الدليل !

افتكرت من كام يوم كلمات ارتجلتها عالورق أثناء مذاكرتي لمادة الكيمياء الصيدلية في الأيام اللي قبل الامتحان النهائي سنة 2011 .. و افتكرت لما سيبت المذاكرة يومها و سرحت فـ حاجة كانت شغلاني فكتبت الكلمات دي و كنت قاصدة اكتبها بموسيقى زي القصيدة بس طبعا بما انه ارتجال فمطلعتش قصيدة ولا حاجة ^_^ .. دوّرت عالورقة لحد ما لاقيتها و دلوقتي لما بقراها بضحك على هبلي ههههههههههه .. بس هنشرها برضه من غير ما أغيّر حرف فيها 
:D :D
اهو علشان تضحكوا معايا
:D

***
نظراتك ليا ساعات أوقات.. 
بيكون ليها معنى 
بس انا كان لازم اطنش.. 
و اعمل مش حاسة و مش شايفة
لاني لو حسيت مفروض انا اعمل ايه؟ 
يعني مثلا أجري عليك.. 
و اقولك اني حسيت بيك؟ 
و تقولي ده وهم و مكنش قصدي أعبّر بيه
ده بيتهيألك صدقيني و كدّبي نفسك؟ 
أو حتى تقولي صح برافو عرفتي ازاي
إديني فرصة اقعد اقولِك بالتفصيل
... 
أعمل إيه انا بالنظرات من غير أفعال؟ 
اقول ايه لأهلي و احكيلهم ايه على ده موّال؟ 
مش هيفكروا فيك و لا فيا في جميع الأحوال 
كل اللي هيشغلهم ايه هو اللي اتقال 
و ازاي انا اديتك فرصة.. 
بأي شكل من الأشكال؟! 
و اقول ايه لنفسي لما تيجي تعاتب فيا
و تقولي بعتي قلبك كده على طول.. 
من غير تفكير؟ اهو ده الإهمال
حتى لو صادق كان لازم يكون معاه.. 
أي دلـيــل! 
***

كنت أياميها محتارة و قلقانة و بفكر ما بين واقع ولا خيال؟ 
حلم و لا حقيقة؟ 
بجد و لا تهيؤات؟ 
هيحصل حاجة و لا مش هيحصل؟
و لو حصل هيحصل ازاي؟!
و ازاي يحصل بشكل صح؟
و هل انا بوظت الدنيا الفترة اللي فاتت علشان كده دلوقتي تايهة؟ 
و ان كان ممكن أتفادى الحيرة اللي انا فيها دلوقتي من البداية؟ 
... 
كانت الأيام دي بعد الأيام بتاعة 
"إني أغرق أغرق أغرق"
^__^

و الحمد لله ربنا سترها معايا و ظهر الدليل :-)