بالعربي !!!

الحقيقة أنا كان عندي كلام كتير عايزة أدونه بس كان مأخرني عن كتابته حاجة واحدة : ان الكمبيوتر مكنش راضي يكتب عربي

قد ايه كنت حاسة ان لساني مشلول و قدرت قيمة الكتابة بالعربي قوي و قد ايه كانت نعمة عندي و كل احساسي بيها اني مجرد بستخدمها

بس لما فقدتها قدرت قيمتها و قد ايه مقدرش اعيش من غيرها
D:



علشان كده كل اللي هكتبه دلوقتي هما لينكين لحلين للمشكلة دي علشان لما تواجه حد فيكم نفس المشكلة ميتعذبش زيي :)

http://www.yamli.com/editor/ar/

هنا بتكتب انت فرانكو عربي و الموقع يترجمه لعربي


http://www.arabic-keyboard.org/

و هنا بتكتب بالماوس حروف عربي على طول

:)

نظريــات !!!

في الحياة بتقابلنا مواقف , بنستنتج منها نظريات
في نظريات احنا بنطبقها بنفسنا و احيانا بنكون احنا مبتكرينها
في نظريات بتطبــّـق علينا عن طريق طرف تاني و بنعيشها بكل تفاصيلها
و في نظريات بنشوفها من بعيد بتحصل في حد تاني و ملهاش علاقة بينا , بس شوفناها و برضه اتعلمناها و خدنا بالنا منها
و في نظريات كل البشر بيطبقوها و متعارف عليها لانها مشهورة جدا من زمان و ناس قبل كده سبقونا و ابتكروها ,فسواء شفناها او لأ , احنا بنسمع برضه عنها و بنعرفها

في نظريات بتعجبنا علشان تستحق الاعجاب
في نظريات بتحببنا في الحياة بجنونها او هدوءها او جمالها او الابداع اللي فيها او رقــّـتها او او او اي حاجة فيها حلوة
و في نظريات بتكرّهنا في الحياة , نظريات بنـكرهها و مش بنطيق نشوفها قدام عنينا, مش بنطيق نشوف حد بيطبقها
و في اخيرا نظريات مش بنحبها بس للاسف برضه بنطبقها من غير ما نحس و الغريب اننا منرضاش انها تطبق علينا لكن نرضى نطبقها على غيرنا !!!

اللي بتكلم عليه ده مش نظرية جبر و لا حساب مثلثات و لا هندسة
و لا نظرية علمية خدتها في صيدلة او في ثانوية عامة ^_^

دي نظريات ملهاش تعريف معين يجمعها
لانها ممكن تكون نظرية فلسفية , نظرية سياسية , نظرية حياتية , نظرية مجنونة بلا نوع و لا عنوان , نظرية في عالم الانسانية , نظرية عقلية , نظرية منطقية ,نظرية في فن التعامل مع الحياة , معرفش حتى اذا كانت العناوين اللي انا بكتبها دي اصلا مختلفين و لا انا بكتب تعريفات متكررة و تحمل ذات المعنى ^__^
بس كل اللي اعرفه ان اي نظرية ليها معنى و هدف و قيمة بغض النظر عن تصنيفها يندرج تحت انهي نوع من النظريات :)

بقالي فترة كبيرة قوي فكرة النظريات دي مسيطرة على تفكيري لدرجة ان اي موقف كان بيعدي عليا ممكن استنبط منه نظرية مهمة سواء جديدة او لأ , كنت بجري امسك القلم و اكتب اسم النظرية اللي اتعلمتها

و اخيرا قررت اني هدوّنهم كلهم و هعملهم تصنيف لوحدهم على مدونتي حبيبتي باذن الله :)

جــدو !!!

النهاردة أول يوم عـيـد
أول عـيـد جــدو سراج مش هييجي يزورنا فيه الصبح زي كل مرة
:" (

صحيح في العيد الصغير اللي فات احنا اللي روحنا زورناه علشان كان تعبان
بس أنا متعودة عليه كل عـيـد يجيلنا أول يوم يزورنا الصبح
كان أول واحد بـيـعـيــّـد عـلـيـنـا فـي العـيـلـة !!!

حـقـيـقـي وحـشـنـي قـــــوي :" (

يــوم الجـمـعـة
16-9-2011
18 شوال 1432
الساعة 04:45 مساءا
توفي جدو سراج إلى رحمة الله

:' (

اللهم أسكنه فسيح جناتك و اجعل قبره روضة من رياض الجنة
و نوّر قبره برحمتك إلى يوم الدين و كن معه عند السؤال
و ارزقه مرورا كالبرق على الصراط المستقيم
و ارحمه و اغفر له
اغفر له بكل دمعة ذرفها عليه أحباءه
بكل تقصير قصرناه في حقه
اغفر له بكل فعل خير عمله
بكل بسمة تبسمها في وجه أخ ٍ له
ارحمه و ارحم ضعفه و لا تحمـّـله ما لا طاقة له به

اللهم انك عـفـو تحب العـفـو فاعـف عـنه
اللهم انك تحب الرحمة بعبادك فارحمه
اللهم انك كريم تحب الجود و العطاء
فارزقه الجنة مع الصديقين و الشهداء و الصالحين
ارزقه الراحة التي يرجوها كل مؤمن
ارزقه النظر الى وجهك الكريم في الجنة
ارزقه حبك يا عظيم !!!



آمييييييييييييييييين

قـولـوا آمــيــــن : )

مبروك يا لـيـبـيـا !!!

امبارح
يوم 20 أكتوبر 2011
عالساعة 3 و نص كده

كنت قاعدة في أمان الله
لاقيت "المصري اليوم" باعتينلي عالموبايل
بـخبـر مـقـتل القذافي !!!

بصراحة انا مصدقتش و قلت ده اكيد خبر كاذب
ممكن يكونوا لسه مش متأكدين
زي الخبر اللي جالي قبل كده ان "علي عبدالله صالح" قرر يتنازل عن منصبه
و في الاخر طلع بيهزر هههههههههه لا و بيتشرّط كمان
ما علينا المهم
ساعتها مصدقـتـش
و أول تعليق كتبته عالفيس كان

"القذافي مات فعلا ؟؟؟؟؟ و لا هيطلعلنا من تحت الارض يقول : زنجة زنجة ؟؟؟"

و كنت مستنية بشوق و نفسي حد يرد عليا يقولي : "لا هو مات فعلا"
بس الحقيقة محدش رد عليا ^_^ و مأخدتش غير لايك واحدة بس ساعتها
بعدها فتحت التلفزيون لاقيت كل قنوات الأخبار جايبين الخبر
قلت لا بقى ده اكيد صح و بعدها جابوا صورته و هو مقتول

بس بأمانة ^_^ ساعتها جه على بالي تخيل غريب و مضحك قوي
و قلت ممكن يكون القذافي مماتش و لا حاجة و انه عامل حاجة كده زي فيلم
face off
أو فيلم
mission impossible
و ان اللي مات ده واحد تاني لابس وش القذافي و ان القذافي دلوقتي مستخبي تحت قناع لشخص تاني
هههههههههههههههه
هي الفكرة مجنونة بس مش جديدة
و الراجل كده كده ما شاء الله كان مجنون و عايش حياته و مفيش حاجة معملهاش
قلت جات على دي و تفوته ؟
أكيد مفاتهوش يعمل كده
ههههههههههههههه
بس طبعا رجعت بعد شوية سرحان كده لأرض الواقع علشان أشارك الليبيين فرحتهم بالنصر
بجد كنت فرحانة قوي قوي كإن مصر اتحررت تاني
الحــمــد لله !!!!!!
بجد صبروا كتير و اتعذبوا كتير و جاهدوا كتير و استشهد منهم كتيييييير لحد ما وصلوا و ربنا نصرهم
و حسيت قد إيه ربنا مش بيضيع حق حد و مش بيسيب ظالم إلا لما ياخد جزاته
و لو بعد حين !!!!!

شكلهم و هما بيحتفلوا بالأعلام كان جميل قوي و مذهل
كان نفسي أقف في البلكونة أصرخ بصوت عالي و اقولهم إن مصر هنا فرحانة بيهم قوي
و إننا بنحتفل معاهم بقلوبنا
حتى لو منزلناش الشارع
و ان النهاردة يومهم , النهاردة عيدهم , النهاردة أهم لحظة في حياتهم كلها
أهم لحظة في تاريخهم اللي هيحكوه لولادهم


الحـــمـــد لله
مـــبـروك يا لـيـبـيا
:) :) :)

وداعا ً أنيس منصور!!!

توفــّي اليوم
21 أكتوبر 2011
الكــاتــب الكبــيـر
"أنـــيــس مــــنـصـور"


بالرغم من أنني تعلقي بكتاباته لما يصل لدرجة كبيرة
نتيجة لانشغالي بكتابات أخرى في اتجاهات أخرى
و بدراسة جامعية لم أنتهي منها بعد
إلا أنني حزنت كثيرا عندما علمت أنه قد تركنا
و ما تبقى لنا منه هو كتاباته التي ستظل تذكرنا به بقية حياتنا
و ستظل تلهم غيرنا ممن سيأتون بعدنا
كما ألهمتنا الكثير
قد لا تتوافق كتاباته مع عقولنا جميعا
و قد يختلف معه الناس في بعض ما يكتب
و لكن سيظل في أعيننا كاتب و أديب أضاف لتاريخ مصر
ما لا يستهان به من أدب و ثقافة
و قد اتخذت قرارا بأني سأحاول جاهدة ً أن أقرأ كل ما كتبه
و لو بعد حين ان شاء الله
فــ كوني لم أجد الفرصة أن أقرأ كثيرا من كتاباته و هو بيننا
لن يمنعني ذلك من قراءة كل ما كتب بعدما تركنا
حتى أتذكره به

وداعـــا ً أنــيـس مـــــنـصـور
:"(

أنيس منصور
18 أغسطس 1924 _ 21 أكتوبر 2011

ابـتـسـم !!!

صــورة أثـرت فـيـا قوي :)
و التـعـلـيـق اللـي تحتها كان مـعـبـّر بـشكـل كافي

ابتسم دائما مهما كانت الظروف
:)))

دُنــــيا !!! (2)

انك تكون عايش مع حد بتحبه قوي
و مش متخيل انك في يوم من الايام
او لحظة من اللحظات
ممكن تصحى متلاقيهوش جمبك
علشان ربنا رحمه من الدنيا
بس انت مش عارف هتكمل ازاي من بعديه
و مش عارف حاله ايه دلوقتي هناك
و بتدعيله بكل نـَفـَس انت بتـتـنفسه
انه يكون
في روضة من رياض الجنة
و ان ربنا زي ما رحمه في الدنيا
يرحمه في الآخرة كمان
دُنـــيا !!!
***

ان الناس تفضل شــهــور و سنــيـن
متسألش على بعض أو تشوف بعض
و تيجي تـتقابل بــــــس
في المناسبات السعيدة أو الحزينة
دُنــــيا !!!
***

انك متقدّرش قيمة الحاجة الا لما تروح منك
و ترجع تندم على
الشخص اللي انت كنت مقصـّر في حقه
و متقدّرش قيمة انه كان معاك و انت مسألتش عليه كما يجب
الا لما تفقده
دُنــــيا !!!
***

انك ممكن ييجي عليك وقت
كل الناس اللي حواليك تموت
و انت تفضل عايش
و شايفهم بيموتوا واحد ورا لتاني
و انت واقف مكانك
لا عارف تروح معاهم
و لا عارف تعيش من غيرهم
و يوم ما تموت و ترتاح
غيرك هيحس نفس الاحساس مكانك
دُنــــيا !!!
***

نورك !!!

يــــــــــــا رب

لا شــــــيء غـــيـــر نـــــورك أبـتـغـــي !
:)

فـضـفـض لغـيـرك !!!

سبحان الله
الواحد ساعات بيشوف حاجات ملهاش علاقة بيه
بس بيتأثر بيها جدا جدا كإنها حصلتله هو ذات نفسه

دي حاجة مش عارفة أغيرها فيا
و الحل الوحيد علشان أقدر أتعايش مع الواقع اللي بشوفه حواليا
مش بلاقيه غير في الكتابة و الفضفضة
علشان كده بقول
فضفض لغيرك
فضفض و قول أي حاجة حاسس بيها في أي وقت
حتى لو حاجة مش خاصة بيك
بس أثرت فيك !!! :)

مرة قريت خبرين ورا بعض عملولي اكتئاب
اول خبر كانت واحدة لسه جايبة بيبي معداش سنــّه كام شهر و اتخطف منها
:"(
تاني خبر طالبة حقوق بسبب اهمال دكتور "ربنا ينتقم منه" فقدت رجل من رجليها علشان كانت مريضة سكر و هو اهمل حالتها و اتسبب في بتر رجليها
:"(

حقيقي معرفش حد فيهم
بس انا اتألمت قوي
و كل ما اتخيل نفسي مكان الأم اللي ابنها راح منها قبل ما تلحق تفرح بيه
قلبي كان بيتقطـّع
و دعيتلها ابنها يرجعلها رغم انها حاجة صعبة في زمننا ده
بس دعيت من قلبي !!!

يمكن لما أنا اواجه مشكلة ألاقي حد يدعيلي بظهر الغيب زي مانا بدعي للناس لاني مقدرش اتخيل نفسي مكانهم
حقيقي الفضفضة في الاوقات الي زي دي بتريح جامد
الخبرين دول انا قريتهم من مدة طويلة جدا بس لحد دلوقتي منستهمش
يمكن بعد ما كتبتهم دلوقتي هرتاح شوية و انسى !!!

ساعات بتمنى يبقى معنديش احساس علشان متوجعش كل شوية
ساعات بيكون نفسي مخدش بالي من أي حاجة تدايق في الدنيا
سواء تدايقني او تدايق أي حد تاني

المشاعر دي نعمة من ربنا و ف نفس الوقت ساعات بتوجعنا و مع ذلك بنحبها
:)

فوّضت أمري !!!

اللهم إني أسلـمت نفسي إليك
و وجـّهت وجهي إليك
و فوّضت أمري إليك
و ألجات ظهري إليك
رغبة ً و رهبة ً إليك
لا ملجأ و لا منجا منك إلا إليك
آمــــنـت بكـتابــك الـذي أنزلت
و بـنبـيـك الذي أرسلت

و فوّضت أمري كــله إليك
فأجرني و اهدِني
ولا تتركني في الظلام الدامس وحدي
أهتدي بعصا عمياء و أناس ٍ لا يعرفون الغيب و قلب ٍ على ضلال
ربي أنت ملاذي الوحيد
أنت وليي و مولاي
و لا أحــــد لي ســـواك
فلا تذرني في ضلال ٍ أتخبـّط
و اجعل في قلبي نورا يهديني
و هدوءا يشـفـيني
و خشوعا يقـوّيني
و تقـوى تقـرّبني إليك
و ارزقني خيرا يرضيني
و يملأ عـيني و يكـفـيني
عن ســؤال غــيرك !!!

يا الـــــلـــــه !!!

يــومـــا مـــا !!!

يوما ما سيعلم هو أنها بذلت كل ما في وسعها
يوما ما سيعلم هو أنها لو كان هناك بصيص من أمل و لو كان ضئيلا لما تركت ذلك الأمل أبدا
لأنها كانت تريد ذلك الشيء بشكل لا يمكن أن يتخيله بشر

يوما ما سيشكرها لأنها أنهت شيئا لا أمل فيه حتى لا تزداد جروح و آلام كلاهما
يوما ما سيدرك أن الخير لهم في مكان آخر أو في نفس المكان و لكن في توقيت آخر
و لكن ليس الآن !!!
و ربما في مكان آخر حقا !!!

يوما ما سيدرك هو أنها كانت تبدو واقعية لكنها في الحقيقة تعلقت بكل أمل ظهر أمامها
حتى أيقنت أن الواقع ينتصر على أحلامها في النهاية
و أن أحلامها تحطمت على جدار الواقع و صرخ قلبها من الألم فأسكتته و كتمت صرخته
يوما ما سيرتاح كلاهما

يـومــا مـــــا !!!

دُنــــيا !!!

إنك تفضل عشرين سنة مش مزعــّـل حد منك
و تيجي في لحظة من اللحظات
تحس إنك بدأت
تخسر كل اللي حواليك
دُنـــيا !!!
***
إنك تحلم حلم جميل و ييجي حد يبوظه عليك
علشان هو مش شايف الحلم زي ما انت شايفه
و خايف عليك لا يطلع كابوس و انت مش واخد بالك
و انت متأكد من نظرتك و هو متأكد
دُنـــيا !!!
***
إنك تيجي تعمل أكتر حاجة بتحب تعملها
تلاقي نفسك مش قادر
مش قادر تفضفض
واتحبست جوة صندوق أسود و مش شايف قدامك غير
ربنا تفضفضله
هو أحسن حد ممكن يسمعك و يحس بيك
دُنـــيا !!!
***
إن الناس تقولك انت كنت صفحة بيضة
دلوقتي انت صفحة بيضة منقطة بالأسود
و انت تبصلهم و تقول لنفسك
ربـنــا هو اللي بيحكم
دُنـــيا !!!
***
إنك تتمنى ان كل الناس تدخل جواك ثواني و تطلع
علشان متحتاجش تشرح أي حاجة حاسس بيها
و علشان يفهموك من نظرتك
و يحسوا بيك
بس للأسف مش بتحصل
دُنـــيا !!!
***
إنك تلاقي حد متفائل قوي
تتمنى تاخد ربع التفاؤل بتاعه
و تخاف عليه أكتر من نفسك
لإنك خايف عليه لا يتصدم من الواقع الأليم
اللي انت حاسس بيه جاي في الطريق
أو شايفه بعينيك
و بدل ما تشيل همك لوحدك تشيل همك و همه
دُنـــيا !!!

و لسه ياما هنشوووووف من الدنيا
:)

صعب !!!

إحساس صعب لما تكون مش عايز تاكل و لا تشرب
مش عايز تتكلم أو تضحك
أو حتى تبتسم
مش قادر !!!