنا

فدبّر لنا تحقيقها برحمتك التي وسعت كل شيء.. و بحكمتك و علمك الذي أكرمتنا بجزءٍ منه.. و بقدرتك يا عظيم يا مالك الملك.. دبّر لنا فإنا لا نحسن التدبير ..يا ربنا يا الله!

:-) 

Technology to the power 3 ^_^

اخترت النهاردة علشان اتكلم عن 3 حاجات ^&^

كلهم ليهم علاقة بالتكنولوجيا .. اللي وصلت لمراحل متطورة غاية في الروعة

سبحان الله الخالق .. اللي علمنا نوصل لكل ده ! :)

و كل ده جزء من علمه فقط .. جزء ضئيل =))

...

1_ Samsung Galaxy Note II

الحمد لله بعد فترة لا بأس بها من الانتظار و التحويش .. و لإن التحويش أصعب حاجة عندنا احنا البنات فالموضوع أخد وقت  :D :D

جيبت موبايل نوت 2 و ده تاني موبايل خاص أجيبه و أول موبايل أندرويد

و هنا سحر التكنولوجيا تلاقيه بيتلخص في كلمة Android ! 

نظام و سيستم مش عارفة اللي عمله فكر فيه إزاي و الدليل على روعته إنه نجح نجاح رهيب على مستوى الشركات و على مستوى الأفراد المستخدمين و بقى يعتبر حاجة أساسية مفروض تكون موجودة عند كل واحد ^__^

فرحتي بالموبايل مكنتش لمجرد إني جيبته أخيرا و لا لإنه كان أندرويد ..

لكن فرحتي بيه كانت سرها في التاريخ اللي جبته و بدأت استخدمه فيه و لإنه اتظبط معايا عالتاريخ ده ^_^

و فرحتي بيه قيمتها زادت جدا لما الناس باركولي عليه و حسيت بإني شاركتهم فرحتي 

:-) :-) :-)

 نزلت أبليكاشنز عليه بس مش كتير قوي لسه .. و ميزته إنه أي أبليكاشن على جهاز الكمبيوتر حتى لو متتخيلش تبقى عالموبايل .. تلاقي منها version معمول مخصوص للأندرويد ,, فتحس بنجاحه لما تلاقي كل البرامج عملت أبليكاشن مخصوص ليه يشتغل على أجهزته ..

من البرامج اللي أبهرتني لما عرفتها و أبهرتني أكتر لما لاقيتها تنفع عالموبايل .. برنامج إسمه

team viewer

 و ازاي ممكن من على موبايلك تدخل على كمبيوتر حد تاني و تحرك انت الماوس و تتعامل مع الملفات ^_^

و في انتظار الأبليكاشن المقترحة منكم و ماليني شعور بالفضول :)))

...

2_ الحاجة دي معرفش لسه عنوانها .. أو اسم البرنامج اللي بينفذها ..

بس تخيلوا توصل التكنولوجيا إن أي فلاشة أو ميموري كارد أو هارديسك .. كانت عليه داتا اتمسحت في أي وقت ممكن ترجع؟!

حتى لو كانت معمولة Shift+delete ^_^

تخيلوا ده ممكن ينفعنا إزاي على المستوى الشخصي و على مستوى أكبر تبع سندات شركة أو في التحقيقات و الجرائم و إن بعد كده مشهد إن واحد بيمسح سندات تدينه مبقاش له لازمة في المسلسلات :D :D

انا سمعت عنه كتير بس متخيلتش يكون وصل عندنا .. فحصلت معايا مشكلة من فترة إن ميموري كارد تبع الموبايل القديم دخل عليها فيروس و مسح كل الصور و الفيديوهات .. زعلت جدا لان كان عليها صور و ذكريات مهمة .. و بعدين قولت أجرب حظي فروحت محل موبايلات في مول زهران واحدة قالتلي عليه .. و سألت عالموضوع ده و لاقيت مهندس بيعمل الموضوع ده و التكلفة 60 جنيه فقط لا غير ^__^

كان شعور رائع و انا بشوف صور كانت من كام يوم بفتكرها على إنها ذهبت بلا عودة :)))

...

3_ Lasic Operation

دي طبعا مش محتاجة اتكلم عنها كتير .. نعمة من ربنا خلتنا وصلنا لاستخدام الليزر في حاجات كتير من ضمنها تصحيح الإبصار ..

فاكرة إني خدت قرار أعملها من السنة اللي فاتت ^__^

و انشغلت و جه الصيف فقولت هستنى للشتا علشان اتقالي إنه أفضل في الشتا :-)

و جه الشتا تاني و مليش حجة :D

فكرت في تاريخ أعملها فيه و اخترت يوم 13_2_2014

بس قولت هشوف هيوافق يوم ايه في الاسبوع علشان لازم يكون آخر الاسبوع و يكون عندي أجازة علشان عيني تستريح من الشغل و يشاء القدر إن يطلع يوم 13_2 ده يوم خميس ^_^

يبقى كده تمام .. و تم تثبيت التاريخ ده بإذن الله على أن يتم الحجز من قبلها و اختيار اليوم ده قبل ما حد تاني ياخده :D :D

نرجو تكثيف الدعوات قبل اليوم ده و سيتم التنويه عن أي تعديلات في التاريخ لو حصلت بإذن الله ^_*

الحــمــد لله :))))))))))

بداية جديدة ^&^

بـــســـم الله ..

ياااااااااااااه

:D :D

بقالي كتير قوووووي مكتبتش حاجة هنا

:-)

رغم إنها كانت حاجة اختيارية بس في نفس الوقت كنت حاساها إجبارية أو انا حكمت على نفسي بيها

نوع من التحكم في النفس اللي يمكن بيبوظ أوقات كتير ..

و نوع من تحدي الصبر اللي نجح هنا آه بس فشل كتير في حاجات تانية ^_^

.

.

.

و الحمد لله السنة عدت بسرعة قوي .. فاكرة نفسي كويس يوم 7_1_2013 و انا لسه في بداية السنة .. و كنت زعلانة قوي بس فرحانة في نفس الوقت .. كان شعور مختلط و غريب :))

و قلت يا ترى السنة دي هتعدي علينا ازاي ! و بأنهي شكل؟! .. بس الحمد لله ربنا بيلطف و خلاها معقولة _على الصعيد الشخصي بغض النظر عن الأحداث_ و فيها أوقات حلوة و أوقات صعبة .. أوقات صبر كتيرة و أوقات تفريغ شوية صبر .. و يا رب صبرنا كلنا يكون محسوب علينا صبر

 :-))

دلوقتي بداية جديدة .. من جديد .. و سنة جديدة ^&^

عايزين نراقب نفسنا أكتر و نراجع نفسنا أكتر و نصبر أكتر ..

#يا_رب_قوّينا

و متفائلة بالخير اللي ربنا وعدني بيه لما بتقيه و بصبر على رزقي و باخد بالأسباب في سكتي .. لإن هو الرزاق الكريم .. اللطيف الخبير .. الرحمن الرحيم! :)

و عندي أمل ربنا يغفرلنا أي تقصير أو قلة صبر أو استعجال رزق .. و إنها متأثرش على البركة في حياتنا اللي جاية .. يااا رب!

و منتظرة من ربنا أحداث مختلفة السنة دي .. و خطوات إيجابية تقرب أحلامنا أكتر مننا .. لحد ما ييجي يوماً ما!

و مش هتنازل عن التفاؤل اللي بدأت بيه السنة اللي فاتت ..

What Ever it takes !

^&^

كل سنة و انتم بخير و صحة و سعادة دائمين يا رب ! :)))