إشارة :-)

وقفت أمام الحضور لتـُلقي كلمة .. 

بحثت عن عينيه من بين العيون .. 

لم يكن يعنيها شيءٌ من كل ذلك سوى وجوده .. 

رغم أهمية ما سوف تلقي عليهم من كلمات .. 

و رغم كل التحضير و الإستعدادات لذلك اليوم .. 

كان كل شاغلها الشاغل أن ترى عينيه دون أن يلحظ أيٌ من الحاضرين ذلك .. 

أن ترى عينيه و هو يتابعها باهتمام في حديثها .. 

أرادت أن تطمئن بوجوده .. و جدته .. 

و رغم طول المسافة تلاقت أعينهما و شعر بها تنظر إليه .. 

فأشار بعينيه لها ليمدها بالقوة قاصداً "رائع استمري" .. 

رأت بريق عينيه فابتسم قلبها و اطمأنت نفسها و استطردت في الحديث .. 

ما أسعدها أكثر من وجوده .. 
 ...

هي تلك الإشارة التي ظلت محفورة في خيالها .. لم تنساها أبداً !

^&^

 30_4_2013

عـُـمــق !

الأحداث أو المواقف الحلوة اللي بيكون تأثيرها جواك عميق ..

كل ما تفتكرها بيكون شعورك بنفس العُـمق .. 

لإنها كنت صادقة قوي لما أثرت فيك .. 

و انت كنت صادق في شعورك لما استقبلتها ..

بتنبهر بيها كل مرة زي أول مرة .. و بتحس بنفس رد الفعل ..

بتحمد ربنا قـوي عليها و بتفضل مش مصدق إنها حصلتلك!

 :-)))

عـن تجربة ^&^

مــش زي النــاس !!!

(10)

مــش زي النــاس !!!
_____________

قالها : ممكن اسألك سؤال ؟ .. بس من غير زعل ؟

قالتله : رغم ان الدخلة دي بتقـلـقـني على فكرة ^__^ .. بس ماشي إيه السؤال ؟

قالها : و إيه اللي يقلق بس ؟ .. انا لسه فتحت بـُقي ؟ ^__^

قالتله : عشان انت عارف اني مش بزعل منك .. فطالما قولت كده يبقى حاجة خطيرة

قالها : ههههههههههههه .. لا مانا كل مرة بدخل الدخلة دي .. و لا مبتاخديش بالك ؟

قالتله : مانا كل مرة بقـلـق !

_ ضحك ... و ضحكت

قالها : المهم متهربيش من السؤال .. انتي مبسوطة ؟؟؟

قالتله : يا سلاااام ! .. هو ده السؤال اللي يزعـّـل ؟!!!

قالها : مانا لسه جايلك في الكلام اهو .. جاوبي بس .. مبسوطة ؟

قالتله : آآآه الحمد لله = )

قالها : يعني سعيدة معايا ؟ مش حاسة ان في حاجة نقصاكي ؟

_ ابتسمت و ... قالتله :

مش هرد عالسؤال ده =)

قالها : لأ ردي .. و لا انتي مش عايزة تحرجيني ؟

قالتله : أحرجك ايه !! ما انت عارف إجابة السؤال !

قالها : لأ مش عارف .. هاه ؟ جاوبي !

_ بصتله بشك و ...

قالتله : آآآه قول كده بقى .. انت بتحاول تستدرجني في حوار رومانسي ؟! .. لأ انسى :P

قالها : هههههههههههه .. نفسي تبطلي نظرية المؤامرة دي .. هو انا قولتلك قولي مبسوطة ليه ؟ و لا قولتلك حــِـبي فيا ؟ .. انا عايز إجابة بـ آه أو لأ = )

قالتله : خلاص يبقى لأ

قالها : هو ايه ده اللي لأ

قالتله : لأ مش ناقصني حاجة

_ ابتسم و ... قالها :

يعني مش بتزعلي لما تشوفي أي اتنين مخطوبين ؟ و تحسي اننا مش زي باقيت الناس ؟

قالتله : ما احنا برضه مخطوبين و في زينا كتير قوي على فكرة .. بــُص .. ادخل دوغري في الموضوع علشان شكلك انت كده اللي زعلان و متدايق من الموضوع ده !!

قالها : بصراحة .. انا خايف تكوني انتي اللي بتزعلي و بتحسي ان ناقصك حاجة .. كل ما تشوفي اتنين مخطوبين و مأنكجين أو ماسكين ايدين بعض .. او كل ما تسمعي ان فلانة راحت مع خطيبها السينما .. او مثلا كل ما واحدة تحكيلك على الكلام الحلو اللي قاله خطيبها .. حاجات كتير مش موجودة فـ حياتنا .. و كنت عايز افكرك باتفاقـنا لو كنتي ناسياه .. علشان متبقيش متدايقة !

_ ابتسمت ابتسامة طمأنينة .. و بصت في الأرض

قالها : مش هتعلقي ؟!

قالتله ( بتنهيدة ) : الحمد لله !

قالها : هو ده التعليق ؟ طب فهميني

قالتله : انا كنت خايفة تكون انت اللي زعلان .. و مش سعيد و ناقصك حاجة أو صبرك خلص .. و نسيت كلامنا عن بركة ربنا .. بس كلامك طمني الحمد لله = )

قالها : يعني انتي لسه على اتفاقنا ؟

قالتله : أكيد طبعًااا .. الاتفاق ده أصلا احنا بانيين عليه حياتنا ..  ده اللي هيضمنلنا السعادة في المستقبل .. و انا سعيدة جداً بخطوبتنا كده .. بالطريقة دي .. هي دي الطريقة الصح و مش ناقصني أي حاجة !

ابتسم في اطمئنان و ... قال :

الحمد لله ! = )

قالتله : و بعدين احنا حياتنا مش هتقف عند الخطوبة .. بالعكس دي كده لسه مبدأتش

قالها : ده رأيي بالظبط

قالتله : طب ايه اللي خلاك تسأل السؤال ده ؟

قالها : لسببين .. اول واحد اني كنت خايف تكوني زعلانة

قالتله : و ايه اللي خلاك تحس كده ؟

قالها : علشان كل ما كنا بنصادف في طريقنا اتنين مخطوبين بالطريقة التانية .. كنتي بتبـُصيلي

قالتله : كنت ببصلك علشان اشوف رد فعلك ، فآلاقيك باصصلي

قالها : و انا كمان ههههههههههههههه

قالتله : سبحان الله و محدش فينا كان بينطق :D

قالها : كنت بقول جوايا الحمد لله ان ربنا رزقني واحدة زيك .. حاسباها صح !

قالتله : طب و السبب التاني ؟

قالها : علشان عايز النهاردة اختار معاكي معاد كتب كتابنا .. فقولت نأكد الأول عالمبدأ اللي كنا متفقين عليه مع بعض .. و نتفق ازاي عايزين فترة كتب الكتاب تمر علينا = )

قالتله : فاكر أصلاً الاتفاق بتاع الخطوبة حصل ازاي ؟

قالها : آآه فاكر

قالتله ( بغلاسة ) : فكرة مييييييين دي ؟!

قالها : خلاص بقى انتي هتذلينا و لا ايه ^__^

قالتله : ههههههههههه عارف أحلى حاجة في الفكرة كانت ايه ؟

قالها : اننا تقريبا قولنا نفس الكلام و الأفكار من غير ما نتفق و من غير ما حد فينا يغشش التاني

قالتله : طب ما تيجي نكررها .. بس المرادي على فترة كتب الكتاب

قالها : خلاص ماشي .. طلعي ورقة و قلم يلا و اكتبي

قالتله : طب عينيك في ورقتك بقى و الغش ممنوع

قالها : هههههههههه قدامك خمس دقايق بالظبط و هسحب الورقة

_ مسكت الورقة و كتبت كلمة واحدة بس و ...

قالتله : خلصت !!!

قالها : نعم ياختي ؟ ^__^ لأ متستهبليش .. اكتبي حاجة بجد

قالتله : كتبت حاجة بجد

قالها : كام كلمة ؟

قالتله : واحدة

قالها : لاااااااااااااااا .. الكلام ده مش هينفع :D

قالتله : انت عارف الأول هي ايه علشان تعترض ؟

قالها : ايوة عارف و فاهمك كويس .. متبقيش مفترية حرام عليكي .. دي فترة جديدة لازم يبقى في اختلاف

قالتله : مليش دعوة

قالها : فــ حدود المعقول يا ستي .. انا مش طمــّـاع و هرضى بالقـليل

قالتله : اديني أمثلة طيب

قالها : مثلاً .. اديني مساحة شوية في الكلام .. آخد راحتي شوية

قالتله : مساحة قد إيه ؟ كام فـ كام ؟ ههههههههههه

قالها ( بغيظ ) : اندهيلي طنط علشان انا اتضحك عليااااا فـ الجوازة دي

قالتله : مين ضحك عليك ؟ قالولك ايه ؟

قالها : انتي ضحكتي عليا .. كنت فاكرك طيبة مش مفتررررية .. اندهيلي طنط بدل ما ادخلها بنفسي

قالتله : هتعمل ايه ان شاء الله ؟!

قالها : هحكــّـمها ما بيننا و هي تقول بقى رأيها ايه

قالتله ( بغلاسة ) : شوفت ؟! .. مع أول خلاف حصل ما بيننا دخــّـلت  طرف تالت على طول .. بانت بانت !

قالها : ماهو انتي مفترية .. و انا محتاج حد ينقـذني و يلحقـني قبل ما اموت فـ ايدك .. اعمل ايه ؟!

قالتله : ههههههههههه .. طب في ايه تاني ؟ و في الآخر هنتفاهم

قالها : في تفاصيل كتيرة لازم نتفق عليها .. بس كنت عايز الاتفاق يكون زي ما اتعمل المرة اللي فاتت بنفس الطريقة

قالتله : ما احنا عملنا كده و النتيجة معجبتكش

قالها : علشان انتي عارفة انها مش منطقية .. خليكي طيبة بقى ^__^

قالتله : طب غششني

قالها : انتي كنتي كاتبة كلمة ايه بالظبط ؟

قالتله : Same !

قالها : خلاص .. سيبيها زي ما هي و زودي عليها كام نقطة كده استثناءات .. ما احنا برضه مش هنبعد كتير

قالتله : طب و ليه نغيـّـر ؟ خلينا زي ما احنا

قالها : علشان تاخدي عليا شوية

قالتله : مانا واخدة عليك اهو .. انت فاكرني بكلم أي حد كده ؟ ^__^

قالها ( بغلاسة ) : ايه .. بتكلمي باقيت الناس ازاي ؟ بالهندي و لا بالايطالي ؟

قالتله : ايوووووه عالغلاسة .. طب تصدق ؟ انا كنت هـغـّـير في الاتفاق بس بعد الكلمة دي خلاص فرصتك راحت :P

قالها : خلاص خلاص آسف يا ستي .. هاه ؟

قالتله : انت بجد مش شايف اننا واخدين على بعض ؟

قالها : واخدين ايه بس .. ده انا المرة اللي بغلط فيها غصب عني و اقولك حاجة .. وشك بيقلب ألوان الطيف السبعة .. اومال لو مسكت ايدك هتعملي ايه ؟ هتضربيني بالقلم ؟! .. و لا يمكن تطلبيلي بوليس الآداب !

_ ضحكت

كمل و قال : فاكرة الأسبوع اللي فات ؟ لما قولت كلمة واحدة بس و طبعـًا مش هينفع أكررها تاني .. بس انتي عارفة قصدي على انهي مرة .. و بعدها قاطعتيني يومين كاملين .. مرضيتيش تكلميني !

قالتله : علشان كسرت الاتفاق

قالها : كان غضب عني و الله .. طلعت غصب عني .. علشان كده دلوقتي عايز شوية مساحة !

قالتله : طيب موافقة بس بشرط !!! .. لو حسيت انك زودتها في الكلام .. هيبقى في عقاب صارم .. و هنرجع زي الأول .. مترجعش تزعل بقى !

_ نفخ و طلع صوت يدل عالزمجرة و .. قال (ببرطمة) :

نتحاسب بعدين .. ده انتي هتشوفي أيام !

قالتله : في اعتراض و لا حاجة ؟

قالها (بغيظ) : لا أبدا و انا اقدر افتح بــُقي ؟

قالتله : آآه بحسب .. يعني اتفقنا ؟

قالها : طبعا .. نكمل ؟

قالتله : نكمل ايه ؟ .. خلاص كده !

_ قام وقف و قالها بلهجة تهديد :

طب بعد اذنك بقى انا داخل لطنط جوة .. و لا ليه صحيح .. عمي فين ؟ هروحله هو دوغري .. أكيد هينصفني !

ردت (بسرعة) : قومت ليه بس ؟ الكلام أخد و عـطا !

قالها : أخد و عطا .. مش ذل و مهانة !

قالتله : ههههههههههههههه خلاص معلش .. اقعد ما تزعلش :)

قالها : ادينا قعدنا .. بس المرة الجاية لو قومت مش هقعد تاني

قالتله : يعني بلاش اهزر ؟

قالها : يا ستي هزري زي ما انتي عايزة بس خلينا نخلص الورقة الأول ^_^ .. المصيبة اني فاهمك و عارف لو عقلتي هتكتبي نفس الكلام في ورقتك علشان احنا بنفكر زي بعض .. خليكي طيبة بقى :)

 _ ابتسمت و قالتله :

حاضر =)

_ قعدوا يكتبوا و بعد شوية

قالها : خلصتي ؟

قالتله : خلصت

قالها : بجد المرادي ؟!

قالتله : بجد و الله انا كنت بغلس بس

قالها : طب يلا امضي عالاتفاق و انا همضي .. و الورقتين المرادي هيبقوا معايا انا .. مش انتي خدتي بتوع الخطوبة ؟

قالتله : لأ انا اللي هاخدهم

قالها : لا لا لا .. مش مطمنلك مليش دعوة .. و دلوقتي بقى امضي عالاعتراف ده .. انك مش هتتراجعي عن الاتفاق مهما حصل

قالتله (بغيظ) : مش بيفوتك حاجة

_ مضت و طبق الورق و حطه في جيبه

قالها : تمام ؟

قالتله : تمام =)

_ بصلها بصة انتقام و قالها :

في حااااجة نفسي اقولهالك من ساعة ما جيت النهاردة

قالتله : اوعى تكون نفس الكلمة اياها .. انا بحذرك !

قالها : هتعملي ايه يعني ؟ انتي خلاص مضيتي عالاتفاق :P

قالتله : بس احنا لسه مكتبناش كتابنا

قالها : لأ .. كتبنا !

قالتله : نعم ؟!!!!!!

رد بسرعة : وحــشــتــيــنــي  ! =)

♥

 __________________________

من وحي خيالي
ديسمبر 2012

إختلاف !

لما سرحت امبارح في حالي دلوقتي و افتكرت حالي زمان .. حمدت ربنا قوي قوي :)))

...

في نفس الأيام دي .. في 2012 .. كنت بمر بأصعب أيام حياتي ..

كانت أيام صعبة قوي بدأت من شهر سبتمبر 2011 و فضلت مستمرة السنة اللي بعدها مدة طويلة ..

لا كنت فاهمة انا بعمل إيه و لا هعمل إيه ..

و رغم إني كنت عارفة انا عايزة ايه و ايه اللي هيسعدني .. كنت بكابر و بتحدى نفسي و بحاربها ..

منه يأس و استسلام و احباط .. بالإضافة لشعور الخوف من إني أعشم نفسي قوي و اتصدم في الآخر من النتيجة ..

و كنت خايفة ده يحصل مع غيري برضه .. و اني أكون سبب في جرح ليهم بشكل غير مباشر ..

ده نتج عنه سلبية صادرة مني طول الوقت و تناقض غريب و تصرفات أغرب ..

لدرجة إني ممكن في الوقت اللي فاكرة نفسي بعمل حاجة في مصلحة الناس اللي تهمني في الدنيا دي كلها .. كنت في الحقيقة بسببلهم ألم و ضيق ..

كنت بتألم و بتظاهر بالقوة قدام كل الناس .. جوايا صراعات مستمرة و مش بتكلم مع حد ..

و أوقات كنت بعيط قبل ما انام بيني و بين نفسي .. كل الناس حواليا كانوا فاكريني مستقرة داخلياً .. و أيامي ماشية تمام قوي ..

و فضلت عالحال ده .. مش قادرة افضفض .. و الناس اللي محتاجة افضفضلهم أكتر من أي حد هما أكتر حد مينفعش افضفضله ساعتها :-(
و لما كانت تضيق بيا قوي كنت بكتب حاجات مش مفهومة أو غامضة .. يمكن يفهموني ..
كنت بكلم نفسي و ارد عليا .. اوقات اقول خلاص تمام انا كويسة و اوقات اكتشف اني بضحك على نفسي ..
كنت بضيع لحظات كتير حلوة مش عارفة استمتع بيها .. لحظات دلوقتي بستناها بالشهور .. في اللحظات دي كنت ببقى فرحانة بس مينفعش يبان عليا .. و كنت ببقى زعلانة علشان انا فرحانة .. لاني عارفة انها فرحة مؤقتة مش هتستمر .. لإن اللحظة مسيرها تنتهي و الاقي نفسي لوحدي تاني !!

و كنت بخاف أواجه الناس اللي حواليا باللي بيدور جوايا لإني كنت حاسة ان محدش هيفهمني و يحس بيا و يدعمني .. و مكنتش مستعدة أواجه نقد .. كان اللي فيا مكفيني ..

لو قعدت أوصف في حالي ساعتها مش هخلص .. فكفاية لحد كده :)))
...

لكن حصل معايا لحظة اختلاف و صدق مع نفسي .. كانت مسيرها تحصل لانها لو مكنتش حصلت مش عارفة كان ممكن يحصلي إيه من كتر التفكير و الكتمان و الضغط على نفسي في انها تتخلى عن أسباب سعادتها ..
لما حصلت اللحظة دي .. بعدها كان سهل عليا قوي إني أتغير 180 درجة .. بقيت متفائلة بشكل غير عادي .. بقيت حاسة اني كده في مكاني الصح و الطبيعي .. و ان ده كان مفروض يحصل من زمان .. ازاي اتأخرت كل ده .. و أذيت نفسي و أذيت غيري كل ده؟!
التأخير مكنش له علاقة بصدقي اتجاه مصدر سعادتي .. و لا باقتناعي ان الحاجة دي مصدر سعادتي .. و لا برغبتي فيها ..
لكن كان ضعف مني و سلبية أكيد ليها حكمة من ربنا ..
قعدت افكر الحكمة ممكن تكون ايه .. وصلت لنتايج كتير و احتمالات كتير .. بعدها مشغلتش بالي بإيه الحكمة لإن دي عند ربنا .. المهم إني أؤمن من جوايا إنه معانا بيدبرلنا أمور حياتنا بشكل عمرنا ما بنقدر نتخيله :-)

دلوقتي ببص لحالي و انا كل يوم بدعي ربنا و جوايا يقين و تفاؤل و حسن ظن و إيمان بإن حلمي هيتحقق .. و قبل كده كنت بدعي نفس الدعوة بس الروح كانت مختلفة ..

دلوقتي انا عارفة الاتنين .. عارفة انا عايزة ايه و بعمل ايه ..

مفيش حاجة ممكن تهزني أو تحبطني زي زمان ..

Can nothing bring me down ^_^ 

مش قادرة اوصف الاختلاف بالظبط .. يمكن كل حاجة متغيرتش عن الأول .. لإن مفيش حاجة قبل كده كانت مفروض تتغير غير حاجة واحدة ..
درجة التفاؤل جوايا ! :)))

لما خدت القرار ده و حصل الاختلاف الحقيقي معايا .. واجهت كل الناس من غير خوف أو قلق .. في اللي اتصدم لإنه مكنش متخيل إن كل ده بيدور جوايا .. و في اللي كان طول الوقت حاسس ..

بس الغريب إني ملاقتش رد الفعل اللي كنت خايفة منه :)

دلوقتي بقيت بحاول قدر الإمكان أعوض الناس اللي أذيتهم زمان بدون قصد .. بحاول أديهم أقل حاجة يستاهلوها .. ناس عارفة إني لو عملت المستحيل مش هوفيهم حقهم .. و بدعي ربنا إنهم يغفرولي و إنه يساعدني أسامح نفسي!

و بدعي ربنا يديني الفرصة لإسعادهم :-)

دلوقتي بقيت بعيش بالأمل ..

دلوقتي برضه الأيام مش سهلة .. بس كل ما هنالك بعض الصبر :)
"و سيجزي الله الصابرين"
^&^
 

الحمد لله من قبل و من بعد ..

الحمد لله إنه رزقني ناس في طريقي ساعدوني و متخلوش عني و صبروا عليا ..
الحمد لله إنه رزقني ناس هما مصدر سعادتي و بتمنى من ربنا إني أكون مصدر سعادتهم دايماً ..
الحمد لله إنه رزقني التفاؤل و الايمان و اليقين بإن الأحلام مش مستحيلة مهما كانت كبيرة!!!
الحمد لله إنه خلاني طلعت من المرحلة دي و مطولتش فيها عن كده علشان مأذيهومش أكتر من كده!
الحمد لله إنه ساعدني أوصل لنفسي في الآخر .. و احس بالاستقرار! :-)

الحمد لله :)

7 مارس 2014

حــلـــم !!!

 من فترة كنت منزلة أبليكاشن على موبايلي الجديد اسمها "SwiftKey" ..

ده عبارة عن كيبورد متطور جدا و تحفة بس للأسف مش مجاني و له فترة تجربة بتنتهي ..

المهم ان من خواص الكيبورد إنه بيعمل "keyboard predictions" للكلمات اللي ممكن تكون على بال اللي بيكتب بناءًا على الحروف اللي بيكتبها ولو كلمة من الكلمات اللي هو توقعها عجبتك بتختارها تكمل بيها الجملة بدل ما تفضل تكتب حرف حرف .. و من ضمن التوقعات اللي هو بيعملها بيحط الكلمات اللي انت استخدمتها كتير قبل كده حتى لو كانت أسامي فكان بيريحني قوي الحقيقة :))

 و كان بيتوقع 3 كلمات جمب بعض تختار منهم ..

...

المهم .. حصل مع الأبليكاشن دي موقف غريب من فترة مقدرتش أعديه بسهولة و كان لازم اكتب عنه ملحوظة و أسجله بالسكرين شوت ^&^ 

 

 مرة لاقيت جملة حد اعرفه كاتبها عالنت كانت ..

"Let the note say hello to SwiftKey ;-)"

بعدها بمدة فهمت إن ده شعار الأبليكاشن عالنت لما دورت في جوجل على نفس الجملة ..

بس ساعتها لما قريتها قولت يا ترى إيه السبب من الجملة دي .. هل قصدهم إني أنزل الأبليكيشن دي عالنوت بتاعي ؟! طب و اشمعنى ساعتها؟ مانا منزلاها فعلاً .. ظهرتلي ليه دلوقتي ؟! مكتوبة ليه؟!

فكنت هكتب جملة أسجل بيها لحظة التساؤل دي على أكونت تويتر بتاعي و بدأت اكتب " بس يا ترى ايه السبب ... "

 و بعدين فجأة دماغي جابت فكرة .. يمكن قصدهم أكتب كلمة "hello" باستخدام نوع الكيبورد ده؟ و ساعتها في رسالة هتوصلني يمكن؟! :-)

معرفش جات في بالي ليه الفكرة بس حسيت ان ممكن ده المطلوب :D :D

فمن غير ما امسح اللي كتبته .. نقلت الكيبورد انجليزي و بدأت اكتب الكلمة .. و اتفاجئت من النتيجة !!!

^__^

قولت دي أكيد صدفة .. جربت امسح الكلام و ابدأ من الأول .. من غير كلام عربي .. مكنش بيطلع حاجة مميزة .. لكن لما كنت بكتب كلمة "hello" في نص جملة مش في أول الجملة كانت كل مرة بتطلع نفس النتيجة ..

جربت اقلب الكيبورد فرنساوي .. لاقيت النتيجة هي هي رغم ان الكيبورد بيتوقع الكلمات باللغة الفرنسة ..

كان بيتوقع كلمة "he" .. و ده مش غريب لان دول أول حرفين من كلمة "hello" .. فلما كنت بكتب h و بعدها e كان بيتوقع he .. بس الغريب كان في الكلمتين اللي جمبها .. لان ملهومش اساس يختارهم علشانه .. و ملهومش اي علاقة بالجملة .. ده غير ان اصلا انا بكمل على جملة عربي .. فلو كان ذكي جدا كان ممكن لو كاتبة جملة انجليزي يتوقع على اساسها كمالة الجملة .. لكن انا كنت بكتب بالعربي و مش فاكرة اني استخدمت الكلمة اللي هو متوقعها دي قبل كده كتير للدرجة اللي تخليه يتوقعها من قبل حتى ما أدوس على زرار ال"space" !!!

و بعدها كررت الموضوع و بدأت آخد السكرين شوت بتاعي لزوم تسجيل اللحظة :)

...

الكلمة كانت believes .. 

he believes ! :-)

ساعتها ضحكت و قولت لنفسي و هي كمان

also she believes :-))

كملت حرف ال"l" لاقيته طبعا شال he بس كلمة believes فضلت موجودة :))))))

... 
و ده اللي دفعني ساعتها إني اكتب ..
.. he believes.. ? :-) #keyboard_predictions? :-)
...

الله أعلم حد غيري خد باله من الموضوع ده و لا لأ .. و الله أعلم ساعتها الجملة كانت مكتوبة ليه .. بس المهم .. ان الموقف ده حصل بالاشتراك ما بين طرفين حتى لو واحد فيهم مكنش قصده ^&^

.....

I believe :)))

We believe 

:-)

...

يا رب حقق لنا أحلاماً باتت تحدثنا في صحونا و نومنا ..في جدنا و هزلنا ..في هنائنا و شقائنا ..أحلامٌ صارت جزئاً منا لا يتجزّأ عنا ..أحلامٌ باتت تصيح بنا من داخلنا لتصبح واقعنا..ظناً منها أننا قد أجّلناها بمحض إرادتنا و هي لا تعلم كم ندعو لها كل يوم لتتحقق .. أحلامٌ ليست مستحيلة .. فلا يوجد مستحيل و أنت ربنا .. و أنت الكريم القدير عليها .. الرؤوف الرحيم بنا

فدبّر لنا تحقيقها برحمتك التي وسعت كل شيء.. و بحكمتك و علمك الذي أكرمتنا بجزءٍ منه.. و بقدرتك يا عظيم يا مالك الملك.. دبّر لنا فإنا لا نحسن التدبير ..يا ربنا يا الله!

:-) 

Technology to the power 3 ^_^

اخترت النهاردة علشان اتكلم عن 3 حاجات ^&^

كلهم ليهم علاقة بالتكنولوجيا .. اللي وصلت لمراحل متطورة غاية في الروعة

سبحان الله الخالق .. اللي علمنا نوصل لكل ده ! :)

و كل ده جزء من علمه فقط .. جزء ضئيل =))

...

1_ Samsung Galaxy Note II

الحمد لله بعد فترة لا بأس بها من الانتظار و التحويش .. و لإن التحويش أصعب حاجة عندنا احنا البنات فالموضوع أخد وقت  :D :D

جيبت موبايل نوت 2 و ده تاني موبايل خاص أجيبه و أول موبايل أندرويد

و هنا سحر التكنولوجيا تلاقيه بيتلخص في كلمة Android ! 

نظام و سيستم مش عارفة اللي عمله فكر فيه إزاي و الدليل على روعته إنه نجح نجاح رهيب على مستوى الشركات و على مستوى الأفراد المستخدمين و بقى يعتبر حاجة أساسية مفروض تكون موجودة عند كل واحد ^__^

فرحتي بالموبايل مكنتش لمجرد إني جيبته أخيرا و لا لإنه كان أندرويد ..

لكن فرحتي بيه كانت سرها في التاريخ اللي جبته و بدأت استخدمه فيه و لإنه اتظبط معايا عالتاريخ ده ^_^

و فرحتي بيه قيمتها زادت جدا لما الناس باركولي عليه و حسيت بإني شاركتهم فرحتي 

:-) :-) :-)

 نزلت أبليكاشنز عليه بس مش كتير قوي لسه .. و ميزته إنه أي أبليكاشن على جهاز الكمبيوتر حتى لو متتخيلش تبقى عالموبايل .. تلاقي منها version معمول مخصوص للأندرويد ,, فتحس بنجاحه لما تلاقي كل البرامج عملت أبليكاشن مخصوص ليه يشتغل على أجهزته ..

من البرامج اللي أبهرتني لما عرفتها و أبهرتني أكتر لما لاقيتها تنفع عالموبايل .. برنامج إسمه

team viewer

 و ازاي ممكن من على موبايلك تدخل على كمبيوتر حد تاني و تحرك انت الماوس و تتعامل مع الملفات ^_^

و في انتظار الأبليكاشن المقترحة منكم و ماليني شعور بالفضول :)))

...

2_ الحاجة دي معرفش لسه عنوانها .. أو اسم البرنامج اللي بينفذها ..

بس تخيلوا توصل التكنولوجيا إن أي فلاشة أو ميموري كارد أو هارديسك .. كانت عليه داتا اتمسحت في أي وقت ممكن ترجع؟!

حتى لو كانت معمولة Shift+delete ^_^

تخيلوا ده ممكن ينفعنا إزاي على المستوى الشخصي و على مستوى أكبر تبع سندات شركة أو في التحقيقات و الجرائم و إن بعد كده مشهد إن واحد بيمسح سندات تدينه مبقاش له لازمة في المسلسلات :D :D

انا سمعت عنه كتير بس متخيلتش يكون وصل عندنا .. فحصلت معايا مشكلة من فترة إن ميموري كارد تبع الموبايل القديم دخل عليها فيروس و مسح كل الصور و الفيديوهات .. زعلت جدا لان كان عليها صور و ذكريات مهمة .. و بعدين قولت أجرب حظي فروحت محل موبايلات في مول زهران واحدة قالتلي عليه .. و سألت عالموضوع ده و لاقيت مهندس بيعمل الموضوع ده و التكلفة 60 جنيه فقط لا غير ^__^

كان شعور رائع و انا بشوف صور كانت من كام يوم بفتكرها على إنها ذهبت بلا عودة :)))

...

3_ Lasic Operation

دي طبعا مش محتاجة اتكلم عنها كتير .. نعمة من ربنا خلتنا وصلنا لاستخدام الليزر في حاجات كتير من ضمنها تصحيح الإبصار ..

فاكرة إني خدت قرار أعملها من السنة اللي فاتت ^__^

و انشغلت و جه الصيف فقولت هستنى للشتا علشان اتقالي إنه أفضل في الشتا :-)

و جه الشتا تاني و مليش حجة :D

فكرت في تاريخ أعملها فيه و اخترت يوم 13_2_2014

بس قولت هشوف هيوافق يوم ايه في الاسبوع علشان لازم يكون آخر الاسبوع و يكون عندي أجازة علشان عيني تستريح من الشغل و يشاء القدر إن يطلع يوم 13_2 ده يوم خميس ^_^

يبقى كده تمام .. و تم تثبيت التاريخ ده بإذن الله على أن يتم الحجز من قبلها و اختيار اليوم ده قبل ما حد تاني ياخده :D :D

نرجو تكثيف الدعوات قبل اليوم ده و سيتم التنويه عن أي تعديلات في التاريخ لو حصلت بإذن الله ^_*

الحــمــد لله :))))))))))

بداية جديدة ^&^

بـــســـم الله ..

ياااااااااااااه

:D :D

بقالي كتير قوووووي مكتبتش حاجة هنا

:-)

رغم إنها كانت حاجة اختيارية بس في نفس الوقت كنت حاساها إجبارية أو انا حكمت على نفسي بيها

نوع من التحكم في النفس اللي يمكن بيبوظ أوقات كتير ..

و نوع من تحدي الصبر اللي نجح هنا آه بس فشل كتير في حاجات تانية ^_^

.

.

.

و الحمد لله السنة عدت بسرعة قوي .. فاكرة نفسي كويس يوم 7_1_2013 و انا لسه في بداية السنة .. و كنت زعلانة قوي بس فرحانة في نفس الوقت .. كان شعور مختلط و غريب :))

و قلت يا ترى السنة دي هتعدي علينا ازاي ! و بأنهي شكل؟! .. بس الحمد لله ربنا بيلطف و خلاها معقولة _على الصعيد الشخصي بغض النظر عن الأحداث_ و فيها أوقات حلوة و أوقات صعبة .. أوقات صبر كتيرة و أوقات تفريغ شوية صبر .. و يا رب صبرنا كلنا يكون محسوب علينا صبر

 :-))

دلوقتي بداية جديدة .. من جديد .. و سنة جديدة ^&^

عايزين نراقب نفسنا أكتر و نراجع نفسنا أكتر و نصبر أكتر ..

#يا_رب_قوّينا

و متفائلة بالخير اللي ربنا وعدني بيه لما بتقيه و بصبر على رزقي و باخد بالأسباب في سكتي .. لإن هو الرزاق الكريم .. اللطيف الخبير .. الرحمن الرحيم! :)

و عندي أمل ربنا يغفرلنا أي تقصير أو قلة صبر أو استعجال رزق .. و إنها متأثرش على البركة في حياتنا اللي جاية .. يااا رب!

و منتظرة من ربنا أحداث مختلفة السنة دي .. و خطوات إيجابية تقرب أحلامنا أكتر مننا .. لحد ما ييجي يوماً ما!

و مش هتنازل عن التفاؤل اللي بدأت بيه السنة اللي فاتت ..

What Ever it takes !

^&^

كل سنة و انتم بخير و صحة و سعادة دائمين يا رب ! :)))

تـتـجــوزيـني ؟! =)

قالتله : كنت عايزني فـ موضوع مهم ، خير ؟!

قالها : هو موضوع مهم فعلا .. بس مش عارف ابدأه ازاي !

قالتله : سمـّي الله و قول

قالها : طيب .. بسم الله .. احم ..

_ ابتسم و سكت .. بصتله بشغف و ..

قالتله : اتفضل =)

قالها : بقالي فترة مـُـعجب بيكي و بتفكيرك و أخلاقك و حاجات كتير قوي شدتني فيكي .. و حابب انك تبقي النـُـص التاني ليا .. و تبقي زوجتي في الدنيا و الآخرة بإذن الله ! =)

_ ابتسمت

قالها : إيه رأيك ؟ .. هل عندك استعداد للموضوع ؟

_ ابتسمت أكتر

قالها : يعني أعتبر الإبتسامة دي موافقة ؟

قالتله : كنت حاسة ان هو ده الموضوع .. علشان كده .. انا كتبتلك رأيي و رد فعلي في الورقة دي قبل ما آجي .. و رقم تليفوني !

_ و ادتله ورقة متطبقة نـُصين

قالها : يعني موافقة ؟

قالتله : أكيد !!! :)

_ ابتسم في اطمئنان و ابتسامته اتحولت لضحكة من الفرحة ^_^

قالها : بس انا كنت عايز رقم والدك ، و اقعد معاه نتكلم مرة قبل ما نجيلكم البيت ، و لا انتي هتفاتحيه في الموضوع بنفسك ؟

قالتله : انا هبقى اقوله .. تمام متقلقش

قالها : يعني أستنى منك رد على امتى ؟

قالتله (باستغراب) : رد بخصوص إيه ؟ ما انت عرفت ردي !!!

قالها : رد والدك ، هيقابلني امتى ؟ و فين ؟ كده يعني :)

قالتله : لما ابقى اقوله بقى .. في الوقت المناسب .. هات بس رقمك دلوقتي

قالها : مش فاهم !!! *_*

قالتله : انت علشان تفاتحني في الموضوع بعتلي مع حد رغم انك عارفني و عارفاك بس مكنش معاك رقمي ، أكيد مش هنفضل نستخدم وسيط ما بيننا ، لازم يبقى في طريقة نعرف نوصل لبعض !

قالها : فاهم و هديهولك ، لكن انا مش فاهم قصدك إيه بالوقت المناسب ؟

قالتله : مانا معرفش عنك حاجة .. شوية التعامل اللي كان بيننا مش كفاية .. لازم نتكلم الأول كده كام مرة .. و نتأكد اننا متوافقين و متفاهمين و اعرف عنك أكتر و عن ظروفك و تفكيرك و نظرتك لحياتنا قدام .. أعرفك شوية الأول !

قالها : طب ما كل ده هتعرفيه ، مستعجلة ليه ؟ ^_^ .. نقرا بس فاتحة الأول و نبقى مرتبطين رسمي و بعدين نتكلم مع بعض زي ما احنا عايزين

قالتله : بس فترة قراية الفاتحة مش كفاية علشان نعرف بعض كويس .. فاهمني ؟

قالها : ما لسه في خطوبة .. مش هنقرا فاتحة و نتجوز على طول !

قالتله : انت برضه مش فاهمني .. انت شايف ان اللي نعرفه عن بعض كفاية .. لدرجة نقرا فاتحة على طول ؟

قالها : انتي محسساني اني شوفتك امبارح و اتقدمتلك النهاردة .. لأ طبعا نعرف كفاية علشان ناخد خطوة ارتباط .. انا حاسس انك مش فاهمة قصدي لاني اللي بحاول اقوله مش بعيد عن وجهة نظرك اللي انا متأكد انها عندك من معرفتي بيكي .. انا قصدي اننا بس نخللي كل حاجة رسمي .. و متخافيش و الله لسه الخطوبة و قراية الفاتحة هتعرفي عني فيهم كل حاجة =)

قالتله : و افرض طلعنا مش متوافقين ، تبقى اتحسبت عليا اني اتخطبت قبل كده و فسخت خطوبتي ؟! .. و انت عارف كلام الناس !

_ اتخض من الكلام و بصلها بصة واحد مصدوم و ..

قالها : يعني قصدك انك مش هتقوليلهم في البيت اننا نرتبط ؟!

قالتله : لأ هقولهم .. بس آخد فرصة شهرين أو تلاتة أعرفك الأول

قالها : بس دي مكانتش وجهة نظرك عن الارتباط .. انا كل ده بتناقش في نقطة نقرا فاتحة امتى .. لكن معرفش ان قصدك اننا هنتكلم و محدش عندك في البيت يعرف !!! .. انتي مش كنتي رأيك زييي كده ؟ .. و كلامك لما كانت بتيجي سيرة الارتباط كان حاجة تانية خالص .. انتي فاهمة انا بحاول اقول ايه ؟

قالتله : ايوة فاهمة .. بس الكلام حاجة و التنفيذ حاجة تانية .. لان احنا مش زي الناس اللي بتصاحب دي .. و انت في نيتك تتقدم مجرد ما نتأكد اننا متناسبين ! مش كده ؟ .. بالعكس ده كمان رأيي ده أريح ليك انت علشان ميبقاش في ضغط عليك .. لان مجرد ما تبقى في حاجة رسمي .. هتبقى وراك مسؤوليات كتير و ضغط جامد عليك .. فاحنا الشهرين تلاتة دول .. انا هستفيد فيهم اني اعرفك أحسن و متتحسبش عليا خطوبة .. و انت تعرفني احسن و فـ نفس الوقت ميبقاش في مسؤولية عليك ! .. و انا لو مش واثقة فيك مكنتش قولت كده !

قالها : ثواني بس استفسار بسيط اتأكد من اللي فهمته .. طب لو طلعنا مش متوافقين في الشهرين دول .. و مكملناش .. مش شايفة انها هتبقى اتحسبت عليكي أي حاجة ؟؟؟؟!!!!

قالتله : لأ .. حاجة زي إيه ؟!

_ سكت شوية و بص للأرض بحزن

قالتله : بتفكر في إيه ؟ لو في حاجة انا مش واخدة بالي منها .. قولي !

قالها : لأ خلاص .. أنا آسف .. واضح اني غلطت في العنوان .. اعتبريني مقولتش حاجة .. و مفيش موضوع كنت عايزك فيه

قالتله : إيه ده ؟ ليه ؟

قالها : آسف .. كنت بحسبك حد تاني ! =(

قالتله : مش فاهمة !!! هو انت تزعل علشان بثق فيك ؟

قالها : لأ أزعل علشان الثقة دي بتستخدميها غلط ، و تضمني منين ان الشخص اللي تثقي فيه يطلع فعلا أهل للثقة دي ؟

قالتله : انت مش شايف نفسك أهل للثقة ؟

قالها : حتى لو كنت انا الوحيد اللي ممكن تثقي فيه في الدنيا كلها .. يبقى بالطريقة دي ؟ لما انتي تتخيلي اني ممكن اقبلها عليا و عليكي تبقي كإنك بتشتميني !

قالتله : مش فاهمة ، ازاي ؟؟ دانا بمدحك مش بشتمك !!!

قالها : عمرك ما هتفهميني .. انا آسف ضيعت وقتك .. و عندي طلب أخير .. خللي بالك من نفسك لو سمحتي .. و راجعيها كتير

قالتله : انت واخد الموضوع لعبة يعني ؟ تقول كلام و ترجع عنه فـ ساعتها ؟

_ بصلها و هو مصدوم .. و سكت

قالتله : خلاص براحتك .. أمشي يعني ؟

_ مردش عليها .. لفت ببطئ و كانت على وشك تمشي

قالها (بسرعة) : لأ استني !

قالتله : ايه ؟ غيرت رأيك ؟؟

قالها : خودي الورقة دي ، انا مش عايزها

قالتله : خليها معاك علشان لو غيرت رأيك تعرف تكلمني

قالها : لأ .. مش هغير رأيي .. خلاص !

قالتله : متأكد ؟

قالها (بحزن) : أيوة !

قالتله : طب عالعموم اقرأ بس كلامي اللي كنت كاتباه عنك و رأيي فيك .. و ابقى قطعها و ارميها بعد كده

قالها : هيفيد بإيه ؟ ما خلاص .. ما عادتش تفرق :(

قالتله : كل ده علشان قلتلك اعرفك كام شهر الأول ؟ طب خلاص خليه شهر واحد

قالها : الفكرة في المبدأ .. مش في الوقت .. و ارجوكي كفاية كده علشان كل مدى ما بتصدم اكتر .. اتفضلي !

_ مدلها ايده بالورقة و هو مش راضي يبصلها

 قالتله : طب خلاص هديك رقم والدي !

قالها : لأ مش هينفع ، المبادئ مش بتتجزأ و لا بتترتب ، هو مبدأ .. موجود أو مش موجود !

قالتله : مانا هعملك اللي انت عايزه أهو !

قالها : بعد إيه ؟ ما خلاص ! ، و بعدين مش هقبل الناس تتكلم عليكي لو طلعنا مش متوافقين .. مش ده كلامك ؟ .. لان هو ده اللي هيحصل ... و احنا من دلوقتي مش متوافقين !

قالتله : طب طلب أخير ممكن ؟

قالها (بتنهيدة) : اتفضلي

قالتله : اقرأ الورقة .. انا عارفة لو قريتها هتغير رأيك !

قالها : مفيش حاجة خلاص هتخليني أغير رأيي ، ارحميني و خودي الورقة بقى !!!

_ بصتله و عينيها مليانة خوف .. بس هو مش باصصلها

قالها : خوديها لو سمحتي علشان عايز امشي .. اتفضلي !

قالتله : اقراها  بس ، مش هتخسر حاجة .. أرجوك !

قالها : لأ مش عايز .. خوديها 

قالتله : و لو مخدتهاش ؟!

قالها : أكيد مش هرميها في الشارع .. دي فيها رقمك !!!

_ عينيها دمعت و ..

قالتله : لأ انا مش هاخدها .. انا ماشية .. انت اتخلص منها بمعرفتك .. حابب تقراها الأول .. ماشي .. مش حابب .. براحتك !

_ بصلها باستغراب و سكت ... مسحت دموعها و هي ماشية و ايديها بتترعش .. و هو لسه واقف مذهول *_*

قال لنفسه : قدر الله و ما شاء فعل .. إنا لله و إنا إليه راجعون

_ فضل نص ساعة يبص عالورقة .. لا راضي يقراها و لا قادر يقطعها ... و أخيراً مسك الورقة و هيقطعها ..

قال لنفسه : طب اشوف كاتبة كلام قد إيه !

_ عينيه وقعت على أول كلمة .. " آسفة " .. فضلت كل كلمة تجر كلمة .. وقلبه كان هيقف من المفاجأة *_* !!!!!

" آسفة .. كنت بتأكد ان انت فعلاً الشخص اللي شوفته جواك و ان انا مش بيتهيألي .. و ان مبادئك ثابتة مهما كانت الظروف .. بس لو انت مقرتش الورقة دي .. هبقى انا عملت اكبر غلطة فــ حياتي .. ربنا يستر .. ده رقم والدي .. كلمه .. لو قريت الورقة ! =) "

 __________________________

من وحي خيالي  =)

12_10_2012

حــقـيـقــي ؟!

هو احساس غريب
و جديد قوي ^_^
انك تكون قدامك حاجة .. شايفها بعينيك
بس بتسأل نفسك كل دقيقة .. يا ترى ده بجد ؟
يعني انا مش بحلم ؟
يااااااه ، يعني الحاجة دي دلوقتي قدامي ؟
يعني انا دلوقتي عايش في الواقع ؟
السبب مش عدم تركيز او قلة نوم او سرحان
بالعكس انت مركز في كل تفصيلة لان موقف زي ده مينفعش معاه نوم ^_^
و ذهنك بيبقى كله صاحي
لكن انت مش قادر تستوعب ان ده بيحصل فعلا
و ان الحاجة دي قدامك
و فضلت معاك لفترة طويلة
مكنتش عايزها تخلص
احساس مشابه لـ 
"I want to be stuck here forever"
و انك سيبتها و انت عندك أمل .. هتشوفها بكرة !
بس يا ترى بكرة هيبقى حالك ايه .. و انت هتبقى سايبها و مش عارف هتشوفها امتى تاني ؟؟؟!

المهم في الآخر برضه هيفضل السؤال ..
اللي حصل النهاردة ده بجد ؟ حقيقي ؟ =)

الحمد لله :)))

29_4_2013

جــزيــرة الحــــيــاة (1) !!!

كانت الجزيرة ذات نصفـين .. إحداهما مظلم .. مجهول و مهجور .. و النصف الآخر ممتلئ بالسكان .. لم يقدر أحد منهم على الإقتراب من ذلك الجانب الآخر .. كان الخوف أقوى من فضولهم و رغبتهم في تفقدها و معرفة خباياها و محتوياتها و لم تكن أيضا الرغبة و الفضول بتلك الدرجة التي تستدعي المخاطرة و المحاولة للدخول ; فلم يكن يعنيهم ذلك الجانب شيئا سوى أنه مجهول و أنه سوف يعج بالسكان و يمتلئ بالحياة يوماً ما !

كان الصبر ملاذهم الوحيد حتى يأتي سكان هذا النصف ، و كان الإيمان بأن ذلك اليوم سيأتي .. قوياً جداً ، لذلك لم يتعجل أحدٌ منهم الدخول إلى النصف الآخر لأن النصف الذي يعيشون فيه كان كافياً .. وشيئا ما في داخلهم أخبرهم أن الجانب الآخر من الجزيرة ملكاً لغيرهم .. قومٌ آخرون .. أناس سوف يشاركونهم هذه الجزيرة للأبد .. و أن لا معنى لدخوله و هو فارغ و لن ينالهم من تعجـّل الدخول سوى شعورٌ بالتيه و الحيرة ، بل و قد تنشأ أيضا الخلافات و المشكلات فيما بينهم .. لذلك لم يكن أمامهم سوى الإنتظار و الصبر !

و رغم الإتفاق فيما بينهم على الإنتظار لحين مجيء اليوم الموعود ، إلا أنهم كانوا يجلسون يتسامرون و يتحادثون عن سكان النصف الآخر .. و تركوا لخيالهم العنان في ما قد تكون عليه صفات أصدقائهم و شركائهم الجدد الذين لم يأتوا بعد !

إلى أن جاء ذلك اليوم .. في التاسع من نوفمبر عام ألفان و عشر .. عندما فوجئ مجموعة من البحارة المهاجرين بتلك الجزيرة أمامهم ، و لسبب ٍ ما شعروا أن هناك ما ينتظرهم على متنها .. شيئا سيجلب لهم السعادة.. و لم يكن في حسبانهم و لا تخطيطهم الذهاب إليها رغم أنهم سمعوا عنها كثيراً و مرّوا بجانبها عدة مرات .. و لكن لم تنتابهم الرغبة سابقا في الذهاب إليها و لم تنتابهم الرغبة في النزول بأي جزيرة لعدم اقتناعهم بأن الوقت قد حان للإستقرار و رغبتهم في الإبحار حول العالم حتى تجذبهم جزيرة بعينها و يتم الإجماع عليها منهم جميعا بإرادتهم و باختيارهم !

و رغم كل ذلك .. شاء الله أن يشاهد البحارة الجزيرة هذه المرة و كأنها المرة الأولى .. و ظهرت أمام أعينهم بشكل مختلف رغم معرفتهم بأنها الجزيرة ذاتها التي شاهدوها سابقاً .. و جعلهم ذلك يتسائلون عن السبب !!! .. مما دفعهم إلى اتخاذ القرار بالإقتراب من الجزيرة أكثر !

و بدأت حملات الاستطلاع و البعثات ليخرج إثنان أو ثلاثة منهم بقوارب صغيرة .. للدوران حول الجزيرة و استطلاع تحركات سكانها و تصرفاتهم .. و استمرت المراقبة تزداد و أصبحت عن كثب بشكل واضح و كبير !

من جانبهم شعر سكان الجزيرة بهذه التحركات كلها منذ بدايتها و لكن لم يستطع أحد تحديد التاريخ و الموعد بالضبط الذي بدأ فيه هؤلاء الغرباء بالاستطلاع .. و حدث أن شاهدوهم عدة مرات و تواصلت أعينهم دون حديث .. و الغريب في الأمر أن سكان الجزيرة لم يحاولوا طردهم أو سؤالهم عن سبب تواجدهم .. لسبب ٍ ما يتعلق بشعور من الراحة و الثقة التي بدأت تتكون بعد أن تحدث فردين من أهل الجزيرة مع اثنين من الغرباء .. و كانا يعودان ليقصـّا على البقية ما حدث بالتفصيل !

مع مرور الوقت .. بدأ سكان الجزيرة يتعلقون بهؤلاء الزوار شيئا فشيئا و خصوصاً أن أفراد الاستطلاع كانوا يختلفون كل مرة مما يعطي فكرة أكبر و أفضل عنهم جميعا .. فراود أهل الجزيرة شعور بأن هذا اللقاء قد حدث سابقا في الماضي في وقت مجهول لا يستطيعون إدراكه و كأنهم يألفونهم منذ زمن ! .. زاد التعلق و الرجاء و الرغبة في رؤيتهم باستمرار !

بدأت مشاعر القلق و التساؤل و الفضول الزائد تسود بين أهل الجزيرة .. هل سيستقر هؤلاء أم ماذا ؟! .. علامَ ينوون ؟ هل كانت كل هذه الاستطلاعات جادة ؟ أم أن هذه الجزيرة لم تعني لهم شيئا ؟! ماذا يخبئ المستقبل ؟ و هل هو مستقبل قريب أم بعيد ؟!
هل كان ما حدث من صنع خيالهم ؟ هل سيكتشفون فيما بعد أن كل هذه الأحداث كانت من أحلام اليقظة خاصتهم ؟ هل توهـّموا شيئا و صدقوه ؟!
ظلت التساؤلات تزداد و تــُزيد من حيرتهم شيئا فشيئا .. حتى فاقت قدرتهم على التحمل !
منذ ذلك اليوم .. ذهب عنهم شعور الإرتياح و أصابهم الأرق .. 
و ظلت " هل " .. معلقة في سماء تلك الجزيرة !!!

... يــُـتبع ! =)

----------------------
من وحي الواقع !

أبريل _ 2013

ســـــورة الـبــقـــــرة ♥ =)

إنه في ذلك اليوم ^_^ ..

الأحد .. الموافق 7_4_2013 .. 

انتهيت رسميا من حفظ و تسميع سورة البقرة .. 

الحمد لله الذي تتم بنعمته الصالحات !!! =) =) =)

انا سعيدة جدا جدا جدا .. يمكن لسه مش حافظاها بالإتقان اللي أنا بتمناه و بحلم بيه .. و هو إني مغلطش أو اتردد في ولا حرف .. و إني أكون عارفة كل آية سبب نزولها إيه .. و كمية من التدبر و التفكير في معانيها اللي ناوية بإذن الله أعملهم .. إنها فقط البداية .. و البقية تأتي =)

هذه السورة العظيمة .. كان لي معها عديد من المحاولات .. و كنت كل مرة ايأس و اقف بعد أول ربع حزب .. لأي سبب متعلق بوقت أو ظروف .. و كنت عزمت و عقدت النية في رمضان 2012 اني أحفظ منها اللي اقدر عليه خلال الشهر بدلا من ختم القرآن .. و لكن الإنجاز الحقيقي .. بدأ بعد رمضان بفترة .. الحمد لله =)

أتمنى ربنا يتقبل مني ما حفظت و يرزقني الأخذ و العمل بما فيه و يمدني بالعزيمة و القوة و العلم و الهدى .. لحد ما أكمل سورة آل عمران .. و أحتفل بحفظها :)

احساس لا يوصف !!! ^_^

 

و البقية تأتي .. بإذن الله .. ذلك من فضل ربــ♥ـــي !!! =)