فــُقـاعـة حــب !

فــُقـاعـة حــب !
-----------------

الحب فقاعة هتدخلها .. و يا إما تعيش باقي حياتك فيها سعيد و راضي و مبسوط .. يا إما هتعيش تعيس و مكتئب و ناقصك حاجة .. يا إما هتتخنق و مش هتستحمل تكمل و هتطلع منها بعد ما تسيب فيك أثر غير مرغوب فيه .. جرح .. ممكن يغير حياتك للأبد ! و يغيرك انت ذات نفسك .. فمتعرفهاش بعد كده .. لو جيت تتكلم معاها !!!

الحب فقاعة محدش فينا يقدر يتفاداها .. و دخولها فــ حد ذاته مش عيب و لا غلط .. بس الفكرة كلها في انت هتدخلها إزاي ؟ و معاك إيه و سايب إيه ؟ اتخليت عن إيه في سبيلها و اتخليت عنها في سبيل إيه ؟!

الموضوع ببساطة بيتلخص في احتمالين ، الأولاني فيهم إنك هتدخلها انت و حبيبك .. و هتنسوا تاخدوا معاكم أنبوبة الأكسجين .. مصدر الحياة و السعادة جوة الفقاعة .. هتقدروا في البداية تعيشوا بشوية الأكسجين اللي كانوا موجودين من البداية و انتوا بتقفلوا الفقاعة .. بعد شوية وقت هيبدأ مخزونكم من الأكسجين يخلص و هتبدأوا تتخنقوا و مش هتستحملوا و هتطلعوا منها و تسيبوا بعض علشان كل واحد ينقذ نفسه و هتخرجوا عايشين بس بخساير كتير ، يا إما هتعافروا و تكملوا و تعيشوا باقيت حياتكم جواها .. بس ميتين .. من غير أكسجين .. مجرد كتلة أو جماد مالي فراغ الفقاعة ، و هيغلب عليها الظلام و اليأس و الألم و الحزن !

قبل ما ادخل عـ الإحتمال التاني .. لازم تعرفوا إن أول نوع أكسجين و اللي اخترتوا تدخلوا من غيره .. كان رضا ربنا .. و ده كان أكسجين مخزونه مش بيخلص ، بس انتوا أهملتوه و افتكرتوه حاجة اختيارية أو جانبية ، و إن نوع الأكسجين التاني اللي دخلتوا بيه و كنتوا فاكرينه هيغنيكم عن رضا ربنا و بركته .. كان قوة حبكم و السحر و الانجذاب اللي بينكم .. هو آه صحيح عيـّشكوا يومين حلوين في الأول .. بس ده لو مختلطش بالأكسجين بتاع ربنا .. هيخلص .. و بركة ربنا مش هتبقى معاكم و هيروح من حياتكم معاني و نـِـعم كتير كانت هتبقى موجودة مع بركة ربنا .. و يا إما مش هتستحملوا تكملوا .. يا إما هتخافوا تطلعوا برة الفقاعة تاني .. فهتكملوا و تعيشوا حياة كاملة .. بس زي الأموات !

حالات نادرة بس اللي قدروا يرجعوا يفتحوا الفقاعة تاني بعد ما اتقفلت و يدخـّلوا أنبوبة الأكسجين فيها .. بس مفيش حاجة تضمن انكم تبقوا منهم .. و ربنا أكيد كبير و رحيم و غفار و تواب .. بس ليه تاخدوا من الأول مخاطرة إن ربنا يغضب عليكم ؟! و معتقدش إن هيبقى من حقكم تاخدوا نفس كمية البركة و السعادة اللي هياخدها اتنين أخدوا معاهم رضا ربنا من الأول !

إهمال أنبوبة الأكسجين ده ممكن يحصل معاكم في أي لحظة قبل ما تقفلوا الفقاعة .. مش معنى إنكم بدأتوا تبنوها .. إن خلاص كده .. لازم تفضل عينيكم على رضاه لحد ما تدخلوا و تعبروا لبر الأمان .. و بعدها متقلقوش أبدا من سعيكم لرضاه مع بعض .. لإن الفقاعة اللي تتبنى على أساس من التقوى و رضا الله .. هتفضل جواها طعم الطاعة و التقوى و الرضا و الحب .. إلى الأبد !

الإحتمال التاني ، إن الفقاعة تتقفل عليكم و انتوا معاكم نوعين الأكسجين ممتزجين ببعض .. واحد يضمن لكم السعادة الأبدية و استمرارها .. و التاني يضمن ليكم الاستمتاع بالسعادة دي مع بعض !

مــ الآخر .. حياتنا فقاعات .. ممكن تكون فقاعة الحب دي أجمل فقاعة حصلتلك في حياتك .. بس لو أخدت معاك .. أنبوبة الأكسجين ! =)

ديسمبر 2012

اتـجـنــن ! ^_^

و الصورة الحلوة بتتاخد في ثانيتين!

اوعى تغمض عينيك تقف بعيد وحيد ..

حاجات كتير حواليك .. بتناديك!

ما تعيش الدنيا بروح الطفل اللي جواك ..

لو مهما قالوا الضحكة مش مفارقاك

افتح شباكك و نوّر حياتك ! 

=)

الرقــم ( X ) !!!

النهاردة .. قررت اتكلم عن رقم .. يمكن تفكروا ان التفاهة وصلت بيا للكلام عن مجرد رقم ^_^ ..
بس الكلام ده بيحمل جواه معنى أعمق من كده ! =)

الرقم X ده .. موجود في حياتنا كلنا
و بيمثل لكل واحد مننا رقم بذاته .. 1 .. 2 ..5 .. 17 .. 50 .. 1000
أياً كان الرقم .. فكل شخص جوة حياته في رقم مميز جدا
الرقم ده بيحاوطه .. و بيتحرك حواليه و هو مش داري
و هيظهر بقوة قوي و هيبرق في لحظة من اللحظات
و من بعدها .. مش هيختفي تاني
و هو بيحب الرقم ده .. او هيحبه لو مكانش لسه ظهر !

الكلام ده عن تجربة مش أي هلس و خلاص أو بدوّر على أي حدوتة أشغل بيها دماغكم و تقولوا آينشتاين رقم اتنين ظهر و اكتشاف مذهل و الحوارات دي .. لأ خالص ! ^_^

أنا عن تجربة .. و من زمن ليس ببعيد .. ظهر في حياتي رقم ..
كان في لحظة فاصلة من لحظات حياتي ..
بغض النظر عن تفاصيل اللحظة ... او سر حبي للرقم ده ... او الزمن اللي ظهر فيه و اللي ممكن يكون من يوم ولادتي لحد النهاردة _ في ناس بتحب رقم علشان له علاقة بتاريخ ميلادها و متستغربوش _ و بغض النظر ان الرقم ده ممكن يكون بيمثلي حاجة كبيرة قوي .. او مقترن بحلم كبير في حياتي .. أياً كان بقى ... بغض النظر عن كل ده .. انا مش هشغل أفكاركم بتفاصيل حبي للرقم .. لكن مهم أقول تفاصيل ظهور الرقم ده من بعد ما ظهر أول مرة .. علشان تصدقوني :)

في وقت من أسعد الأوقات في حياتي .. ظهر الرقم !
ظهر على شكل تاريخ مكون من  3 أقسام .. اليوم .. الشهر .. السنة !
في أحد هؤلاء الأقسام .. كان الرقم الأكثر سطوعا على الإطلاق .. الرقم X ! =)

بعد ظهوره و لفترة معينة منتبهتش ان هو ده الرقم !
و فضلت فترة لسبب ٍ ما غير متفائلة .. فبالتالي إيماني مكانش قوي بإن الرقم ده .. هو رقمي الخاص .. و كنت صحيح لما بشوفه باخد بالي .. لكن عمري ما ركزت فيه قوي غير بعد فترة معينة .. و تركيزي معاه زاد لما نظرتي للحياة و لحاجات معينة فيها بقى مختلف و اتغير للأفضل .. و بعد ما كنت شخصية متشائمة .. أصبحت أكثر تفاؤلاً بدرجة كبيرة جدا و حصل معايا الفرق الشاسع اللي خلى رؤيتي أوسع و قدرت من بعدها أشوف الرقم بوضوح .. لإن طول ما كانت رؤيتي ضيقة و متشائمة كانت صغيرة قوي على إنها تشوف الرقم ده .. لإنه أكبر من إنه يتشاف بنظرة عادية .. كان لازم تكون واسعة و متفائلة =)
فطول ما انتم نظرتكم للحياة ضيقة و التفاؤل مش واخد حيز كافي منها .. مش هتشوفوا الرقم و مش هتاخدوا بالكم منه و بالتالي ممكن متعرفهوش و مش هتصدقوني .. غير لما تجربوا بنفسكم ! :)

طب هل الموضوع مقتصر على رقم ؟! .. يعني .. احنا طول عمرنا مش بنصدق في يوم الحظ و تميمة الحظ و لون الحظ و رقم الحظ !
فالرقم ده مش هيبقى رقم حظك .. لكن هيكون مقترن بحاجة مهمة في حياتك .. حاجة تعتبر بمثابة حلمك الأكبر .. اللي لو صدقت فيه قوي .. هتحققه .. و لو صدقت فيه قوي .. هيظهر الرقم ده .. اللي من حين لآخر .. هيطمنك ان الحلم ما زال قريب و ما زال جوة دائرة الأمل !
فهمتوا قصدي ؟

طيب .. الرقم ظهر .. و بعد ما نظرتي اختلفت بدأت اشوفه فـ كل حتة .. بيطلعلي فـ أي مكان و فـ أي وقت و بأي شكل .. طبعا لو على شكل جزء من تاريخ زي ما طلع أول مرة .. دي متعتبرش ظهور في حد ذاتها لإن طبيعي بعض الأرقام لازم التواريخ تعدي عليها .. فدي محسبتهاش .. لان كده كده اليوم ده من التاريخ ده جاي لا محالة .. و لإن أنا بنفسي اللي كنت بستناه لحد ما ييجي الدور عليه ^_^ .. لكن اللي ساعد على ظهوره في باقي الأشكال و الأوقات التانية .. هو إني كنت دايما بدوّر عليه باستمرار و دايما على بالي و ده هيفهمه اللي قرأ كتاب "السر" _ "The Secret" ..

أنا كأي صيدلانية بشتغل في صيدلية .. و زي أي بشر بنزل اتفسح .. و زي أي بني آدم بشتري حاجات و بدفع فلوس و باخد الباقي :D :D
و الواقع اللي فات ده بعد ما قلته هيساعدني إني ابدأ أسرد عليكم تفاصيل ظهور ذلك الرقم الرائع في حياتي !

الرقم ده بيظهرلي في الصيدلية يوميا كمية مرات حقيقي معدتهاش بعد ما زادت بشكل ملحوظ ! :)

مرات كتير آجي أحاسب العميل ألاقي الحساب X .. او X و نص مثلا .. او 100 جنيه وX .. يعني رقم وX .. و مرات تانية آجي أشوف الرصيد بتاع الدوا الفلاني عندنا في الصيدلية .. ألاقيه X .. و مرات يدخللي مريض بكارنيه (اشتراك تبع بنك أو شركة و ليهم شروط دفع خاصة) .. و الاقي رقم الكارنيه جزء منه X أو XX يعني الرقم يتكرر و كإنه بيقولي انا هنا .. مش شايفاني ؟  :D :D
المرة بتاعة XX دي خللتني و انا ببص عالكارنيه ابتسمت غصب عني .. و كنت عايزة أكرّم العميل و أديله هدية ^_^ و اوقات كتير تانية لما يظهر الرقم .. ابتسم و انا بقول للعميل مثلا الحساب X :)
و يا سلام لما آجي أبص عالساعة ألاقيها كذا و X .. يعني اللحظة اللي أبص فيها تكون اللحظة الفاصلة وقت وجود X على شاشة الكمبيوتر أو شاشة الموبايل .. و دي بتحصل كتير قوي !
و ساعات تكون الشاشة عليها كذا X .. في الساعة و التاريخ و رصيد أو سعر أحد الأدوية .. ساعتها بيجيلي احساس مشابه لـ : هع هع هع هع ^_^

ده غير ان رقم الآي دي بتاعي في الصيدلية و اللي بيتم تعريفي من خلاله على الجهاز عن طريق بصمة او الكارنيه سابقا _ايوة احنا جامدين قوي و شغالين بنظام البصمة :P :D _ رقم الآي دي ده .. جزء منه X .. و بالاضافة لكده .. انا عملت الباسوورد بتاعي جزء منه X .. 

و كل ما يزيد اقتناعي ان ظهور الرقم بعدد المرات دي مش صدفة .. عدد المرات يزيد .. 
و لانه مينفعش يبقى طول النهار الرقم ده هو القائد .. كان أحيانا علشان يدي فرصة لأرقام تانية .. كان يظهر كجزء من رقم او زايد عليه رقم او حرف ! يعني متغير فيه حاجة .. بس برضه موجود .. بشكل غير مباشر!

و لما بكون رايحة الشغل متأخرة و اوصل 7 و X صباحا .. ببقى فرحانة و لا كإني متأخرة .. و نفس الكلام و انا ماشية من الشغل .. و تقريبا نص اللي شغالين معايا عرفوا ايه هو رقمي الخاص :)

و بعيدا عن الصيدلية 

مرة كنت في كارفور بتفسح .. و كنت اليوم اللي قبلها بكلم أختي عن رقمي الخاص .. و هي مصدقتنيش .. اليوم بتاع كارفور ده ظهر فيه الرقم X حوالي 3 او 4 مرات .. و يوميها اشترينا كام كتاب من ضمنهم كتاب "السر" و ده معناه اني مكنتش لسه قريت منه حاجة او عرفت هو عن ايه .. المهم في احدى المحلات الباقي اللي فاضلي بعد ما حاسبت كان المبلغ X .. و الحاجة التانية ان في كارفور ماركت جمب الكاشير كانوا بيعلنوا عن عرض بطاريات و سعرهم كان X و يوميها مصدقتش نفسي ^_^ .. و موقف الساعة طبعا .. و برضه كان في معرض خيري للاكسسوارات و بعد ما اشتريت كان فاضل من الفلوس اللي معايا المبلغ X فسألني تحبي تاخدي بيه حاجة كمان و ملقتش حاجة عاجباني بس توصلنا لاتفاق في الآخر اني هعمل تبرع بالمبلغ X و آخد ايصال و احتفظت بيه طبعا :)

الرقم كان بيظهر حتى لو على شكل خصم ! مرة وحيدة لاقيت محل كاتب خصم X% رغم انه مش رقم متـقـفــّـل .. و ده كان غريب .. =)
و بيظهرلي عالنت على طول و خصوصا على الفيس بوك .. في هيئة عدد كومنتات او لايكات او نوتيفيكاشنز و كمان على هيئة
 X hours ago , X minutes ago 
اللي هو وقت كتابة بوست او شير او استاتيو

مرة .. ظهرلي في صورة .. حد معرفهوش كان مصورها من كتاب أجنبي .. كانت عبارة عن الرقم X و جمبه كلمة بتلخص الحلم اللي بيقترن بيه الرقم ده !

و ساعات بقى .. كان رقم تاني يظهر معاه .. و الرقم التاني ده نوعا ما مقترن بالرقم X او تاني رقم مهم بعديه على طول :)
و حاسه انه مؤخرا بدأ يزاحمه في الظهور او يمكن لاني بدأت احس اني عايزة رقم شامل أكتر أو متفصل أكتر و أكتر عليا .. فبدأت افكر في الرقم ده كمان معاه .. رغم ان رقم X لوحده كفاية .. بس بفرح برضه لما بشوفهم مع بعض ! ^_^

أقولكم على حاجة كمان غريبة .. ان في تاريخ قديم قوي .. كان خاص بيا و كنت فاكراه هو رقمي المميز .. بس لاقيت اني لما بجمعه على بعضه .. بيطلع الرقم X !!!!!!!!!!

في مواقف تانية مش قادرة استحضرها من كـُـترها ..
بس صدقوني .. لو مكنش بيظهر بالقوة الكافية انها تخليني أكتب البوست ده .. مكنتش كتبته !

فـ من فضلك ... ابحث عن رقمك ! :)

و في النهاية ..
أرجوا منكم عدم التبليغ عني إلى الجهات المختصة بالقبض على أصحاب العقول الضاربة ! ههههههههههههههههههه ^___^

13_2_2013

بُــكرة أحلى ! =)

ربــنــا ! :)

مفيش أجمل من ..
انك تدعي ربنا قوي ..
من قلبك .. و تبكي ..
سواء كان علشان تتوب من حاجة ..
او تقرب منه .. او تطلب رضاه ..
او محتاج مساعدته ..
و لجألتله فـ حاجة مش قادر عليها ..
و من جواك يقين ان هو الوحيد اللي يقدر يساعدك ..
و بعد البكاء الشديد ..
تسند راسك لورا ..
و تروح في النوم .. من فرط الإرهاق و التعب ..
بعد ما بكيت بكل جوارحك ..
و تاخدك السَـكينة و الهدوء ..
و تسلم أمرك كله ليه !

مفيش أجمل من شعور اللجوء لحد كبير قوي ..
أكبر منك و من كل حاجة حواليك ..

مفيش أجمل من انك تحس ان ليك ضهر ..
ليك حد تسند عليه ..
و تلجأله .. و تستنجد بيه ..
و تحس بالأمان بعدها ..
و تستنى الفرج بيقين ..
لانك واثق .. ان هو بس اللي يقدر ..
هو بس اللي عارف انت عايز ايه ..
هو بس ..

مفيش أجمل من انك تحمده و تشكره بعدها
إنه أنعم عليك بنعمة ان ليك رب ..
ليك ضهر ..
و انك مش ملك نفسك ..
و مش فاكر انك ملك نفسك ..
لانك ساعتها مكنتش هتعرف تعمل حاجة
مكنتش هتعرف تتصرف !

الحمد لله بجد ! =)
♥

20_1_2013

أذكار !!!

قال تعالى : " فاذكروني اذكركم " :)

* ذكر الخروج من المنزل :

بسم الله توكلت على الله و لا حول و لا قوة إلا بالله !

اللهم إني أعوذ بك أن أضل أو أ ُضل .. أو أذل أو أ ُذل .. أو أظلم أو أ ُظلم .. أو أجهل أو يـُجهل عليّ !



* ذكر دخول المنزل :

بسم الله ولجنا و بسم الله خرجنا و على ربنا توكلنا !



* ذكر الركوب :

سبحان الذي سخر لنا هذا و ما كنا له مقرنين و إنا إلى ربنا لمنقلبون !



* ذكر السفر :

سبحان الذي سخر لنا هذا و ما كنا له مقرنين و إنا إلى ربنا لمنقلبون ، اللهم إنا نسألك في سفرنا هذا البر والتقوى ومن العمل ما ترضى ، اللهم هون علينا سفرنا هـذا واطوِ عنا بعده ، اللهم أنت الصاحب في السفر والخليفة في الأهل ، اللهم إني أعوذ بك من وعثاء السفر وكآبة المنظر وسوء المنقلب في المال والأهل !

و عند الرجوع .. يردد : 

آيبون ، تآئبون ، عابدون ، لربنا حامدون !

قـلوبا ً !!!

يــا رب ..
ارزق قلوبا ً ...
تفرّقـت من أجلك ♥ ..
أن تلتقي مرة ً أُخرى ..
في رحـابــك !

١٠_١١_٢٠١٢

شعور !

لحظة شعور ..

غامض ..

ملهوش تفسير معين ..

خليط ..

من كل حاجة فـ نفس الوقت ..

كل حاجة و عكسها..

لدرجة توصل بيك

إن أكتر المشاعر تناقضاً

الفرحة و الحزن ..

الإطمئنان و القلق ..

أصبحت متداخلة

و امتزجت و كوّنت

 كيان جديد من المشاعر

بلا اسم محدد و لكن

مليء بالمعاني !

   

مفيش غير حاجة واحدة بس ..

هي اللي ثابتة ..

و واضحة ..

و أكيدة ..

.

.

.

الـثــقـة بالله

!!!

يا رب خير !

:)

7-1-2013

لما تسافـر !!!

قالتله : يعني خلاص ؟! =(

قالها : معلش ، مش هتأخر و الله .. يومين و راجع !!

قالتله : هو كل مرة كده ؟ =(

قالها : مش هتأخر و الله ، حاجة سريعة تبع الشغل .. يومين بس !

قالتله : مفيش مرة تقولي اسبوع و راجع ؟؟؟

قالها : لا و الله !!! ^_^ ... حتى و انتي زعلانة بتغلسي ؟

_ ضحكت و ...

قالتله : أعملك إيه طيب ؟ ما انت اللي مصرّ تسافر !

قالها : غصب عني و الله مش بإيدي .. متزعليش :)

قالتله : طب هاجي معاك المرادي !

قالها : خلاص المرة الجاية بإذن الله

قالتله : لأ ... انت كل مرة تقول كده 

قالها : المرة الجاية آخر كلام بجد

قالتله (بصوت صارم) : نص ساعة و اكون جاهزة !

_ ابتسم و ...

قالها : المرة الجاية :)

_ بصتله بشك و ...

قالتله : انت مخبي عليا ايه ؟ هاه ؟

قالها : هههههههههههههههه .. لا أبداً و الله .. كل الفكرة إن سفرية الشغل بتبقى مرهقة و بقضيها كلها مشاوير .. مش عايزك تتبهدلي ، و حتى لو قعدتي في الفندق هتقضي الوقت لوحدك و هحس إني مطنشك و سايبك لوحدك !!!

قالتله : أديك قلت أهو .. سفرية الشغل مرهقة .. يعني كل مرة هتروح من غيري و تقولي البوقين دول .. يبقى كده مفيش مرة جاية .. هاجي معاك المشاوير .. مليش دعوة !!!!!!!!

قالها : بهدلة جداً .. ده يبقى حرام عليا .. و هي القاهرة أصلا زحمة و حر و مش هتستحملي .. انا المرادي علشان عارف ان في إجراءات كتير ، لكن في مرات هتبقى خفيفة هاخدك معايا فيها

قالتله : هستحمل أي حاجة معاك .. عشان خاطري وافق بقى !!! =(

قالها : طب و ابننا اللي نايم جوة ، يروح فين ؟

قالتله : هوديه لجدته ، هاه ؟ اتفقنا ؟ نص ساعة بالظبط مش هاخد وقت

قالها : يا بنتي انتي هنا ممكن مثلا تخرجي مع صحابك ، تروحي تشوفي والدتك تقعدي معاها تقضي شوية وقت ، تخرجي تجيبي حاجات ناقصاكي

قالتله (بيأس) : أصل انت مش فاهم ! =(

قالها : في ايه بس قوليلي !

قالتله : انا بقلق عليك و انت مش جمبي

قالها : هطمنك بالتليفون :)

قالتله : انت مش متخيل إحساسي بيبقى إيه لما اصحى الصبح و ملقكش جمبي ، يا ترى نايم و لا صاحي ؟ عامل ايه ؟ كويس و لا تعبان ؟! ... و لا لما اقلق بالليل ببقى قايمة ناسية انك مسافر!

قالها : متقلقيش

قالتله : و بخاف يجيلي تليفون في أي وقت يقولولي حصلك حاجة ='(

قالها : و ليه تفترضي الأسوأ ؟؟؟

قالتله : أصل القاهرة دي مرعبة و كلها حوادث و انت رايح جاي في سكة سفر .. و كمان كل المسافة اللي مفرقة ما بينا دي بتخوفني عليك أكتر .. غير لما تبقى هنا .. معايا !

قالها : بوصي .. انا لو مكتوبلي أموت .. هموت و انا على سريري .. ممكن تصحي الصبح تلاقيني جمبك .. بس مش موجود .. تقدري تمنعي عني نصيب مكتوبلي ؟

قالتله (بفزع) : ايه الكلام ده !!! *_*

قالها : هي مش دي حقيقة الدنيا ؟

قالتله : يعني لازم تفكرني و تخوفني أكتر ؟ ده بدل ما تطمني ؟!

قالها : مانا بطمنك و بقولك ان و انا مسافر مش هيحصلي أكتر من اللي ربنا كاتبهولي .. و طالما متوكل على الله .. خلاص ! ، طب مانا كمان ببقى قلقان عليكي و انا سايبك لوحدك بس مش بسيب القلق يسيطر عليا طالما سلمت أمري لله ! :)

_ عينيها دمعت .. مسح دموعها و ..

قالها : متعيطيش علشان خاطري , عايزاني اسافر و انا قلقان عليكي ؟

قالتله : أصل أكتر حاجة بتخوفني ، ان انت تموت و تسيبني لوحدي ، علشان كده كل ما تيجي سيرة الموت بتعكنن و علشان كده دايما بدعي إن انا اللي اموت الأول

قالها : طب و انا ذنبي ايه تموتي و تسيبيني ؟!

قالتله : خلاص أدعي نموت مع بعض فـ نفس الوقت ؟

_ ضحك و ..

قالها : طب و ولادنا يتيتموا مرة واحدة ؟ مش حرام ؟ ^_^

_ ضحكت ..

قالها : أيوة كده اضحكي =) .. و فــُـكيها !

قالتله : انت عارف انك لما تسافر ......

_قاطعها و ..

قالها : بتفرحي .. عارف عارف :D :D

قالتله : ههههههههههههه .. لا بجد .. لما تسافر .. ببقى سايبة اللاب توب عالسرير مكانك مفتوح و عاملاه أونلاين .. علشان أول حاجة اعملها لما اصحى اني ارنلك الأول عالموبايل و بعدين ابعتلك اسأل عليك او اقولك أي حاجة .. و استناك لحد ما تصحى و تقراها و ترد عليا ^_^

قالها : طب عندي فكرة أحلى

قالتله (بشوق) : ايه ؟؟؟؟

قالها : احنا الاتنين نسيبه مفتوح اونلاين و نفتح الصوت و الكاميرا علشان أول ما نصحى نشوف بعض و نـفـطر سوا =)

قالتله : و اللي يصحى الأول يصحي التاني .. بس اوعى تطنشني و تعمل نايم :D :P

قالها : هههههههههه خلاص اتفقنا

قالتله : طب يلا علشان متتأخرش و تستعجل في السفر و اموت انا من القلق :)

قالها : أستودعكِ الله الذي لا تضيع ودائعه

قالتله : أستودع الله دينك و أمانتك و خواتيم عملك !

_ وقفت في البلكونة تسلم عليه .. و بصت للسما .. 

" يا رب .. رجعهولي بالسلامة! "
♥
 __________________________

من وحي خيالي  =)

1_9_2012

افرح ! ^_^

الحكمة من اللحظات الصعبة ..
إن لما تيجي اللحظات الحلوة ..
نحس بيها قوي .. و نفرح قوي .. و نشكر ربنا قوي ..
فلما تزعل .. افرح ..
لإنك فعلا هتفرح .. و لو بعد حين !!! 

=)

عن تجربة !

25_12_2012

------------
ملحوظة ^_^
لمعرفة مصدر الصورة : اضغط هنا
 

يـطـلــع شـبـهــك !!!

قالها : ايه اللي فـ ايدك ده ؟!

قالتله : و لا حاجة !

قالها : لأ انتي كنتي ماسكة حاجة دلوقتي

قالتله : لأ مفيش حاجة فـ ايدي

قالها : اومال كنتي بتبصي على ايه و مركزة ؟! وريني كده ؟

قالتله (و هي بتخبي ايديها وراها) : مفيش حاجة قولتلك !!!

_ بصلها بشك و ...

قالها (بلهجة تهديد) : وريني ايدك !

قالتله : لأ !!!

قالها : يعني أشوفها بالعافية ؟؟؟

قالتله : انت ممكن تعمل كده ؟

قالها : لأ .. علشان انتي هتوريهالي بالذوق ... يلاّ !

قالتله : لأ مش هينفع

قالها : يعني في حاجة ، يلا بقى أرجوكي .. لو سمحتي !

قالتله : مش حاجة مهمة .. عادي

قالها : مش ماشي إلا لما توريني

قالتله (بغلاسة) : لأ !

قالها : خلصي و بطلي غلاسة .. الغلاسة مش كويسة عالحمل

_ رجعت لورا و ايديها ورا ضهرها

_ شمـّر ايده و ...

قالها : كده هتضطر بقى ...

قالتله (بسرعة) : خلاص خلاص .. خــُد .. مرتاح ؟!

_ بص فـ ايديها .. لقى صورته و هو صغير !!!

قالها (بانفعال) : كنت حااااااسس !!! ، انا مش قلتلك متعمليش كده ؟! :(

قالتله : انا حـُرة ، ملكش دعوة .. هو مش ابني زي ما هو ابنك ؟؟

قالها : أصلاً إحنا مش عارفين بنت و لا ولد

قالتله : مش هتفرق .. عايزاه يطلع أو تطلع شبهك

قالها : و انا قلتلك قبل كده لأ ، عايزه يطلع شبهك انتي !

قالتله : مليش دعوة

قالها : احنا مش آخر مرة اتفقنا نسيبها على ربنا ؟

قالتله : ما أكيد الموضوع ده فـ ايد ربنا مش في ايدي و لا فـ ايدك

قالها : ايوة بس متقعديش تستهبلي و تمسكي صورتي تتفرجي عليها علشان يطلع شبههي

قالتله : انا بس بتوحم عليك علشان يطلع شبهك شوية صغيرين

قالها : طب انا هشيل صوري اللي فـ البيت كلها

قالتله : سهلة .. ما انت قدامي على طول ، هتوحم عليك و انت كبير
P:

قالها : يعني أسيبلك البيت و امشي ؟

قالتله : هتخيلك ، صورتك محفورة فـ خيالي

قالها : بتعندي ليه ؟ خلليكي طيبة بقى !

قالتله : نفسي ياخد منك كل حاجة فيك !!!

قالها : طب حتى ياخد عينيكي انتي

قالتله : لأ .. عينيك انت أحلى =)

قالها : انا ؟! .. يا شيخة حرام عليكي

قالتله : و لسه كمان لما يكبر هربيه كويس علشان يطلع فـ أخلاقك كده !

قالها : لو عالتربية فانا واثق انه هيبقى ابن أفتخر بيه باقيت عمري ، علشان انتي واخدة بالك منه :) .. بس لسه مصرّ برضه يطلع شبههك !

قالتله : تــُـؤتــُـؤ !
P:

قالها : بقولك ايه .. متستفزينيش !

قالتله : هفضل أفكر فيك و اتوحم عليك لحد ما يطلع شبهك ، هو كده ^_^

قالها : انتي بتستغلي ان انتي اللي حامل يعني فتقدري تتوحمي باللي انتي عايزاه ؟ هي بقت كده ؟!

قالتله : آآآه ، كده و نص و تلات تربع !

قالها : طب انا بقى هدعي ربنا يطلع شبهك انتي و ان شاء الله ده اللي هيحصل

قالتله : و انا كمان هدعي .. يلا بقى !

قالها : بتحبيني ؟

قالتله : أيوة

قالها : و عايزاني ابقى مبسوط ؟

قالتله : أكيد

قالها : خلاص .. ادعي انه يطلع شبهك انتي

قالتله : أطلب أي حاجة تانية

قالها : لأ .. انا عايز دي

قالتله : مش هينفع

قالها : تبقي مش بتحبيني

قالتله : بموووت فيك =)

قالها : إثبتيلي !!!

قالتله : ماهو علشان كده هيطلع شبهك انت

قالها : حرام عليكي و ليه تظلمي الواد بس ؟

قالتله : هو يطول أصلا ؟ =)

قالها : ده كتير عليا !

قالتله : انت تستاهل أكتر من كده .. نفسي أجيب دستة شبهك و يفضلوا حواليا طول النهار ، هيبقى عندي 13 منك ^_^

قالها : ههههههههههه هيجننوكي ، انتي ناسة إن أبوهم مجنون ؟

قالتله : مفيش أجمل من كده

_ ابتسم و فجأة ...

قالها : استني .. انتي بتاخديني فـ دوكة ؟ ، مش ده الاثبات اللي انا عايزه ، لو بتحبيني اثبتيلي ، هتأكد من حبك يوم ما ألاقيه طلع شبهك

قالتله : محسسني ان انا اللي بقرر !

قالها : عالأقل تدعي و تبطلي تتوحمي عالسحنة بتاعتي !

قالتله : هههههههههههههه

قالها : هاه ؟ اتفقنا ؟

قالتله : لأ .. انا عايزاه يطلع سحنته زيك ، خلاص ؟

قالها : طب انا جاتلي فكرة

قالتله : ايه ؟

قالها : مش احنا متفقين ان كل حاجة بنشارك فيها بعض ؟

قالتله : تمام

قالها : يبقى نشارك بعض في البيبي و ندعي يطلع واخد مننا احنا الاتنين ، و اهو برضه نوحّد الدعوة ! D:

قالتله : خلاص موافقة

قالها : يبقى هندعي بان "يا رب يطلع خليط مننا احنا الاتنين"

قالتله : ياااااا رب

قالها (بهمس) : بس انتي أكتر !!!

قالتله (بزعيق) : قلت ايه دلوقتي ؟؟؟؟؟؟

قالها : مقلتش حاجة

قالتله : لأ انا سمعت كلمة أكتر

قالها : لا بيتهيألك ، متاخديش في بالك

قالتله : لا على فكرة انا مبيتضحكش عليا

قالها : و انا قلت حاجة ؟

قالتله : قلت أكتر .. يبقى ايه ؟

قالها : يا بنتي بيتهيألك

قالتله (بتهديد) : طيب ماااااااشي ، براحتك !

قالها : ده تهديد و لا إيه ؟

قالتله : لأ عادي احنا على اتفاقنا

قالها : يعني أكيد ؟ مفيش حركات خيانة ؟

قالتله : و الله انت و نيتك

_ بصلها بشك و نـُص عين

_ قعدت تضحك

قالها : مش مطمنلك

قالتله : علشان نيتك مش صافية

قالها : طب و العمل ؟ مش هنخلص كده ^_^

قالتله : بقولك ايه ؟ نفسي فـ رُز بلبن !

قالها : انتي تؤمري ، طب صحيح ما تيجي نـُخرج نغير جو و أجيبلك الرز بلبن اللي انتي عايزاه

قالتله : ماشي ، يلا بينا علشان نجهز

_ حط الصورة تحت المخدة و قام

_ بصت للمخدة بنــُص عين .. و ضحكت !!! =) ♥


___________________________

من وحي خيالي =)

١٢_٧_٢٠١٢

شبح النواقص !!!

شبح النواقص !!!
-------------------

الآن و قد قضيت أربعة شهور كاملة من العمل في إحدى الصيدليات ، و احتككت بالمجتمع و تذوقت الحياة العملية ، بالإضافة إلى فترات تدريب كثيرة سابقة ، و بالرغم من أن تلك الفترة الزمنية من الإحتكاك تبدو قصيرة ، إلا أنني لا أطيق صبراً لكي أعبر عن مدى استيائي من أهم الظواهر و أسوأ المشكلات التي تواجهني أثناء عملي و تسبب لي شعور مستمر بالألم و الضيق.

أثناء فترة دراستي كنت أظن _ سذاجةً مني _ أن أكبر المشكلات التي سيتطلب مني حلها أثناء عملي هي كيف أغير صورة المهنة الخاطئة في أعين الناس من بائع إلى دكتور صيدلي و لم أتخيل أنه سيتعين عليّ أن أغير الصورة من تاجر مستغل محتكر إلى دكتور صيدلي; فهناك فرق بين أن تكون بائعاً و أن تكون تاجراً مستغلاً محتكراً للدواء ، نعم .. الآن أصبحت مصيبة و ليست مشكلة .. أن أغير الصورة من بائع و تاجر إلى صيدلي !

كيف أعجز عن توفير الدواء و أنا مصدر المريض الوحيد للحصول عليه ؟ هل يلجأ المريض إذن لشراءه من السوق السوداء ، تحت السلم أو من على الأرصفة ؟

ما أتحدث عنه الآن ليست مجرد مشكلة ، و إنما شبح .. شبح النواقص !

كيف مفترض بي أن أشعر مع كل مريض يدخل منهكاً من فرطِ بحثه و لفـّه و أتى إليّ لاجئاً آملاً أن أوفـّر له الدواء؟ ، و الأسوأ هي تلك النظرة التي تخترقني حاملةً بداخلها كل معاني اليأس و أحياناً تكون محملة بالعتاب و اللوم فأضطر أن أقسم له على كل مصاحف الصيدلية أن : "و الله النقص من الشركة اللي بتصنعه" ، فترتد إليّ نظرة معناها : "اتصرفي .. مش ده شغلك ؟" ، هذا في حال لم ينطق بها !

و شبح النواقص ذلك أشبه بأن تأتي لرجل فقير جائع فتقدم له لقمة عيش ساخنة و تقول له : "عجبتك؟" ، فيرد : "ايوة حلوة قوي ، في تاني؟" ، فتقول له : "لا يا حبيبي متحلمشي بأكتر من كده ، دانا كنت بدوّقهالك بس ، مفيش عيش تاني خلاص".

مع كامل إحترامي لشركات الدواء و أصحاب شركات الدواء و مديرين شركات الدواء و كل من له شأن في إحدى شركات الدواء و لكن ما يحدث و بكثرة الآن هو انعدام للشعور بالمسئولية و يكاد يكون انعدام للشعور أصلا ، و إذا كنت تعرف أن الدواء الذي تنتجه سوف يحدث فيه عجز لسبب أو لآخر .. أو إذا كان غرضك من البداية أن يكون هذا المنتج مجرد "سبوبة" وقتية ترفع بها من شأن شركتك أو تصل لنسبة أرباح معينة أو لأي غرض آخر ، فكان من الأفضل لو لم تنتجه أساساً من البداية ، فعدم وجودك أفضل من غياب بعد حضور و عدم معرفتنا بك كانت ستوفر علينا عناء كبير.

أما إذا كان هذا العجز شيء مفاجئ لم يكن في الحـُسبان ، فلتجد إذن حلا و بسرعة لأن "ده شغلك و واجبك" و إذا لم تجد من الضمير و المسئولية ما يكفي لتحاول جديا فلتعتزل المهنة للأبد و "منشوفش وشك تاني" ، و الإحتمال الأخير أن تفشل كل المحاولات الجدية فسيكون عليك أن تبدأ بحملة من الدعاية لتقدم إعتذار و تخبر الأطباء بالإمتناع الكامل عن صرف هذا الدواء ، بالضبط مثل أي حملة لدواء جديد .. و لتترك الفرصة للبديل طبعا في حال لم تكن أنت المنتج الوحيد !!!

و أخيراً ، هناك بعض الأشياء التي تدعو للتساؤل .. أن يختفي منتج من سوق الدواء رغم أنه ناجح نسبيا ليظهر منتج آخر لشركة أخرى مطابق تماماً للسابق .. شيء مريب ! ، أن يتأخر المنتج لفترة ثم يظهر مرة أخرى بسعر أكبر .. شيء غريب ! ، و أن يصرّ الطبيب على وصف دواء بعينه رغم أن الحصول عليه صعب و له بدائل عديدة .. شيء عجيب ! ، و أن تمتنع الشركة عن انتاج الدواء لأنه لم يحقق لها النجاح المادي المطلوب رغم نجاحه عمليا .. شيء مستفز ! ، و أن تكون الشركة هي المنتج الوحيد للدواء ثم تمتنع عن إنتاجه و لا بديل آخر ... فما الحل ؟!!!

خديجة غتوري

انت و هو واحد !!!

 
قالها : ألو ? السلام عليكم

قالتله : و عليكم السلام و رحمة الله و بركاته

قالها : فينك ? وحشتيني

قالتله : موجودة ، انت اللي مش بتسأل

قالها : ده على أساس إني عارف أكلمك ? دانا مش عارف اوصلك ، كل ما اتصل الاقي الباشا بيرد عليا

قالتله : مش في اختراع اسمه موبايل ?

قالها : لأ مانا مش عايز اعملك مشاكل ، أتصل و انتي جمبه

سكتت مردتش ..

قالها : شكلك واخدة على خاطرك

قالتله : لأ مش زعلانة ، انت بس وحشتني =)

قالها : أخيرا نزل ? ايه هو لزق كده ليه ?

قالتله : كان فـ أجازة

قالها : طب كنتي عرفيني بدل مانا قاعد على نار

قالتله : و كانت أحلى أجازة =)

قالها : مش فاهم ، انتي بتغيظيني ?

قالتله : لأ ، بقولك الحقيقة

ابتسم و كتم ضحكته و …

قالها : يا باااااي جوزك ده لازقة

قالتله : لازقة لما تلهفك ، أهو انت

قالها : أنا لازقة ?! حرام عليكي

قالتله : أول ما ينزل بلاقي التليفون رن على طول ، ما بشكش لحظة انه انت ، كإنك مراقب البيت

قالها : انتي متدايقة من كده ?

قالتله : لا خالص ! بفرح لما بتكلمني ، بس بتعرف إزاي إنه نزل ?

قالها : إيه الأسئلة المحرجة اللي ملهاش إجابة دي ? طب اجاوب أقول ايه دلوقتي ? اسألي سؤال معقول ، سؤال واقعي

قالتله : خلاص مش مهم السؤال ده ، عديه

قالها : بتحبيني ?

قالتله : أيوة طبعاً

قالها : طب سيبك منه و اتجوزيني انا

قالتله : لأ طبعاً ، انت مجنون ? إزاي يعني ?

قالها : طب بتحبيه ?

قالتله : جدااااااااآآآآ

قالها : أكتر مني ?

قالتله : أكتر شوية

قالها : شوية صغيرين ?

قالتله : لأ شوية كتير ، بحبه أكتر منك ، انت عارف اكيد

قالها : طب لما هو كده بتكلميني ليه ?

قالتله : انت اللي بدأت و اتصلت و بحبك برضه ، مقدرش اقول مش بحبك

قالها : طب ليه هو اكتر ?

قالتله : هو انا اعرفك من امتى ? ، من فترة صغيرة ، لكن هو جوزي و ابو ولادي و حبيبي و خلاص مقدرش استغنى عنه

قالها : يعني لو انا بطلت اتصل بيكي ? هتزعلي ?

قالتله : لأ مش هزعل ، هتوحشني بس ، لكن هقدّر ان وراك شغل او معرفتش تكلمني لاي سبب

قالها : و هو لو اتأخر عليكي في الشغل او بات بره ?

قالتله : هيوحشني قوي و هكلمه اطمن عليه كل شوية

قالها : اشمعنى بقى !!!

قالتله : ملكش دعوة

قالها : بتحبيه قوي يعني ?

قالتله : ما قلتلك ايوة ، قوي قوي كمان

قالها (بفرحة) : شكلك بتموتي فيه

قالتله : و مالك فرحان كده ليه ? مش بتغير ?

قالها : لا دي حاجة تسعدني جداً

قالتله : ليه ان شاء الله ?

قالها : علشان هو باين عليه طيب

قالتله : و انت تعرفه منين ?

قالها : طيب و لا مش طيب ?

قالتله : أطيب و أرق شخص عرفته

قالها : مش قلتلك ^_^انا عارف هو ليه طيب معاكي قوي ، علشان بيحبك

قالتله : هو اللي قالك كده ?

قالها : ايوة و قالي كلام كتير عنك بس مش هقولهولك

قالتله : انت مجنون مفيش كلام و تعبت معااااك

قالها : طب بتردي عليا ليه ? ، طنشيني

قالتله : لأ مقدرش بعشق جنونك

قالها : انتي هتحيريني ليه ?

قالتله : ههههههههههههههه ، انت اللي جبته لنفسك ، مش انت اللي بدأت ?!

قالها : ده انتي مجنونة زيي بقى :D

قالتله : لا انا أجن منك ، عارف ليه ? علشان بجاريك في الكلام ، كنت مفروض قفلت السكة فـ وشك من أول مرة بس جناني على جنانك يعملوا كارثة !

قالها : طب لو وقفنا احنا الاتنين قدامك و قلنالك اختاري ?

قالتله : مش هتحصل

قالها : لو حصلت يا ستي

قالتله : مستحيل ، شكلك مذاكرتش فيزيا كويس

قالها : انا هلاقي طريقة ان حد يكون موجود في مكانين في نفس الوقت ^_^

قالتله : هههههههههههه بدأت تطلع بره السيناريو و تخرف

قالها : انا بخرف ? ماشي ماشي ، لكن جوزك هو اللي …..

قالتله : متجيبش سيرته على لسانك ، انا بحذرك اهو ! عيشت الدور قوي انت ، بس لو هوبت نحيته بكلمة هتشوف تصرف تاني مني

قالها : ايه هتقفلي السكة فـ وشي ?

قالتله : ممكن اعملها لو قلت كلمة وحشة عليه

قالها : مشوفتش حد مخلص كده !

قالتله : ايوة طبعا و بطل تريقة

قالها : ما تسيبيه و تتجوزيني بقى !

قالتله : مش هينفع علشان عندنا بنت و ولد

قالها : يعني هو ده السبب انك مش هتسيبيه ?

قالتله : لأ طبعا ، انا مش هسيبه ابدا علشان بحبه ، لكن مش هينفع اسيبه و اتجوزك انت بالذات علشان ولادنا هيقولوا علينا مجانين و يكتشفوا ان ابوهم و امهم لاسعين

قالها : ههههههههههههه ، متخافيش انتي بس ، انا هقنعهم

قالتله : يا مجنووووووووون

قالها : هاه ? موافقة ?

قالتله : يعني عايز تعمل فرح تاني ?

قالها : ايوة

قالتله : ههههههههههه مش بقول مجنون !

قالها : انا هفضل وراكي لحد ما اقنعك تسيبيه و تتجوزيني ، و هكلمك كل يوم و انا رايح الشغل

قالتله : انت كل ده لسه موصلتش ?

قالها : خلاص على وصول اهو

قالتله : طب خللي بالك من نفسك و انت سايق

قالها : حاضر

قالتله : بحبك يا مجنون

قالها : أكتر منه ?

قالتله : هههههههههه لأ =)

قالها : يعني مفيش فايدة ?

قالتله : و انت عايزني احبك اكتر منه ليه ، مانتوا الاتنين واحد

قالها : يعني موافقة تتجوزيني ?

قالتله : ههههههههههههههه

قالها : طب انا طالع الشغل ، بقولك ايه

قالتله : ايه ?

قالها : الساعة ٩ بالظبط الولاد يبقوا فـ سابع نومة علشان هعدي عليكي و آخدك ننزل سوا

قالتله : ماشي اتفقنا

قالها : هتوحشيني لحد ما اشوفك

قالتله : انت وحشتني اصلا خلاص

قالها : سلام يا مجنناني

قالتله : سلام يا حبي =) ♥

___________________________

مـن وحـــي خيــالــي :)

يناير ٢٠١٢