انفجار خواطر !!!

النهاردة ..
السبت ٢٧_١٠_٢٠١٢
قضيت في الصيدلية ١٢ ساعة ^_^

مجاتليش فيهم و لا خاطرة واحدة
غير فكرة عادية جدا ..
و هي إني أخيرا حسيت اني بشتغل
بشتغل و الناس أجازة ..
بشتغل و الناس بتتفسح ..
إحساس رغم انه مفروض يكون صعب أو يزعّل
بس هو كان جديد عليا ..
و حبيته D:

رغم اني افتقدت أهلي اللي راحت عليا فرصة اني أشوفهم
و كل اخواتي راحوا زاروهم النهاردة ..
بس لعله خير !

المهم ..
مش ده السبب اللي بكتب علشانه
لكن بكتب علشان الغريب
اني فضلت ساكتة في الصيدلية
ساكتة داخليا ..
او بمعنى أصح
ساكتة من برة لكن جوايا دوشة داخلية 
جوايا أفكار كتير و كلام كتير و مشاعر كتير ..
بس مكتبتش أي حاجة ..
رغم ان عدا وقت كتير فاضي
لكن رجعت كراستي فاضية وجوايا مليان ..
و انفجر كلام كتير عالورق لما وصلت البيت ^_^
فضلت قاعدة قدام شاشة الكمبيوتر
و ماسكة النوتة و القلم
كل ما تطلعلي صورة
أكتب عليها كلام جديد !
مش احنا في العيد ?
يلا بقى !
D:

كنت بحلم !!!

♥ كنت بحلم بمرة لما أعمل رخصة و اسوق أجيب عربية يا جدو و تركب معايا و آخدك في لفة و تقولي رأيك في سواقتي و آخدك و ننزل نروح نتفسح في أي حتة و اعوضك عن كل الأيام اللي قصرت معاك فيها :) كنت بحلم باليوم اللي هاجيلك فيه طايرة من الفرحة و اقولك اني خلاص لاقيت نصي التاني و انك خلاص هتبقى جدو لحد تاني غيري ولادي :) كنت بحلم بيوم فرحي لما هيبقى اول واحد اتصور معاه انا و عريسي يكون انت :) كنت بحلم في مرة اني متكسفش زي كل مرة و آخدك في حضني و اضمك جامد قوي و أقولك قد ايه بحبك يا جدو :)

كنت بحلم بمرة وانا قاعدة عندك و تقولي خلاص روّحوا علشان متتأخروش أقولك لا يا جدو انت متعرفش اني هبات معاك ? و انك الليلة دي مش هتنام لوحدك ? :)

 كنت بحلم لما يبقى ليا بيت و اعزمك تيجي تقعد عندي و تشوف بيتي و تقضي معايا وقت و اثبتلك اني مكنتش بزهق من القعدة معاك زي ما كنت انت فاكر :)

كنت بحلم اني أطبخ كذا أكلة و اجيبهالك تدوقها و تقولي لا هنا الملح كتير و هنا محتاجة كذا كذا و دي مظبوطة قوي تسلم ايدك :)

كنت بحلم آجي اتغدى معاك كل يوم او عالأقل كذا مرة في الاسبوع علشان متاكلش لوحدك و أحاول أفتح نفسك عالأكل :)
  

 حاجات كتير حلمت بيها و حاجات كتير كان نفسي أقولهالك هتفضل مدفونة جوايا
فضلت أحلم و أأجل من غير ما اعمل حاجة من أحلامي لحد ما انت سيبتني و مشيت :'(
  بس انا مش زعلانة لاني واثقة في رحمة ربنا و ان كل ده لسه في فرصة أعمله معاك لما أقابلك في الجنة باذن الله هيبقى في كل حاجة حلوة ممكن أشاركك فيها أحلى من اللي حلمت بيه كمان مليون مرة بس يا رب ندخلها سوا و تكون دلوقتي فـ روضة من رياض الجنة و بتقولي من عندك لو تعرفي اللي انا فيه مش هتزعلي على فراقي لحظة واحدة :) ربنا يرحمك يا جدو و يسامحني على تقصيري معاك و يديني فرصة في الجنة أقولك قد ايه كنت بحبك :)  ♥

تالت عيد !!!

تالت عيد من غير جدو !!! :(
مش هقول أكتر من كده

ربنا يرحمه ياااا رب :)

♥

سبب مميز !!!

أشياء تحدث في حياتنا ..
تضيف نكهة مميزة إليها ..
و تجعل المستقبل أجمل ..
و أكثر تشويقا ..

قد تكون هذه الأشياء

سببا في لحظات ..

سعادة .. حزن

ضحك .. بكاء

شوق .. إنتظار

تفاؤل .. يأس .. إحباط

عزيمة .. إرادة .. تصميم

إنتماء ..

غموض .. وضوح
مواجهة .. هروب

غضب .. هدوء

بهجة .. إكتئاب

ذهول .. استغراب

خوف .. قلق .. اطمئنان

جنون .. حكمة .. تأمل

مشاعر و لحظات كثيرة مختلفة

و لكنها أنعشت حياتنا و جددتها

بنوع من التغيير ..

عند حدوثها نتعجب !!!

و نظل نبحث عن الحكمة و الأسباب

قد نصل إلى بعضها و قد يتأخر علينا فهمها

قد يجهدنا البحث عن السبب

فيتوه منا أن نعيش تلك اللحظات

و لا نستشعر جمالها و أهميتها ..

في حياتنا

و لكن في النهاية ..

نصل إلى نقطة تخبرنا

أنه لا يهم أن نعرف

لا يهم أن نفهم

لكن المهم فقط

هو أن نعيش و نستجيب

لتلك الأشياء

على أفضل نحو !!!

النحو الذي يرضينا عن أنفسنا

و ترتاح إليه قلوبنا

و تطمئن منه عقولنا !!!

و أخيرا أصبح ذلك اليقين يخبرنا

بأنها حدثت لسبب ما

سبب مميز ..

أراده الله لنا !!!

=)

عــن تـجربـة

"حبك علّمني" !!!

" حبك علّمني "
بقلم : خديجة غتوري
----------------------------

حبك علّمني إزاي اخاف زعلك مني
و اخاف غضبك و اطلب رضاك عني

......................................

أنا كنت بحب كل الناس
و ف بعدهم بحتاس
حبك علّمني برضه أحبهم
لكن من غير ما انسى
أنا جيت ليه في الأساس
......................................

حبك علّمني إزاي أخلّي
دايما في بالي لحظة تخلّي
عن أي حاجة تغضبك
و تبقى عني مش راضي
أو أي حاجة توقــّع
بين البشر عالفاضي
أو أي حاجة تخلي الناس
الحقد في نفسهم
و الغيرة في قلبهم
و الراحة متجيش من عندهم
و كل ده بقى من الماضي
.....................................

حبك علّمني إزاي أكون
انسان تاني من غير ظنون
و اصبر على حكم كان مجنون
و اتأكد قد ايه .. انت فعلا حنون
......................................

حبك علّمني أخاف
أبعد عنك بعد كده تاني
و أخاف أنسى ذكرك
و أروح ورا الأماني
و احلم بدنيا مزيـّـفة
و ابقى على نفسي جاني
يااااااااا رب ....
أنا حاسس بذنبي من دلوقتي
علشان عارف اني هغلط تاني
......................................

حبك علّمني أحفظ لساني
في أي لحظة مجنناني
و امسك غضبي و اقول خلاص
مش هسمع كلام شيطاني تاني
.....................................

حبك علّمني أدوّر حواليا كتير
و احاول أخلي الشر خير
نفسي أكفّر عن ذنبي الكبير
و ان كان صغير بحسه خطير !!
......................................

حبك علّمني أخاف تغضب عليّا
يا رب ده انت كل اللي ليّا
ساعات بنساك و أدوّر حواليّا
على حد يساعدني في حاجة
مش عارف حتى ايه هيّ !!
يا رب إديني من عندك هديّة
فيها الهدى و السكون
و مفهاش قسيّة
و فيها روح و نفس تقيّة
و تكون عالشيطان قويّة !!
.....................................

يا رب يا مقــلّب القلوب
ثـبـّـت قلبي ده ما صدّق يتوب
يا رب ده قلبي يادوب يادوب
قرّب منك و خايف من المكتوب
و خايف من سوء خاتمته
و نفسه يبقى على طول
في العبادة دؤوب
يا رب خلّي قلبي في حبك يدوب
و لما يسمع كلامك يكره كل الذنوب
و يبعد عن كل سوء و شر
و من جديد يرجع يتوب
......................................

يا رب الدنيا علينا قاسية
و الناس رايحة و جاية ناسية
ناسيين نارك و جنتك
فاكرين انهم في مركب راسية
......................................

يا رب انت عاطينا
فــ آخر الليل
فرصة جميلة لينا
بس الأغاني و الأفلام
بتملى ليالينا
بتشغلنا و مش بنسمعك
لما بتنده علينا
و نصحى في النهار نادمانين
و الدموع مليا عنينا
......................................

حبك علّمني دايما أفكّر
إزاي أخلّى الدنيا سكّر
علشان الناس تقدر تعيشها
و رحمتك على طول تقدّر
و في قدرتك يا رحيم تفكّر
......................................

يا رب

كل الكلام ده من قلبي طالع
و عارف ان انت شايف و سامع
يا رب
مش عايز أبقى في طريقي ضايع
و فاكر اني ماشي صح !!!!!

يا رب حبك علّمني !!!


أول قصيدة كتبتها =)

الخميس ٢٤_٧_٢٠٠٩

خيوط التفاؤل !!!

و لا تزال خيوط التفاؤل
تصل إلى قلبي ..
فتقتل كل مشاعر ..
.

.

الإكتئاب ..
و الإحباط ..
و الخوف ..

.

.
بداخله !!!

=)

يـا كـريـم !

يـــا رب

..

ارحمني و اغفرلي

و ضع نهايةً ترضاها

..

لـمـا أنـا فـيـه 

يـا كـريـم !!!

كلمات !!!

أحيانا ..

كلمات بسيطة

تغنيك عن الطعام

تغنيك عن النوم

تغنيك عن الراحة

تغنيك عن كل شيء

فقط كل ما تحتاج

أن تسمع أو تقرأ ..

هذه الكلمات

مراراً و تكراراً

مراراً و تكراراً

مراراً و تكراراً

:)))))))

٦_٩_٢٠١١

خواطر يوم ميلادي !!!

الدنيا دي غريبة جدا
بتفاجئنا مفاجآت غريبة جدا
فـ أوقات غريبة جدا
و بنطلع ردود فعل غريبة جدا
و بنسرح سرحان غريب جدا
و بتجيلنا أفكار غريبة جدا
و بنضحك ضحكة غريبة جدا
أو ممكن ننزل دموع غريبة جدا
و الكلام اللي بقوله ده
عارفة انه غريب جدا
علشان حاسة ان انا
غريبة جدا !!!

=)

.

.

.

من رحمة ربنا علينا
إنه لما بيحطنا في امتحان
بيطوّل فترة الامتحان
و يمكن يطول قوي
لدرجة إنه مش بيخلص
إلا لما ننجح فيه
و ربنا بيدينا فرصة
نغير أسلوبنا في الإجابة
بحيث ننجح في الآخر !!!

=)

.

.

.

إنها تلك اللحظات

عندما يحدث ما كنت في انتظاره مترقبا حدوثه

ثم يكون رد فعلك على عكس ما كنت تنوي تماما

لأنه يحدث في وقت يفوق توقعاتك

بعد طول انتظار ! 

:)

لحظة وداع !!!

 مشيت و على شفايفها ابتسامة
بس كانت ابتسامة مكسورة !!!

٦_٩_٢٠١٢

لست أكثر ذكاءاً !!!

لست أكثر منهم ذكاءاً
عندما تستنكر ما فعلوه
و تشعر أنهم قاموا بأشياءٍ
يستحيل أن تحدثك بها نفسك

الذين يخطئون و يتوبون
و يقعون في ذات الخطأ مراتٍ عديدة
كانوا أناسٍ مثلك

فاعلم أنك أضعف مما تظن
و استعن بالله على نفسك !!!

طيبة بشكل !!! :)

شفت طيبة قلبها بعينيا امبارح
لما كانت زعلانة من واحدة صاحبتها
بس لما شافتها جريت عليها
علشان كانت واحشاها قوي
و نسيت كل الزعل :)

حصاد أول ١٥٠ ساعة شغل !!! =)

امبارح كان اول يوم شغل ليا بشكل رسمي
استلمت الشيفت بتاعي من الساعة ١٠ برضه بشكل رسمي ^_^
بدأت تدريب في الصيدلية يوم الاحد ٢٩_٧ و بدأت الشغل برضه الأحد ٢٦_٨ :)
و بهذه المناسبة السعيدة
أسجل لكم حصاد اول ١٥٠ ساعة شغل ، او بمعنى أصح تدريب !!! D:

أكيد مش هقعد بقى اقرفكم بأسامي أدوية و ميكانيزمات
ده كده هيبقى حصاد ٥ سنين صيدلة مش فاكرة منهم حاجة
هههههههههههههههههههه
 ^_^

بس اثناء الشغل و الاحتكاك بالحياة العملية
بنتعلم دروس عملية و بتقابلنا مواقف طريفة و غريبة و قد تكون مؤلمة أحيانا
و بنتأثر بحاجات بسيطة بتحصل بس بتسيب علامة
أكيد مش هاجي انا اللي لسة طالعة من بيضة الكلية اتكلم عن حاجة لسة بستطعمها و اعلمهالكم
بس بدل مانا متعلم عليا لوحدي ^_^
هكتب العلامات اللي سابت جوايا أثر
يمكن يتعلم عليكم انتم كمان او تحسوا بالاحساس اللي حسيته :)

١_ ايدي خفيفة الحمد لله :
طبعا العنوان يحمل معنيين و انا عارفة ان ناس هتبقى دماغها شماااااال و تقول " اخصصصصصص " بس انا مقصدتش ان ايدي خفيفة اللي انتوا فهمتوها ^__^
انا قصدي ايدي خفيفة في الحقن العضلي الحمد لله
كنت زمان نفسي تبقى ايدي خفيفة و الناس تيجي تاخد الحقنة مخصوص عندي
بس مكنتش بتجيلي الشجاعة اثناء ما كنت بتدرب قبل التخرج اني ادي حقن و كنت بهرب من المواجهة
و اديت مرة واحدة متتحسبش :)
لما اتخرجت بقى و بدأت في الاول ادي كام حقنة كده كنت بعدهم و اقول اديت لحد دلوقتي ٣ و بعدين بقوا ٥ و بعدين ٧ و بعدين مبقتش بعد خالص من كتر ما كنت بدي حقن كتير
لدرجة ان ممكن في اليوم الواحد ادي ٣ او ٤ حقن و محسش بيهم
طبعا هتقولولي ما انتي مش هتحسي هو انتي اللي بتتحقني يا عبيطة ? هههههههههههه لا انا قصدي مبحسش بتوتر نفسي
و اللي شجعني ان الناس كانت بتقولي ايدك خفيفة فبقيت بثق في نفسي اكتر و الحمد لله لحد دلوقتي ايدي خفيفة على حد قول الناس اللي بديهم :)))
الحمد لله نعمة من ربنا
يمكن مش دي وظيفة الصيدلي الاساسية بس ده جزء من خدمة الناس اللي كنت نفسي اعملها بشكل يرضي المجتمع اللي انا بخدمه :)

و يمكن الحقنة بالنسبة للبعض شيء تافه بس بالنسبة للبعض الآخر حاجة بيخافوا منها و انت لما تديهالهم بشكل يقلل خوفهم يبقى أكيد بتعمل فرق :)


٢_ الطفلة :
تكملة للقصة بتاعة الحقن
انا كنت بخاف اواجهها زي ما قلت فكنت بأجل المواجهة دي
من لطف ربنا ان اول مواجهة معاها بعد التخرج ، على قد ما كانت مرعبة ، لكن على قد ما ربنا خلاني اطمنت اني معملتش مصيبة او مأذتش الشخص اللي اديته الحقنة
مرعبة علشان كانت طفلة عندها حوالي ١١ او ١٢ سنة و رفيعة قوي و كانت الدكتورة بتصلي و كنت لازم انا اللي اديهالها
نعم ??? اول حقنة ليا تبقى طفلة ? ايه الرعب ده ? اصعب حاجة ممكن ابدأ بيها
خفت و اللي خوفني اكتر ان البنت فضلت تقولي : " من غير ما توجع ماشي ? " فضلت تكررها و انا اصلا خايفة لوحدي و خلتني قولتلها : "طب ثانية واحدة اشوفلك الدكتورة علشان ايديها خفيفة اكتر مني" (اي كلام علشان اهرب ^_^ ) روحت و رجعت متدبسة فقلتلها : " بصي متخافيش مش هتوجع ان شاء الله بس انتي متتحركيش" و بيني و بين نفسي بقول :" علشان لو اتحركتي ممكن تحصل مصيبة " *_*
المهم اديتها الحقنة و كانت دايخة شوية و هي ماشية فخوفت قوي و قلت ربنا يستر و تعدي الحقنة دي على خير !
من لطف ربنا بقى انها طلعت هتاخد الحقنة دي مرتين كمان و جاتلي تاني يوم و تالت يوم خدتها عندي
كإن ربنا كان عايز يطمني باني اشوف البنت اللي ادتها الحقنة علشان اطمن عليها
ياما انت كريم يااااااااااا رب :))))))


٣_ أكتر سؤال محرج :
اكتر سؤال محرج اتعرضتله الفترة دي كان : " الادوية دي بتاعة ايه يا دكتورة ? " ^_^
طبعا ،،، احم ،،،، هههههههههههههه مش هقول اني ابيض خالص ، بس ادوية كتير قوي قوي معرفش استخدامها و ابص عالمادة الفعالة بره مفتكرش ده بتاع ايه
حقيقي حقيقي سؤال محرج ، مش هقول اكتر من كده !!! D:


٤_ الوقت بيمر بسرعة :
الوقت في الشغل بيمر بسرعة ، ٨ ساعات بيمروا زي الصاروخ
هل ده مؤشر اني بحب الشغل ?
و لا علشان ضغط الشغل عالي و مش بقعد فاضية وقت كتير مبحسش بالوقت ? و ده افضل عندي من الملل بصراحة :)
انا معرفش مدى حبي لشغل الصيدلية لسة مش قادرة احدد لان ممكن اكون حاباها قوي دلوقتي و متحمسة علشان بس لسة مبتدية شغلي و احساس طبعا جميل ميتوصفش

بس انا مبسوطة و متفائلة الحمد لله :)


٥_ حبيت الناس هنا قوي :
في رأيي ان من اهم عوامل الارتياح في الشغل
هو الارتياح النفسي للناس الموجودين و لظروف الشغل اللي بيكون برضه اساسها الناس اللي بتتعامل معاهم اثناء الشغل بشكل متواصل

اول ما بدأت كنت عايزة اشتغل في فرع جمب بيتنا و كنت متدايقة ان التدريب جه في مكان بعيد شوية
دلوقتي بعد ما ارتحت للناس قوي ، كنت خايفة يودوني فرع تاني و ابدأ لسة اتعود بقى على ناس جديدة و افتقد الناس التانية :)))


٦_ قابلت اتنين دكاترة من الكلية و افتكرتهم :
و انا واقفة لاقيت وش مألوف جدا دخل عليا
جيبتلها الدوا و محتجتش اعصر دماغي علشان افتكر انها دكتورة مي بتاعة "البيو كيمستري" اللي ادتني جزء الدهون في سنة تالتة :)
بس اللي خلاني استغربت , انها مفرحتش و لا بان اي رد فعل عليها لما قلتلها: "انتي دكتورة في كلية صيدلة صح ? انا فاكراكي"
قالتلي ايوة من غير ما عضلات وشها تتحرك خالص و مشيت بدون اي رد فعل !!! قلت يا رب خير و متكونش زعلانة اني افتكرتها ^_^

تاني دكتورة كانت لذيذة ، رغم ان ذكرياتي مع مادتها مش لذيذة خالص ^_^
 لما شفتها برضه عرفتها على طول ، لكن مقدرتش بصراحة افتكر اسمها ايه و لا ادتنا مادة ايه
بس مفيش اي احتمال للخطأ في انها دكتورة ادتني في الكلية :)
قلتلها اني فاكراها و عرفت انها دكتورة سيدة اللي ادتنا الاورجانيك (الكيمياء العضوية) و اتكلمت معايا شوية و عذرتني و قالتلي " كفاية انكم تفتكروا الوشوش " قلتلها مستحيل ننساكم لان فضلكم علينا كبير :)

كان احساس حلو اني اقابل الناس اللي علموني في اول ايام ليا في واقع الحياة العملي :)


٧_ اتهزقنا و الحمد لله ^_^ :
كان طبيعي بعد كام يوم حلوين من غير مشاكل في التدريب ان ييجي عليا ثامن يوم بمشكلة او تهزيقتين صغنتتين ^_^
بدون سابق انذار دخل واحد يطلب دوا شفويا كده بيقوله و مطلوب مني كصيدلانية اني اسمع الاسم الغلط و اصلحه و اجيبهوله من عالرف و اديهوله بمجرد ما اسمع الاسم و في خلال دقيقتين عالاقل علشان متهزقش
اللي حصل انه نطق اسم دوا معرفهوش و مش موجود عالكمبيوتر فسألته : "معلش اسمه ايه ?"
قام قايلي الاسم تاني بصوت عالي و هو متنرفز و كان نطق اول مرة غير تاني مرة ^_^
مش دي المشكلة المشكلة انه فضل يبرطم بصوت عالي و يقول : " دوري عالكمبويتر دوري ، انتوا كده هتفضلوا طول عمركم ما هتتقدموا ، محتاجين للكمبيوتر ، بعد تلاتين سنة برضه مش هيتغير حاجة ،،،،، الخ"
وترني فمعرفتش اجيبله الدوا و مشي ، في نفس ذات الوقت كانت واقفة ست مستنياني اخلص و طلبت شاش و بلاستر و بعد ما بدأت احاسبها كان معايا دكتور لسة تاني يوم تدريب و دخل شخص تالت يطلب منه شريط دوا معرفش يجيبه فجه يستعين بيا فقلتله طب كمل لها الطلب بتاعها و انا هشوفه ، لفيت و رايحة اجيبه لاقيت شلال سخن نزل عليا من ضهري : " على فكرة يا دكتور اللي عملتيه دلوقتي غلط ، مينفعش تسيبي كاستومر كان معاكي و تروحي لحد تاني الا لما تخلصي اللي معاكي الاول " ، حاولت افهمها ان الدكتور اللي معايا ده بيعرف يحاسب زيه زيي و ان كل الفكرة اني بحاول اساعد و مطنشتهاش لكن هو هيكمل مكاني ، مفيش فايدة ، واضح ان الشخص اللي جه الاول سخنها علينا رغم انها انكرت ذلك D:


٨_ شوية ادوية :
الحمد لله فتحت التلاجة و عرفت كل ادوية الانسولين اللي عندنا و فرقت بينهم و رتبت التلاجة كمان ، طول عمري كنت بتلخبط فيهم و مش عارفة ايه كل الانسولينات اللي في السوق دي ، بس الحمد لله عرفتهم ، بالاضافة لشوية ادوية تلاجة على شوية مستورد على ... رُبع مشكل :)

بس اللي مخوفني قوي
اني فعلا ناسية كتييييييير كتير قوي
لدرجة ان في معلومات اثناء الدراسة كنا بنقولها لبعض كده بشكل عفوي و شبه طبيعي جدا
دلوقتي مش فاكراها !!!
خايفة قوي ايأس و مكملش في الطريق ده لانه هيبقى طويل و محتاج مجهود جبار و مذاكرة اكتر من اللي ذاكرتها ايام الدراسة
ده لو يعني عايزة ابقى صيدلانية بجد فاهمة و مش مجرد بياعة
ده لو كنت عايزة اغير فعلا مسار مهنة الصيدلة و لو بشكل فردي و شخصي و أمثل فئة الصيادلة في المجتمع بشكل مشرف !!!

و مش بس كده ، ده كمان مطلوب مني اني اكتسب خبرة البيع مش بس ابقى عارفة الجزء العلمي و فاهمة الدوا ، لا ابقى عارفة الادوية المشهورة كل واحد لابس تيشيرت ايه من بره و لون الاقراص و شكلها ايه من جوة و مواااال و لا الف ليلة و ليلة و للأسف ده شيء الناس اللي بتيجي تشتري الدوا هما اللي بيلزمونا بيه بسبب طريقتهم في طلب الدوا
ده كمان ممكن يقلل من ثقته فيك لما يلاقيك مش عارف الدوا اللي هو بيوصفه ، و يبقى المساعد اللي معاك اشطر منك و يثق فيه اكتر منك
بذمتكم هركز على ايه ? اني اراجع المعلومات العلمية اللي خدتها و لا اكتسب خبرة البيع الاول و اكون بياعة و مش صيدلانية ?

ربنا يقدرني
يا رب :)


٩_ أصعب اللحظات و أكثرها حزناً :
أكتر اللحظات اللي بتزعلني و بتدايقني ، لما يدخل واحد يطلب دوا ناقص و الدوا ده ملهوش بديل او الدكتور مصرّ عليه ، و العيان يا عيني بيلف عليه من الصبح ، و الدوا فعلا ناقص و مش هعرف اوفرهوله لو حاولت بكل الطرق
و بزعل قوي لما ياخد علبة واحدة علشان الدوا ناقص و فـ عينيه نظرة لوم ليا ، كإني انا السبب في ان الدوا ده ناقص او مش عايزة اديهوله
بجد حاجة تزعل :(
لو مش قادر تنزل الدوا ده على طول او معندكش امكانية انك تنزله باستمرار ، مكنتش نزلته من اساسه بقى !!!
و لا هو ذل و خلاص ، ننزل الدوا و نرجع ننقصه او نسحبه من السوق ?!!!!!!!


١٠_ و الله و اتعلمنا نكدب ! :
مفيش حد مكدبش في حياته اكيد ، بس أكتر حاجة انا مستاءة منها في شغلي اني بضطر اني اكدب احيانا او استهبل ، لان الدوا اللي هو طلبه ناقص و بيكون مفيش عندي غير كام علبة يتعدوا عالصوابع و غيره كتير بيطلب و في ناس بتدخل عارفة ان الدوا ناقص و عايزة تاخد تلات اربع علب علشان تأمن نفسها
بس واجبي كصيدلانية اني اوفر الدوا ده لغيرها زي ما وفرتهولها فمش مفروض تاخد اكتر من احتياجها الحالي اللي هو علبة واحدة بس
فبضطر اقول ان دي آخر واحدة و الا هتشبط في واحدة او اتنين كمان
بس الناس اللي بحسها هتفهمني و هتبقى واعية بقولهم مقدرش اطلع غير واحدة بس علشان ناقصة !
هي حاجة مدايقاني بس لازم تتعمل
فبقول مفيش غير واحدة بس (في ايدي دلوقتي)
ربنا يغفرلي بقى و يسامحني
:(


١١_ واحدة اتعقدت من صيدلة :
 قالتلي : " انا كنت صيدلانية من ١٢ سنة بس دلوقتي بحاول انساها ، كرهتها " 
 قلتلها : " ليه بس ? " 
 قالتلي : " دي حاجة لازم تكتشفيها بنفسك ! "
ده مش من وحي خيالي ، ده حصل بجد !!!
O_o


١٢_ احساس عام حسيته :
مش في كل الناس ، بس فـ ناس كتير حسيت بالأمل ، حسيت ان في أمل الناس تسمعنا و ترجع تثق فينا تاني ، ناس كتير بتيجي تسأل و تاخد استشارة ، صحيح في ناس بتكون عايزة تاخد الدوا و تجري ، بس في ناس بشوف فـ عينيها نظرة ثقة او استعداد للثقة !!!
يا رب :)


١٣_ أكلت في الصيدلية في آخر ٣ ساعات تدريب ، أكلت كوشري
و كان طعمه لذيذ ، يا سلاااااااااام ! ^_^

ألقاكم بقى بعد كام ساعة شغل مع علامات جديدة باذن الله :)