عــُكاشة !!!

مشهد رقم ١ :

توفيق عكاشة بعد هروبه من مكان ما و اثناء اختباءه في صحراء مصر
لقى مصباح علاء الدين
دعكه على أمل يحقق أكبر احلامه

طلعله الجني : شـُبيييك لـُبيييك !!!

قاله : انا نفسي اكون مشهور قوي قوي و كل الناس تعرفني , زي الناس الكتير اللي بيطلعوا في التلفزيون

الجني : طب ليه عايز تكون مشهور ?

عكاشة : علشان ملقتش حد شباب في سنـّي يستاهل يكون مشهور و الناس تعرفه

الجني : بص يا ابني , انا مقدرش بحركة صباع واحدة اخليك مشهور لان احنا كده هنلعب في حاجة برة سيطرتي و هي ذاكرة البني آدمين , مقدرش اتحكم في ذاكرة حد يصحى الصبح يعرفك , و كمان انت عايزني اخلي كل الناس تعرفك , صعبة دي اطلب اي حاجة تانية

عكاشة : لا انا عايز دي مليش دعوة

الجني : يا ابني مينفعش اطلب اي حاجة تانية

عكاشة : لا انا عايز دي , عايز دي , انت مش جني ? اتصرف !

الجني : يا حبيبي ما انت عندك حاجات تانية كتير تطلبها , فلوس مثلا

عكاشة : طب الفلوس هتخليني مشهور ?

الجني : مش شرط , مقدرش اوعدك بكدة بس ممكن الفلوس تساعدك

عكاشة : طب انا ليا كام طلب ?

الجني : تلاااااتة

عكاشة : خلاص اول طلب ليا عايز اكون عندي فلوس كتير قوي قوي

الجني : و تاني طلب ?

عكاشة : عايز اكون مشهور

الجني : ما قلتلك ما ينفعش يا حبيبي متنرفزنيش علشان لما بتنرفز برجع المصباح تاني و مش هطلعلك بعد كده خلصني بقى

عكاشة : طب قولي ازاي ممكن اكون مشهور ساعدني باي فكرة

الجني : عندك اي موهبة ? بتعرف تغني ? بتعرف تمثل ? ليك في السياسة ?

عكاشة : لا

الجني : طب بلاش دول , ليك مؤهلات ايه ممكن تشتغل بيها في اي مجال في التلفزيون حتى لو ورا الكاميرات ?

عكاشة : مفيش

الجني : طب انت بتعرف تعمل ايه يا حبيبي ?

عكاشة : بعرف اتكلم , بيتهيألي ده كفاية علشان اطلع في التلفزيون

الجني : تتكلم تقول ايه ?

عكاشة : اي حاجة

الجني : ما انت لو بتقول كلام مش مهم محدش هياخد باله منك و محدش هيرضى يطلعك في التلفزيون عالقناة بتاعته

عكاشة : هو لازم يوافقوا على كلامي علشان اطلع ?

الجني : طبعا

عكاشة : خلاص انا هعمل القناة بتاعتي بالفلوس بتاعتي اللي هتديهالي

الجني : لا بس دي هتحتاج منك اجراءات كتير و موافقات و هتاخد وقت على ما تفتح قناة , الموضوع مش بالسهولة دي عالواقع

عكاشة : انا عرفت ايه الطلب التاني

الجني : ايه ?

عكاشة : عايزك تفتحلي قناة جاهزة

الجني : ممكن بس دي صعبة قوي لو فتحتلك قناة جاهزة مش هيكون ليك عندي طلب تالت

عكاشة : مش مشكلة مش عايز طلب تالت عايزك بس تديني افكار ممكن اقول ايه اشد بيه انتباه الناس

الجني : انا جاتلي فكرة معرفش هتنفع و لا لأ , بس دايما بيقولوا "خالف تـُعرَف"

عكاشة : مش فاهم

الجني : يعني اتكلم عكس ما الناس بتتكلم و هتلاقي الناس خدت بالها منك

عكاشة : طب ما في ناس كتير تانية بتتكلم عكس الناس التانية , لا انا عايز حاجة تكون مختلفة قوي

الجني : انت ممكن تسوق الهبل عالعبط هتلاقي الناس كلها خدت بالها منك
يعني زي مبيقولوا برضه "عـُـك و لـَيـّـس كـله كويس"
بس استحمل بقى الشتيمة و التهزيق و التريقة معلش

عكاشة : يعني اقول اي حاجة ?

الجني : قول كل اللي انت عايزه

عكاشة : و هبقى مشهور قوي ?

الجني : ايوة متقلقش

عكاشة : يعني ممكن اتكلم عن نفسي مثلا

الجني : انت ممكن تعمل البرنامج عن قصة حياتك و لو انك مش هتلاقي حاجة تحكيها

عكاشة : يعني مهما قلت هتتذاع في التلفزيون ?

الجني : ايوة , مش القناة بتاعتك ? متتعبنيش بقى

عكاشة : يعني كل المشكلة بس ان الناس مش هتحبني ? بس هكون مشهور ?

الجني : ايوة خلصني بقى انت متعب قوي

عكاشة : طب خلاص انا موافق

الجني : متأكد ???

عكاشة : ايوة متاكد

الجني : خلاص انت حر بس استحمل نتيجة افعالك !

عكاشة : عايز القناة تكون اسمها قناة المجانين

الجني : لا كده محدش هيتفرج عليك لازم حاجة تكون اسمها من وحي مصر و تاريخها , انا بنصحك لمصلحتك

عكاشة : اصل انا وعدت صحابي اول ما اهرب هعملهم جــِـميلة كبيرة و مش هنساهم و هخليهم مشهورين زيي

الجني : تهرب من فين ? السجن ?

عكاشة : لا مستشفى المجانين , واخديني ظلم و بيقولوا عليا مجنون

الجني : بيقولوا عندك ايه ? جنون العـَظـَمة ?

عكاشة : و حاجات تانية كتير

الجني : ماهو واضح

عكاشة : خلاص اتفقنا على اسم القناة ?

الجني : لا انا لسه عند رأيي , انت ممكن تختار حاجة على نفس الوزن علشان صحابك ميزعلوش

عكاشة : خلاص قناة الفراعنة المجانين

الجني : انت لسه مصرّ برضه ? خليها الفراعين , بس حلوة قوي , و لو قلت حرف زيادة هسخطك ضفدع و ادخل المصباح و مش هتعرف تطلعني تاني

عكاشة : خلاص خلاص اي حاجة المهم اكون مشهور

الجني : طلباتك هتكون عندك في وقت قصير ,
و بعد ما عرفت انت هربان من فين دلوقتي بس اطمنت عليك هتلاقي اي كلام تقوله متقلقش و هتتشهر قريب جدا

عكاشة : بس بسرعة , عايز الحق اعمل شوية شغل

الجني : انا هطلب منك طلب مهم بالنسبالي
متجيبش سيرتي لاي حد علشان لو اتعرف اني ساعدتك هيتسحب مني كارنيه النقابة

عكاشة : و انا مجنون علشان اقول ان في حد ساعدني ? و بعدين ايه ده ? جني و بيتأمر كمان ? اما حاجة غريبة , احنا عندنا في البلد كنا ندعك المصباح يطلعلنا الجني يبوس الايادي لحد ما نرضى عنه

الجني : انت هتستهبل !!! هو في اصلا مصباح واحد حتى عندكم

عكاشة : أومال !!!

الجني : طب ليه لحد دلوقتي محققتش امنيتك من اي جني تاني يا حدق و لا انت غاوي تقرفني و خلاص ?

عكاشة : لا دول مبيفهموش , اطلب حاجة يجيبلي حاجة تانية و يقولي دي احسن , اقوله فين اللي انا طلبته ? , يقولي اللي انت عايزه ده مفيش منه و مينفعش يتجاب , فبراضيه بأي كلمتين حلوين و خلاص

الجني : طب انت طلبت ايه منه مثلا ?

عكاشة : طلبت مرة اني اكون رئيس جمهورية , قالي لا دي متنفعش

الجني : هههههههههههه ايوة طب ما اللي قاعد ده نوديه فين ?

عكاشة : طب ما كان يشاركني معاه كده , و لا هو ياخد المجد لوحده يعني ?

الجني : لا انت بصراحة طلباتك مش معقولة

عكاشة : لا يا عم انتوا اللي ســَكـّـة و اي كلام

الجني : يا صبر ايوب عالعالم المجانين دي انا ايه اللي بيوقعني الوقعات السودة دي بس !



انتهاء المشهد


ملحوظة : يبدو ان اختباء عكاشة في الصحراء لفترة طويلة ادى لاصابته بلسعة شمس و زيادة الاعراض الظاهرة عليه بالرغم من تلقيه لعلاج لفترة طويلة كانت قد قاربت على شفاءه او كما يظن البعض ^_^
_________________________

"عـُـك و لـَيـّـس كـله كويس" ... مقتبسة من صديقتي راندا بسيوني :)

كان المفروض المشهد يتكتب بلهجة عكاشة الاصلية بس الحقيقة فضلت اكتبها عادي علشان لو حد ميعرفهوش هيفكرني بتريق على لهجة ناس معينة فكل واحد يتخيل اللهجة بطريقته ^_^