اغـفـر لي !!!

ظــلـلـتُ أبحثُ عن الحب عند أناس ٍ حولي

أبليتُ عمراً في شقاءٍٍ و لم أدري

بأن السعادة في حبك !

اغـفـر لي !!!

الـزالــنـتـايــن !!!

عارفين بكرة ايه ?
بيقولوا " الـزالــنـتـايــن "
المهم يعني انا مكنتش فاكرة خالص
و افتكرت من التلفزيون ^_^

انا بحس بصراحة ان اليوم ده بياخد اكبر من حجمه
و ملهوش أي لازمة
أيوووون ملهوش لازمة

طبعا ناس كتير هتقول عليا مش بفهم يعني ايه حب و معنديش احساس و الكلام ده P:

لا اسمعوني بس .. انا عايزاكم تفهموني ^_^

انا مقدرش علشان الناس بتحتفل بيوم و انا مش مقتنعة .. اجاملهم
احنا اتفقنا على الصراحة
و انا اليوم ده ببقى مش طايقة أشوف قدامي لون أحمر
بس محدش دماغه توديه بعيد و يقول اني بقرون بقى و ..... ها ? ^_^

طب خلينا نتفاهم بالراحة و بالعقل

انا عارفة اني مش لازم أكون بحب في قصة حب (على رأي احمد حلمي في فيلم مطب صناعي ^_^) علشان احتفل باليوم ده و عارفة ان في ناس كتير بتحتفل بيه مع اخواتهم و قرايبهم و صحابهم اللي بيحبوهم

بس احنا مش مفروض نستنى يوم علشان نعبر فيه لبعض عن مدى حبنا
و لا مستنيين يوم زي ده يحسسنا قد ايه احنا قريبين من بعض
و باقي الايام ننكد على بعض !!!

انا لما اتجوز مش هستنى يوم عيد الحب علشان أعبر لجوزي قد ايه انا بحبه
و مش هستنى اليوم ده علشان اعبر لأمي و أبويا قد ايه هما اغلى ناس في حياتي
و لا علشان اعبر لاخواتي و اصحابي
الحياة مش بتدور في يوم

و مش محتاجين يوم علشان نعبر فيه عن حبنا لكل الناس اللي حتى منعرفهمش
لان معاملتك للي حواليك هي اللي بتبين قد ايه انت بتحب الناس و بتحب الحياة

المفروض تكون كل أيامنا عيد حب

بس أكيد من جوانا دايما بنبقى نفسنا في يوم نركز فيه حبنا على قد ما نقدر و نعيشه من اوله لآخره من غير اي مشاكل

بس اليوم ده مش لازم يكون الفالنتاين
اليوم ده هيبقى يوم عيد جوازي
او يوم عيد ميلاد حد انا بحبه
او يوم عيد صداقتي مع صاحبتي اللي هو اول يوم اتصاحبنا فيه

يوم عيد جوازي و يوم الصداقة مش محتاج تفسير
لكن يوم عيد ميلاد حد انت بتحبه برضه مهم تحتفل بيه لانه اليوم اللي الشخص ده جه فيه للدنيا
اليوم اللي انت بتحمد ربنا عليه

طبعا في البداية هيخطر على بالكم انها هي هي و مش فارقة كتير
بس هي بتفرق فرق كبير جدا

لان اليوم اللي هتحتفلوا بيه ده هيكون فعلا بيمثل يوم ذكرى سعيدة ليكم
يوم حصل فيه أحلى حاجة في حياتكم
يوم مستحيل يعدي عليكم من غير ما تفتكروه
لكن ميبقاش يوم كل اللي بيعبر عنه هو اللون الاحمر و القلوب
يوم بيحتفل بيه كل الناس من غير ما يمثلهم أي ذكرى

يوم هما بيحتفلوا بيه لمجرد انهم اتولدوا لقوا كل الناس بتحتفل بيه

صدقوني انا اليوم ده مش بحس بأي حاجة
و لما اتجوز ان شاء الله
مش هحتاج اليوم ده لاني هخلي كل أيامي عيد حب
و مش هحتاجه لاني هيكون عندي عيد جوازي
و مش هحتاجه لاني مش هفتكره أصلا

يوم ملهوش أي لازمة :)

في ناس هيبقى في رأيها ان برضه غلط انك تحتفل بعيد ميلاد او عيد جواز او حاجة من النوعية دي

بس انا بقول ده عالأقل أرحم من ان الواحد يحتفل بعيد لا يمت له بأي صلة و لا حتى ذكرى خاصة بيه
و ده أضعف الايمان :)

تصدقوا ان اليوم ده خد اكبر من حقه و اتكلمت عنه اكتر من اللازم
^__^

بس اتمنى فكرتي تكون وصلت
و دلوقتي بس أقدر أحط صورة قلب من غير ما تفكروني بحتفل باليوم ده
D:
لاني زي ما قلت
كل أيامي عيد حب =)

عــُكاشة (٢)!!!

مشهد رقم ٢ :

نرجو منكم قبل قراءة هذا المشهد ، قراءة المشهد الأول مــــــــن هــــــــنـــا لانه مترتب عليه و مكمل لأحداثه ^_^

عــُـكاشة و أثناء جلوسه في بلكونة بيتهم يتذكر أمجاده في التلفزيون
يطلع عليه الجني من أحد أركان البلكونة و يبدوا عليه الهلع و الفزع (الجني طبعا مش عكاشة لان عكاشة مبيخافش من حاجة)


الجني : عكااااااشة !!!!!!

عكاشة : أعوذ بالله خوفتني عايز ايه ? هو كل شوية هتطلعلي تشكيلي همومك ? مش لاقي غيري ?

الجني : ماهي كل المصايب جاية من وراك ، و انت فاكرني جاي أفضفضلك ? انا في مصيبة جديدة و كله من تحت راااااااسك !!!

عكاشة : مبحبش اللي يعلق بلاويه على شماعات غيره ، تعال جوة علشان متفرجش علينا الناس

الجني (بعد ما دخلوا) : كان يوم اسود يوم ما طلعتني من المصباح و حققتلك امانيك المجنونة !

عكاشة : هو حد كان ضربك على ايدك ? ما كنت ترفض و خلاص

الجني : ما هي دي المصيييييـبة .. اني مرفضتش ، و المفروض الجني الشاطر اللي معاه مؤهلات عالية زيي و عنده نظرة مستقبلية كان لما يحس ان في مصيبة هتيجي من ورا واحد ميحققلهوش حاجة و ساعتها كان هيبقى معايا تصريح بكده ، بس أنا للأسف للأسففففف مستغلتش الفرصة دي

عكاشة : انت هتقعد تندب حظك ? خلاص يا سيدي ما اللي حصل حصل

الجني : ياااااادي المصيبة ، اعمل ايه دلوقتي ?!!! منك لله ... منك لله

عكاشة : طب خلاص متعيطش ، قولي ايه مشكلتك يمكن اقدر احلهالك ، مانا بقالي زمن عمال احل في مشاكل مصر و مش بتخلص و في الآخر الناس بتنكر الجميل و زعلانين مني

الجني : هو مش انا حذرتك و قلتلك محدش هيحبك ? قولتلي مش مهم انا عايز اكون مشهور ، اهو ده اللي حصل !

عكاشة : لا يا عم بس انا فعلا حليت مشاكل كتير و ولا حد عاجبه حاجة

الجني : طب إديني مثاااال واحد بسسسسسس !

عكاشة : لا لا لا لا لا لا يا عم ، ده مممممش موضوعنا دلوقتي خلينا فيك ، مش معقول تكون شايل مصيبة على راسك و انا اقعد اوصفلك انجازاتي و نجاحاتي و أمجادي ....... لا طبعا !

الجني : يا سيدي قولي حاجة واحدة !

عكاشة : لا مش وقته خلاص .. انت قفلتني يا عم

الجني : ايوة ايوة اعملهم عليا ، براحتك .. انت اصلا مجنوووووون و الدليل .. اللي حصلي من وراك

عكاشة : هو ايه اللي حصل ما تقول ?

الجني : الحكومة بتدور عليا و انا هربان بقالي فترة و مش عارف استخبى فين ، بيقولوا هيسحبوا مني كارنيه النقابة و مش هشتغل تاني اي شغلانة عندكم و هشتغل عندنا بس و ده طبعا بعد ما اقضي فترة العقوبة في السجن

عكاشة : كل واااااحد بياخد جزااااته

الجني (بنرفزة) : و كماااااان ليك عين تتكلم ? ما انت السبب في المصيبة دي كلها ، هو انا مش مأكد عليك متقولش لحد ?

عكاشة : مانا مقولتش لحد طبعا !

الجني : أومال الموضوع اتعرف من فييييين ? قولي !

عكاشة : معرفش و انا مالي ، تلاقي عندكم التحريات شغالة عال العال

الجني : الظاهر ده اللي حصل ، المهم اني عرفت من صاحبي التفاصيل و انهم عايزين يمسكوني علشان اتسببت في مصيبة كبيرة عندكم هنا لما وافقت اعملك قناة و اني غلطت غلطة لا تـُـغتفر و مفيش حلول وسط ، لازم أتسجن ، منك لله ربنا ينتقم منك يا شيخ !!! و دلوقتي مقداميش غير اني اختفي عندكم هنا شوية لحد ما الاقي حل للمصيبة دي

عكاشة : طب صحيح لاقيتلك حل عبقري ، انا عن نفسي بستعمله على طول

الجني : إلحقني بـيييييييه ، و لو اني مش مصدق ان ممكن حاجة عدلة تيجي من وراك

عكاشة : احنا هنغلط و لا ايه ? عايز الحل و لا لأ ? ده حل جامد جدا

الجني : اتفضل قووووول

عكاشة : انت تنكررررررر ... تنكر اي صلة ليك بيا و تنكر اي علاقة ليك بالقناة دي من أساسه

الجني : هو ده الحل يا حـِدِق ?

عكاشة : أوماااااال ، ده حل جامد ، على طول بستعمله ، أي حاجة تحصل و اتفضح فيها ، أطلع أقول : مـحـصصصصصلـشي ، و الشاطر يثبت ، يجيبوا فيديوهات و أقول متفبركة و حلني بقى على ما يثبتوا انها مش متفبركة اكون طلعتلهم بحاجة جديدة ، شغل عفاريت بقى

الجني : عندنا مينفعش الكلام ده و هيثبتوا عليا التهمة و هيتشدد كمان العقاب علشان انكرت و ضللت العدالة

عكاشة : صدقني هو ده الحل و شغال معايا زي الفل لحد دلوقتي ، يقولولك بوست ايد صفوت الشريف ، طلعت قلت لا طبعا ، أنا ابوس ايد صفوت ? لييييه ? ده هو اللي يبوس ايدي ، و دلوقتي ناشرين خبر قال ايه ، في ألوفات تحت بيتي بيطالبوا بنزولي و تسليمي ، طبعا انكرت و بعتلهم قولت انهم عشرين تلاتين واحد من الحاقدين و اللي مش عايزيني أنجح و لا عايزين مصر تستقر ، أقلية طبعا

الجني : آه صحيح ، ايه كمية الناس الرهيبة اللي تحت بيتك دي ، انا واجهت مشكلة علشان اوصل بالرغم من اني جني و محدش شايفني بس اعداد رهيبة ، كنت بتقول ايه بقى ? كام ?

عكاشة : عشرين تلاتين

الجني : طب اطلع كده خد بصة خفيفة ?

عكاشة : يا عم مانا عااااارف ، انت برضه مفهمتنيش ، ما هو ده اللي بتكلم عليه ، الانكار هو الحل

الجني : يا حبيبي في كاميرات تحت بتصور اللي بيحصل يعني هيطلع شكلك وحش قويييييييييي

عكاشة : لا مانا ساعتها هقول انهم كانوا عشرين واحد لما انا كنت متابع و الظاهر كده الله اعلم انهم فضلوا يلموا ناس لحد ما العدد زاد قوي بس انا مش فاضي كل شوية اطلع اعدهم ، و انا فاضيلهم ? ورايا قضايا اهم تخص بلدي

الجني : يا سلااااام عالوطنية ، برضه محلتليش المصيبة الي انت سببتهالي

عكاشة : عندي حل تاني ، انت كنت نصحتني بيه زمان ، فاكر ?

الجني : خلصني مش وقت فوازير

عكاشة : بص انت تعمل عبيط ، و مثــّـل عليهم انك مجنون ، عالاقل مستشفى المجانين ارحم من السجن و لا ايه ?

الجني : بس انا مقلتش تمثل انك مجنون ، لانك مجنون بحق و حقيقي و مش محتاج تمثل

عكاشة : متدقــّـش ، المهم انت بس روح سلم نفسك و في المحكمة او في القسم اعمل عليهم حركتين كده ، و كل ما ييجي الظابط يسألك اي سؤال لافـــيه انت بسؤال برضه ، يعني مثلا اسأله حزمة الجرجير فيها كام عود ? هتلاقيه اسبهل و معرفش يجاوبك فانت تستغل الفرصة و تقوله ، بس كده .. يبقى انا بريء يا بيه

الجني : انت باين عليك اهبل فعلا ، هو احنا في مسلسل عربي ?

عكاشة : و الله انا حاولت اساعدك ، انت بقى اللي مفيش منك امل

الجني : هي دي بقى الطرق اللي كنت بتساعد بيها الناس و هما ناكرين للجميل مش كده ?

عكاشة : يعني حاجة زي كده ، الحل الاخير بقى هو انك تيجي تعيش عندنا ، و ممكن تشتغل معايا هلاقيلك شغلانة حلوة و كويسة عندي في القناة

الجني : مينفعش .. مينفعش .. خلاص خلاص سيبني في حالي مش عايز من وشك حاجة ، بس لو حصلي اي حاجة ابقى اعرف ان انت السبب

عكاشة : كالعادة ناكر للجميل عامل زي بتوع ميدان التحرير ، انا غلطان اني تعبت نفسي علشان اساعدك

الجني : انا لو ممكن كنت ظهرتلهم تحت و عرفتهم انت في انهي دور بالظبط علشان يجيبوك من قفاك و ياخدولي حقي ، بس يا خسارة

عكاشة : روح يا عم اتحسر بعيد عني

الجني : منك لله ربنا ينتقم منك ، حسبي الله و نعم الوكيل فيك ، أشوف فيك يوووووووم !!!!!

نــظرية (٢) !!!

دي واحدة من النــــظــــريـــات اللي بتعدي علينا في حياتنا

نظرية " خدوهم بالصوت " !!!



تخيل كده و انت قاعد في أمان الله لاقيت حد دخل فيك شمال و بيزعق في موضوع من غير سبب
سواء بقى الموضوع ده كان نقطة خلاف بينكم او خبر هيقولهولك او اي حاجة
المهم ان الحاجة اللي هو بيتكلم فيها متستدعيش الزعيق

أعتقد ان المبرر الوحيد اللي يخلي واحد يدخل عليك يزعق ، انك تكون عامل فيه عملة سودة ^_^

او تخيل كده و انتوا بتتكلموا و انت هادي و كلامك منطقي جدا تلاقي اللي قدامك ده بدأ يتنرفز و يزعق برضه من غير سبب او حتى السبب الوحيد هو انك مقتنعتش بكلامه



دي انا بقول عليها نظرية خدوهم بالصوت ، بيتبعها بعض الناس علشان خايفين من مواجهة غيرهم في موضوع معين و لانهم عارفين ان غيرهم موقفهم أقوى
فبيهربوا بالزعيق !!!

النظرية دي مش جديدة و لا حاجة
بس بتتكرر كتير قوي و بتستفزني جدااااااا

وممكن يكون ليها مسمى تاني .....

نظرية " الزعــــيــــقة " !!!
بدل ما واحد يدخل عليك بابتسامة ، يدخل عليك بزعيقة !!!!

تــِك تــِك !!!

تــِك تــِك .. تــِك تــِك .. تــِك تــِك .. تــِك تــِك .. تــِك تــِك .. تــِك تــِك .. تــِك تــِك !!!!!!!!!!!!!

إنها ليست دقـّـات عقارب الساعة !!!

إنما دقـّـات عــدّ تنازلي لـقنبلة موقوتة !!!

وضعت بالأمس القريب ... مجهولٌ هو ذلك الزمن الذي وضعت فيه بداخلي ، مجهولةٌ هي تلك الأشياء بداخلها مسببة لها الانفجار ، مجهولٌ ما تبقى لها من وقت قبل أن تبدأ بالكلام ، مجهولٌ كيف وضعت بكل تلك الدقة ، حقا لا أستطيع ان أحدد موقعها بالضبط ، فأحيانا أشعر بقلبي يعتصر ألما ، و أحيانا أخرى أشعر بصدري يختنق ، و أحيانا كثيرة أشعر برأسي ساخنة جدا و عندما أضعها على وسادتي يراودني شعور بأنها آخر ليلة لي في هذة الدنيا !!!

مجهولٌ كل شيء ما عدا شيء واحد فـقــط !!!


أعرف مـن الفاعل ، و بيده وحده ان يتخلص منها و يمحيها كما بكل قسوة وضعها ، أشعر بكل دقة من دقاتها تؤلمني بشدة ، قلقة أنا من موعدها فلا أعرف كيف سيكون مصيري حينها ، أخشى على من حولي منها ، فلا ذنب لهم حقا ، أتمنى ان تختفي و تزول قبل أن ... تنفجر !!!

انـت عـُـمْـري !!!

قالتله : كنت فين من زمان ?!

قالها : مش فاهم

قالتله : السؤال واضح

قالها : هو ايه السؤال ?

قالتله : كنت فين من زمان ?!!!

قالها : كنت جاي في السكة

قالتله : ده كده من زمان? لا قبلها?

قالها : كنت في بيتنا بلبس هدومي علشان انزل أركب و آجي

قالتله : لا قبل كده كمان , بقولك من زماااان !

قالها : كنت نايم و صحيت

قالتله : قبلها !!!!!

قالها : كنت بتعشـّى اليوم اللي قبله

قالتله : بقولك من زمااااااان , كنت فين من زمان ?

ابتسم و ...

قالها : مش فاهمك

قالتله : لا انت فاهم السؤال بس بتغلس عليا

قالها : هو ايه السؤال ?

قالتله : مش قايلاه و آدي دقني اهي لو حاولت اكون رومانسية تاني

قالها : بس انتي معندكيش دقن

قالتله : انا غلطانة !!!

قالها : هههههههههه لا خلاص متزعليش مينفعش أنكشك يعني ? كنت بهزر معاكي

قالتله : طب فهمت السؤال ?

قالها : و دي عايزة كلام ?!

قالتله : طب فهمت ايه ?

قالها : كنت بدوّر عليكي

قالتله : دي الإجابة ? كنت بتدور فين تحت السلم ? لا انا عايزة اعرف كنت فين بجد و اتأخرت ليه ?

قالها : كنت تايه في الدنيا بدوّر على زهرتي

قالتله : و لاقيتها ?

قالها : لاقيت أحلى زهرة في البستان :)

قالتله : طب يا ترى قطفت زهرة تانية قبل الزهرة دي ?

قالها : لا أنا عمري ما اقطف زهرة من وسط اخواتها إلا و انا متأكد ان هي دي اللي بحبها

فابتسمت في خجل و ...

قالتله : طب هي فين دلوقتي ?

قالها : هي مين دي ?

قالتله : زهرتك اللي لاقيتها !

قالها : و انتي عايزة تعرفي ليه ?

قالتله : انت مش عايزني اعرف ?

قالها : لا عادي بس انا مش بحب حد يشوفها و لا يعرف مكانها

قالتله : يعني ايه الكلام ده ? هي زهرتك دي فين بالظبط ?

قالها : بس انا مش عايز حد يعرف مكانها

قالتله : ليه و انا هسرقها ? متخافش قولي بس و مش هقول لحد :)

قالها : سايبها في البيت علشان الشمس متجيش عليها فتدبل

بصتله بغيظ و ...

قالتله : نعم ???

ضحك و ...

قالها : بهزر معاكي يا زهرتي انتي اللي فينك من زمان ?!

قالتله : هزارك تـــِقـــِــل قوي على فكرة

قالها : هههههههههه متزعليش ، ما انتي حبيتي واحد غلس هتعملي ايه ! ، جاوبي عالسؤال بقى !

قالتله : كنت مستنياك تلاقيني

قالها : بس انتي كنتي مستخبية مني

قالتله : مش لازم برضه تبذل شوية جهد ?!

قالها : معاكي حق انا غلطان أصلا اني لاقيتك

ضحكت و ...

قالتله : مرة من نفسي أغلس بقى ، لا بس بجد ، دي سنة الحياة ، مفيش زهرة بتكون واقفة لوحدها و إلا هتدبل ، انت مشوفتنيش بس علشان حواليا كان في زهور كتير بس انا لو اعرف انه انت كنت ندهت عليك

ابتسم و ...

قالها : بس انتي زهرة مميزة كنت مفروض خدت بالي على طول بس انا اللي اعمى

قالتله : سلامتك متقولش كده !

قالها : ربنا يحفظلي عيني اللي بشوفك بيها على طول

قالتله : بس انت اتأخرت عليا

قالها : غصب عني و الله

قالتله : ملكش عذر علشان تتأخر التأخير ده كله

قالها : الحمد لله اني لاقيتك و آسف مش هتأخر عليكي تاني في أي حاجة

قالتله : وعد ?

قالها : أوعدك !

قالتله : اللـي شـفـتـه ....

قالها : ... عـمـر ضــايع !

قالتله : انت عـُـمْـري !!!!!! =)

___________________________

مـن وحـــي خيــالــي :)

١٧ ديسمبر ٢٠١١

اسـتـنـتـاج !!!

بعد بداية كل ثورة لا بد من التوصل لاستنتاج، لا بد من التمحيص و التدقيق فيها و استخراج عيوبها و مميزاتها، لا بد من نقدها و التفكير و التأمل فيها، و لا بد من تسجيل أحداثها لحظة بلحظة !!!.

في الحقيقة كنت أتمنى أن أكون من ضمن هؤلاء الذين يسجلون أحداث ثورتنا العظيمة بكل تفاصيلها و ذلك من أجل التاريخ، و لكن ظروف وقتي و دراستي و الاهتمام بمجالي الذي عن طريقه سوف أخدم بلدي لم تسمح لي، بالإضافة إلى أنني كنت مـُغيبة في بعض الأوقات من هذا العام و متابعة بشدة في أوقات أخرى ; فلا أصلح أن أكون مؤرخة لما حدث بالكامل، و لكن ان استطعت ربما في وقت لاحق أن أقوم بتجميع ما شاهدت و تعلمت منها على الصعيد الشخصي.

كلٌ منا كما ذكرت بالضرورة له تعليق او استنتاج على الثورة، أهم استنتاج يشغل تفكيري حاليا هو أن الثورة بجميع أحداثها أثبتت للعالم أجمع بأن مصر العظيمة التي لا أحتاج للحديث عن تاريخها و مكانتها بين جميع الدول، تضم جميع فئات المجتمع المصري التي سمعنا عنها مرارا و تكرارا و لكن لم نشهدها و نشعر بها حقيقة بشكل واقعي و كبير و "عالملأ" إلا مع أحداث هذه الثورة المذهلة.

يضم المجتمع المصري جميع الفئات و الأطياف و الأنواع من الناس، يوجد العاقل ذو الكلام الموزون المنطقي المسموع و يوجد المجنون ذو الكلام "اللاسع" المتهور الغير منطقي بالمرة، يوجد الوطني المخلص الوفي لوطنه و يوجد الخائن للوطن و الحريص فقط على مصالحه الشخصية، نجد من يسعى للحرية و العيش بشرف لأنها من أقل حقوقه و نجد من يستخدم أقبح و أبشع و أحقر الوسائل لتحقيق أطماعه، نجد المواطن الشريف و نجد المرتشي رخيص السعر، نجد المسلم و المسيحي و اليهودي و العلماني و الليبرالي، نجد السلفي و الإخواني و نجد المسلم الذي يفضل عدم الانتماء لجماعة بعينها، نجد الكاثوليكي و الأرثوذكسي، يوجد الشهيد و يوجد البلطجي قاتل ذلك الشهيد، يوجد مذيع الإعلام المصري المزيف و يوجد مذيع الإعلام الآخر الحقيقي، نجد من يبرر أفعاله بلا شيء و يتبعها بأفعال أقبح و نجد من يبرر أفعاله بمبررات مقبولة و يعترف بأخطاءه و يتوخى الحذر بعد ذلك، يوجد من يؤيده الجميع و يوجد من يهاجم من الجميع بدون إعطاءه الفرصة لإثبات بعضا من أهليته فيما وُكـّل إليه، يوجد من هو مدرك لما يحدث جيدا و يوجد من هو مغيب لا يدري و لا يشعر بشيء سوى أن ثورة ما قد قامت، يوجد المتفائل بالمستقبل و المتشائم، نجد الصريح الواضح من البداية و له مواقف ثابتة و نجد المنافق الذي يقف في الجانب الأقوى دائما خوفا على نفسه، و يوجد غيرهم الكثيرين، و لكن ذلك لا يبرر ما وصلت إليه مصر الآن!.

لأن في تصوري، أعداد الأشخاص العاقلين أكبر بكثر من المجانين، و أعداد المواطنين الشرفاء يتفوق على المجرمين بمراحل، و الإختلاف في العقيدة لن يمنع وصولنا إلى نقطة تـُرضي جميع الأطراف و لا يبرر ما يحدث من اختلاف يزيده سوءا و يكبر من حجمه من لا يريدون لمصر أن تصل لما ترضى به من استقرار و تقدم، لأنهم ببساطة سعداء بتلك العشوائية التي باتت بها مصر الآن بدون ضوابط تـمسك عليهم أفعالهم التي يظنون بأنها خفية وسط الضوضاء، و نجد أن كل ما يمكن لأي مواطن أن يفعله هو أن يرمي و يقذق بالاتهامات على الآخرين حتى لا تطوله أيادي الاتهام.
لا مبرر لما نحن فيه الآن حقا لأن اختلاف الأطياف و الأنواع التي ذكرتها لم تمنع أي دولة أخرى غيرنا من المضي و التقدم إلى الأمام.

و ها هي الثورة قد قاربت على أن تتم عاما من عمرها و أثبتت للعالم أن مصر فريدة من نوعها و صامدة رغم أنف الجميع !!!.

لكِ الله يا مصر
=)

خديجة غتوري
٣١ ديسمبر ٢٠١١

Be Happy !!!

Yesterday,
I felt a sleep wishing happiness ..
for everyone,
because ..
I was So Happy !

Al7amdolellah
=)

عــُكاشة !!!

مشهد رقم ١ :

توفيق عكاشة بعد هروبه من مكان ما و اثناء اختباءه في صحراء مصر
لقى مصباح علاء الدين
دعكه على أمل يحقق أكبر احلامه

طلعله الجني : شـُبيييك لـُبيييك !!!

قاله : انا نفسي اكون مشهور قوي قوي و كل الناس تعرفني , زي الناس الكتير اللي بيطلعوا في التلفزيون

الجني : طب ليه عايز تكون مشهور ?

عكاشة : علشان ملقتش حد شباب في سنـّي يستاهل يكون مشهور و الناس تعرفه

الجني : بص يا ابني , انا مقدرش بحركة صباع واحدة اخليك مشهور لان احنا كده هنلعب في حاجة برة سيطرتي و هي ذاكرة البني آدمين , مقدرش اتحكم في ذاكرة حد يصحى الصبح يعرفك , و كمان انت عايزني اخلي كل الناس تعرفك , صعبة دي اطلب اي حاجة تانية

عكاشة : لا انا عايز دي مليش دعوة

الجني : يا ابني مينفعش اطلب اي حاجة تانية

عكاشة : لا انا عايز دي , عايز دي , انت مش جني ? اتصرف !

الجني : يا حبيبي ما انت عندك حاجات تانية كتير تطلبها , فلوس مثلا

عكاشة : طب الفلوس هتخليني مشهور ?

الجني : مش شرط , مقدرش اوعدك بكدة بس ممكن الفلوس تساعدك

عكاشة : طب انا ليا كام طلب ?

الجني : تلاااااتة

عكاشة : خلاص اول طلب ليا عايز اكون عندي فلوس كتير قوي قوي

الجني : و تاني طلب ?

عكاشة : عايز اكون مشهور

الجني : ما قلتلك ما ينفعش يا حبيبي متنرفزنيش علشان لما بتنرفز برجع المصباح تاني و مش هطلعلك بعد كده خلصني بقى

عكاشة : طب قولي ازاي ممكن اكون مشهور ساعدني باي فكرة

الجني : عندك اي موهبة ? بتعرف تغني ? بتعرف تمثل ? ليك في السياسة ?

عكاشة : لا

الجني : طب بلاش دول , ليك مؤهلات ايه ممكن تشتغل بيها في اي مجال في التلفزيون حتى لو ورا الكاميرات ?

عكاشة : مفيش

الجني : طب انت بتعرف تعمل ايه يا حبيبي ?

عكاشة : بعرف اتكلم , بيتهيألي ده كفاية علشان اطلع في التلفزيون

الجني : تتكلم تقول ايه ?

عكاشة : اي حاجة

الجني : ما انت لو بتقول كلام مش مهم محدش هياخد باله منك و محدش هيرضى يطلعك في التلفزيون عالقناة بتاعته

عكاشة : هو لازم يوافقوا على كلامي علشان اطلع ?

الجني : طبعا

عكاشة : خلاص انا هعمل القناة بتاعتي بالفلوس بتاعتي اللي هتديهالي

الجني : لا بس دي هتحتاج منك اجراءات كتير و موافقات و هتاخد وقت على ما تفتح قناة , الموضوع مش بالسهولة دي عالواقع

عكاشة : انا عرفت ايه الطلب التاني

الجني : ايه ?

عكاشة : عايزك تفتحلي قناة جاهزة

الجني : ممكن بس دي صعبة قوي لو فتحتلك قناة جاهزة مش هيكون ليك عندي طلب تالت

عكاشة : مش مشكلة مش عايز طلب تالت عايزك بس تديني افكار ممكن اقول ايه اشد بيه انتباه الناس

الجني : انا جاتلي فكرة معرفش هتنفع و لا لأ , بس دايما بيقولوا "خالف تـُعرَف"

عكاشة : مش فاهم

الجني : يعني اتكلم عكس ما الناس بتتكلم و هتلاقي الناس خدت بالها منك

عكاشة : طب ما في ناس كتير تانية بتتكلم عكس الناس التانية , لا انا عايز حاجة تكون مختلفة قوي

الجني : انت ممكن تسوق الهبل عالعبط هتلاقي الناس كلها خدت بالها منك
يعني زي مبيقولوا برضه "عـُـك و لـَيـّـس كـله كويس"
بس استحمل بقى الشتيمة و التهزيق و التريقة معلش

عكاشة : يعني اقول اي حاجة ?

الجني : قول كل اللي انت عايزه

عكاشة : و هبقى مشهور قوي ?

الجني : ايوة متقلقش

عكاشة : يعني ممكن اتكلم عن نفسي مثلا

الجني : انت ممكن تعمل البرنامج عن قصة حياتك و لو انك مش هتلاقي حاجة تحكيها

عكاشة : يعني مهما قلت هتتذاع في التلفزيون ?

الجني : ايوة , مش القناة بتاعتك ? متتعبنيش بقى

عكاشة : يعني كل المشكلة بس ان الناس مش هتحبني ? بس هكون مشهور ?

الجني : ايوة خلصني بقى انت متعب قوي

عكاشة : طب خلاص انا موافق

الجني : متأكد ???

عكاشة : ايوة متاكد

الجني : خلاص انت حر بس استحمل نتيجة افعالك !

عكاشة : عايز القناة تكون اسمها قناة المجانين

الجني : لا كده محدش هيتفرج عليك لازم حاجة تكون اسمها من وحي مصر و تاريخها , انا بنصحك لمصلحتك

عكاشة : اصل انا وعدت صحابي اول ما اهرب هعملهم جــِـميلة كبيرة و مش هنساهم و هخليهم مشهورين زيي

الجني : تهرب من فين ? السجن ?

عكاشة : لا مستشفى المجانين , واخديني ظلم و بيقولوا عليا مجنون

الجني : بيقولوا عندك ايه ? جنون العـَظـَمة ?

عكاشة : و حاجات تانية كتير

الجني : ماهو واضح

عكاشة : خلاص اتفقنا على اسم القناة ?

الجني : لا انا لسه عند رأيي , انت ممكن تختار حاجة على نفس الوزن علشان صحابك ميزعلوش

عكاشة : خلاص قناة الفراعنة المجانين

الجني : انت لسه مصرّ برضه ? خليها الفراعين , بس حلوة قوي , و لو قلت حرف زيادة هسخطك ضفدع و ادخل المصباح و مش هتعرف تطلعني تاني

عكاشة : خلاص خلاص اي حاجة المهم اكون مشهور

الجني : طلباتك هتكون عندك في وقت قصير ,
و بعد ما عرفت انت هربان من فين دلوقتي بس اطمنت عليك هتلاقي اي كلام تقوله متقلقش و هتتشهر قريب جدا

عكاشة : بس بسرعة , عايز الحق اعمل شوية شغل

الجني : انا هطلب منك طلب مهم بالنسبالي
متجيبش سيرتي لاي حد علشان لو اتعرف اني ساعدتك هيتسحب مني كارنيه النقابة

عكاشة : و انا مجنون علشان اقول ان في حد ساعدني ? و بعدين ايه ده ? جني و بيتأمر كمان ? اما حاجة غريبة , احنا عندنا في البلد كنا ندعك المصباح يطلعلنا الجني يبوس الايادي لحد ما نرضى عنه

الجني : انت هتستهبل !!! هو في اصلا مصباح واحد حتى عندكم

عكاشة : أومال !!!

الجني : طب ليه لحد دلوقتي محققتش امنيتك من اي جني تاني يا حدق و لا انت غاوي تقرفني و خلاص ?

عكاشة : لا دول مبيفهموش , اطلب حاجة يجيبلي حاجة تانية و يقولي دي احسن , اقوله فين اللي انا طلبته ? , يقولي اللي انت عايزه ده مفيش منه و مينفعش يتجاب , فبراضيه بأي كلمتين حلوين و خلاص

الجني : طب انت طلبت ايه منه مثلا ?

عكاشة : طلبت مرة اني اكون رئيس جمهورية , قالي لا دي متنفعش

الجني : هههههههههههه ايوة طب ما اللي قاعد ده نوديه فين ?

عكاشة : طب ما كان يشاركني معاه كده , و لا هو ياخد المجد لوحده يعني ?

الجني : لا انت بصراحة طلباتك مش معقولة

عكاشة : لا يا عم انتوا اللي ســَكـّـة و اي كلام

الجني : يا صبر ايوب عالعالم المجانين دي انا ايه اللي بيوقعني الوقعات السودة دي بس !



انتهاء المشهد


ملحوظة : يبدو ان اختباء عكاشة في الصحراء لفترة طويلة ادى لاصابته بلسعة شمس و زيادة الاعراض الظاهرة عليه بالرغم من تلقيه لعلاج لفترة طويلة كانت قد قاربت على شفاءه او كما يظن البعض ^_^
_________________________

"عـُـك و لـَيـّـس كـله كويس" ... مقتبسة من صديقتي راندا بسيوني :)

كان المفروض المشهد يتكتب بلهجة عكاشة الاصلية بس الحقيقة فضلت اكتبها عادي علشان لو حد ميعرفهوش هيفكرني بتريق على لهجة ناس معينة فكل واحد يتخيل اللهجة بطريقته ^_^

دواير | مروان خوري | !!!

أنا عادتي اني مش بسمع اغاني كتير
و تقريبا حاليا مش بسمع غير لناس معينة و بسمع حاجات معينة
لان خسارة الواحد يضيع وقته على أغاني ملهاش هدف و لا معنى

دي من ضمن الأغاني اللي بتأثر فيا بشكل كبير و بحبها قوي
يمكن علشان أنا كئيبة و بحب الكـآبة ^_^
و يمكن علشان الأغنية بتنطبق على اكتر من حاجة
و ممكن تناسب اي شخص و اي موقف
و يمكن علشان احساسها عالي

يمكن بالنسبالكم الأغنية مش بتمثل أي حاجة
بس بالنسبالي دي كانت من اكتر الأغاني اللي اتأثرت بيها جدا جدا
بالرغم من انها حزينة و كئيبة
بس الحياة من غير حزن ملهاش طعم .. صدقوني ^_^

ملحوظة : بغض النظر عن ان انا متأثرة بالأغنية دي من قبل كده و حبي ليها ملهوش علاقة باللي بيحصل دلوقتي
بس انا اخترت الفيديو اللي بيضم مشاهد من الثورة لان احنا فعلا دلوقتي عاملين زي ما نكون بنلف في دواير ملهاش اول من آخر
و حاليا ده اكتر فيديو ممكن يعبر عن الأغنية بشكل كافي !!!

لكن هي ممكن تنطبق على أي حاجة في حياتنا !

بنلف فـ دواير و الدنيا تلف بينا , دايما ننتهي لمطرح ما ابتدينا , طيور الفجر تايهة في عتمة المدينة .. بتدور

بنلف فـ دواير ندور عالأمان , و نلاقينا رجعنا تاني لنفس المكان , ساكنين في عالم يعشق الخطر .. !!!

حـِـداد !!!

حدااااااد

حداد على أرواح الشهداء

حداد على كرامة المصري الضائعة

حداد على المصابين و المعتقلين

حداد على أبشع انواع المعاملة

حداد على عــِـرض النساء المــُنتـَهـَـك

حداد على دمِ الشباب المــُسال


حداد على جيش مصر الذي مات و اندفن منذ زمن

جيش مصر الذي اختــُطــِـف و تم استبداله بكائنات غريبة


حداد على الإنسانية

حداد على النـّـخـْوَة

حداد على الرجولة


حداد على من مفترض انهم حاموا الثورة

حداد على من كانوا خير جنود الأرض


أين ذهب الجيش المصري ?


أين ذهب الرجال ?


لكِ الله يا مصر


حداااااد !!!

:' (

آســــفــــة !!!

قالتله : آسفة !!!

قالها : مبزعلش

قالتله : بس أنا خذلتك بجد آسفة

قالها : بس أنا مش بزعل منك

قالتله : بس أنا جرحتك من غير ما اقصد و غصب عني , بجد آسفة

قالها : الجرح منك خفيف على قلبي

قالتله : يا سلام !!!

قالها : آه و الله و بقولك مش زعلان

قالتله : أنا برضه آسفة

قالها : متخافيش أنا مش زعلان

قالتله : آسفة و كل مرة هشوفك هقولك آسفة

قالها : انتي حرة بس أنا مش زعلان

قالتله : آسفة

قالها : بطلي تتأسفي

قالتله : آسفة و الله آسفة و مش عارفة اعمل ايه علشان اعبر عن أسفي

قالها : ممكن تبطلي ?

قالتله : حاضر , ممكن تسامحني ?

قالها : و بعدين ???

قالتله : حاضر

قالها : أخيرااااااا !!!

قالتله : بس أنا مش عارفة إزاي مقولكش آسفة

قالها : سهلة , تصدقي اني مش زعلان

قالتله : مش قادرة

قالها : انتي عنيدة قوي

قالتله : آسفة

قالها : و الله مش زعلان مش زعلااااان

قالتله : حتى لو انت مش زعلان أنا هفضل حاسة اني آسفة

قالها : حرام عليكي كفاية

قالتله : آسفة

قالها : حاولي تاني

قالتله : حاضر

قالها : حاولي بجد

قالتله : حاضر و الله

قالها : طب الحمد لله يعني أطمن ?

قالتله : مش عارفة

قالها : يعني ايه ??

قالتله : علشان أنا لسه حاساها

قالها : يبقى محاولتيش

قالتله : بجد آسفة أرجوك تسامحني

قالها : مسامحك يا ستي كفاية أسف بقى

قالتله : بجد بجد بجد آسفة

قالها : انتي دماغك جزمة قديمة

قالتله : كده ?!!!

قالها : متزعليش بس انتي مش راضية تسمعي كلامي و بحاول معاكي بأي طريقة يمكن تنفع أعملك ايه ?!

قالتله : متعملش حاجة مفيش حل و هفضل آسفة

قالها : آآآآه ياني من البنات

قالتله : عايزة أقولك حاجة و امشي ممكن ?

قالها : اتفضلي

قالتله : آسفة !

قالها : يعني مفيش فايدة ?

قالتله : مفيش فايدة أنا لسه آسفة

قالها : تعرفي انك صدعتيني ?

قالتله : آسفة علشان صدعتك

قالها : طب انتي ليه بتعملي كده

قالتله : انت اللي ليه مش راضي تفهم اني بجد حاسة بأسفي ?

قالها : و افهم ليه و أنا اصلا مش زعلان

قالتله : ما انت أكيد مش زعلان علشان مش فاهم أنا بتأسف ليه

قالها : لا فاهم يا ستي و الله

قالتله : و برضه مش زعلان ?

قالها : لو عايزاني ازعل , هزعل علشانك

قالتله : لا أكيد مش عايزاك تزعل بس أنا مش قادرة اصدق انك مش زعلان و حاسة انك مش واخد بالك من غلطتي علشان كده مش زعلان دلوقتي و هتيجي قدام تزعل بعد كده

قالها : أنا فاهم كل حاجة أنا مش غبي

قالتله : يبقى اكيد في حاجة غلط

قالها : يعني لو قلتلك زعلان يبقى كده كل حاجة هتبقى تمام ?

قالتله : مش عارفة و الله أنا مبقتش عارفة أنا عايزة ايه

قالها : و أنا على عكسك عارف اني مش زعلان

قالتله : أنا عمري ما هسامح نفسي بجد آسفة

قالها : يا ستي انا مسامحك و هو المفروض مين فينا اللي زعلان ?

قالتله : انت !

قالها : يعني مين اللي المفروض يسامحك ?

قالتله : انت !

قالها : يعني مش انتي اللي بتسامحي نفسك , أنا مسامحك و مسامح نفسك , خلاص كده خالصين ?

قالتله : بس انت أكيد زعلان

قالها : أنا مش زعلان منك , هتعرفي اكتر مني ?

قالتله : مستحيل تكون مش زعلان و لو حتى زعل بسيط , انت اكيد زعلان و مخبي

قالها : بصي ماهو لو أنا زعلان فعلا يبقى الاسف مش هيفرق في حاجة , و لو أنا مش زعلان زي ما بقولك يبقى الاسف الكتير ده بيستفزني

قالتله : آسفة مش قصدي أستفزك و الله

قالها : طب أنا مش هسيبك إلا لما تبطلي تقوليها و يبقى آخر كلمة منك أي حاجة غير آسفة دي

قالتله : خلاص متزعلش

قالها : و لا حتى دي

قالتله : طب انت عايز ايه ?

قالها : أي كلمة تانية

قالتله : خلاص سلام

ابتسم ابتسامة انتصار

و قالها : سلام

سابتله ورقة في إيده

و قالتله : كانت معايا من زمان و عايزاك تقراها بس متفتحهاش إلا لما امشي خالص

قالها : ليه ?

قالتله : هو كده و خلاص

قالها : حاضر

قالتله : وعد ?

قالها : وعد

ابتسمت و مشيت

فتح الورقة لقى مكتوب فيها :::

آســــفــــة !!!!!!!!!!!!!!!!!

ابتسم قلبه و قال بصوت رقيق : مسامحك !!!!!! =)

___________________________

مـن وحـــي خيــالــي :)

٢ ديسمبر ٢٠١١

أكثرها قسوة !!!

أكثر الدروس قسوة هي تلك التي من صنع أيدينا !!!

يمكن أن نتعلم دروسا عديدة في الحياة باختلاف معلميها في كل مرة
و لكن أصعبها و أكثرها ألما و حدّة
عندما يكون المعلم هو انت !!!

فبصنع يديك و باستخدام أصابعك التي اعطاك الله
خلقت درسا قاسيا و علمته لنفسك في وقت قليل و مكثــّـف
كمثل تلك "الكورسات" المكثـفة التي نسمع عنها قبل الامتحانات بشهر واحد :/

يـــــا لقسوة الظروف !!!
لا انها ليست الظروف
بــل يا لقسوتنا و نحن نرمي أخطائنا على الظروف و نحمـّـلها أعباء ما فعلنا !
=(

تلك الدروس التي نصنعها بأيدينا تكمن صعوبتها عن غيرها في أننا ارتكبنا أخطاءا بأنفسنا
و ذقنا مرارتها و احترقنا بنيرانها و أغمسنا خبزا في دمائنا لنتذوقه بألسنتنا

أتدركون كم هي صعبة تلك الدروس ?

عندما نتعلم درسا في الحياة عن طريق شخص آخر هو الطرف السيء في الموقف
يكون ذلك أفضل بكثير من أن نرتكب أخطاءا يؤلمنا في داخلنا مجرد التفكير في
"كيف فعلناها"!
عندما نرتكب أخطاءا حتى إذا سامحنا عليها الآخرون ظلت محفورة في اعماقنا تجرحنا باستمرار
لا نستطيع الشفاء منها مهما طال بنا الزمن و لا نستطيع ان نسامح أنفسنا عليها
لأننا تركنا الجانب القبيح فينا ينتصر على ذلك الجانب البريء النقي الذي كان دائما له الغلبة
و لا ندرك حتى الآن كيف انتصر عليه ذلك الآخر انتصارا ساحقا سريعا مدويا و هزمه هزيمة نكراء

ربما لو كان الجانب القبيح منتصرا من البداية دائما لاعتادت ضمائرنا و أنفسنا على ذلك
و ما كنا لنشعر بالألم عندما يجرح الجانب القبيح الجانب البريء فينا

عندما يسيطر على شخص شعور الغضب و الألم من شخص آخر
فيتهور في أفعاله و أقواله بناءا على احساسه بالظلم من قبل ذلك الشخص
ليجرح هو أيضا شخص آخر بدوره
ليصل الألم نفس الشخص الذي أخطأ في حقه
او يصل أشخاصا آخرين معه

ذلك الشعور بالندم و الأسف و الحزن العميق جدا
نتيجة لفعل اقترفته و انت في غير وعيك
لتشعر انك قد علمت نفسك أكبر درس من دروس الحياة


بغض النظر عن مسامحة الشخص لك أو عدم قدرته على مسامحتك
بغض النظر عن اذا كنت سوف تستطيع النظر في عينيه و الحديث معه
بغض النظر عن ان التعامل بينكم سوف يعود كما كان
و لكن شعورك اتجاه نفسك قد تغير و لن يعيده مجرد انتهاء الأمور بشكل جيد
أو مرور الموقف بشكل هادئ أو بتعبير آخر "ستر ربنا" ان الامر لم يأخذ منحدر عميق و لم تطول المشكلة

و لكن شعورك اتجاهك و مسماحتك لنفسك ربما تعود عندما تكتشف السر وراء انتصار قــُـوى الشر بداخلك
و بعد التفكير مليا في كيفية منع حدوث ذلك مرة اخرى و التأكد من نجاحك في ذلك

ما أصعب أن تكون معلما لنفسك
حقا شيء قاسي جدا جدا جدا !!!

=(