ساعات بحس إني عايزة اعمل خير كتير
عايزة ألفّ في الشوارع أساعد كل الناس اللي محتاجة
تكون دي مهمتي بس في الحياة!! :))
أدوّر على حد محتاج مساعدة ..
و افضل أخدم غيري و اساعد الناس لحد ما اموت
و عمري ما اشبع من كده .. و لا أزهق.. أكرّس نفسي لخدمة الإنسانية..
آخد منطقة منطقة و الفّ فيها لحد ما أحس اني ساعدت كل اللي لاقيتهم و مبقوش محتاجين لحد تاني.. و اني عملت دوري هنا اللي ربنا عايزه مني.. و اروح مكان جديد و هكذا..
بس فين الامكانيات؟ :((
فين القدرة عالحركة و النزول و الطلوع؟
فين القدرة على اني أعمل الخير من غير ما حد يتدخل في الكم و الكيفية؟
فين الفلوس اللي اقدر بيها أعمل كده؟
حتى لو من غير فلوس .. لو هساعد بمجهودي ..
لو هشترك في جمعية و اروح أصلح سقوف البيوت
أو أنضف شوارع في مناطق نائية
أرسم بسمة على وشوش أطفال مساكين أو يتامى
أضحك لحد مسكين من غير ما أخاف من رد فعل الناس
أتكلم معاه و أحل مشاكله..
اضحك للناس من غير ما يفهموني غلط..
مش لازم حد فقير بس اللي يكون محتاج مساعدة
كل الناس ممكن تبقى محتاجة مساعدة
اللي محتاج كلمة حلوة و اللي محتاج نصيحة و اللي محتاج زقة و اللي محتاج بس ابتسامة.. هتفرق معاه..
أشغل وقتي كله في الخير ..
لو شغلنا وقتنا كله في الخير..
هننشغل عن ذنوب كتير بنقع فيها بسبب الفراغ..
هنفكر بس في مساعدة غيرنا و تعمير الأرض ..
هنفرح مع فرحة الناس .. و نبكي مع ألمهم ..
هننسى آلامنا و هنحس قد إيه حياتنا حلوة لسببين ..
ان حالنا مش كده.. و ان ربنا ألهمنا نساعد غيرنا..
أكيد طالما حالي أحسن من ناس كتير..
يبقى في زكاة مفروض أطلعها عن كل نعمة في حياتي ..
عن صحتي.. عن فلوسي.. عن حالتي النفسية.. عن سعادتي.. عن أهلي.. عن زوجي في المستقبل .. عن أولادي.. عن سرير بنام فيه مطمنة تحت سقف مغطيني و حيطان مدفياني.. عن أكل باكله و اشبع و كمان بنوّع فيه.. عن منظر طبيعي بشوفه و غيري مش بيشوف.. عن كل كلمة اتعلمتها و غيري مش بيعرف يقرأ.. عن و عن و عن ..
.......
بحس اني عاجزة عن اني اعمل كل ده .. يا سلام لو انا و جوزي ميعديش علينا اسبوع من غير ما نكون عملنا حاجة خير :)))
يا سلام لما يبقى الخير هو رقم واحد في حياتنا :))))
يا سلام لما أحلامي و طموحاتي دي تتحقق في المستقبل القريب ^___^
عارفة الدنيا ممكن تاخدنا و ننشغل .. بس لو خلينا فعل الخير حاجة نداوم عليها في حياتنا .. أكيد روتين حياتنا هيتجدد كل يوم :)))
....
ناس كتير بتبقى فاكرة انها لما تتبرع بفلوس لأي جمعية أو لجهة معينة و خلاص هتبقى سعيدة .. مفيش شك هتبقى سعيدة و هتاخد ثوابها كامل .. بس السعادة الحقيقية بتحسها و انت شايف الشخص اللي بتساعده قدامك.. بتساعده بنفسك بصفته أخوك في الإنسانية.. تحسسه إن كلنا بشر و ان كلنا اخوات.. و ان مساعدتي دي مش فضل مني ده رزق ربنا ليك عن طريقي.. انا مجرد حد عمل كده علشان ربنا ألهمني أعمل كده.. ربنا لما رزقني مرتبي الشهر ده كان شايلك فيه المبلغ الفلاني.. ده رزقك من أول ما أخدت المرتب و رزقي آخده ثواب.. قد ايه هتحس بالسعادة و انت بتحب حد في الله بدون سبب و هو بيحبك في الله لانه حس بدفا قلبك و طيبتك اللي ربنا كرمك بيهم و بيزيدك كل ما تعمل خير اكتر..
مش بس كده...
لما تقعد بنفسك مع طفل يتيم تعلمه كلمة أو تنصحه نصيحة طالعة من قلبك هتوصل لقلبه و هيفضل فاكرها طول عمره.. يمكن بكلمة بسيطة تغيره من شخص لشخص.. بس علشان يثق فيك و يسمعك هيبقى محتاج يبقى عارفك و مطمنلك..
لما تقعد مع واحد كفيف تحفظه القرآن أو تعلمه درس..
تعلم شخص القراءة..
تكلم حد في أبسط أمور الدين لانك ببساطة حاسه بعيد عن ربنا و انت ربنا كرمك بفضله.. متسيبهوش كده و طلع زكاة ايمانك.. ماهو حتى الإيمان له زكاة لإنه نعمة مش كده؟!
:)))
.....
حاسة اني بعدت عن عمل الخير و يمكن السبب الأساسي ورا شعوري ده اني بقالي كده شهر بالظبط مش بروح شغلي في التأمين الصحي.. كنت هناك بطلع جزء من الطاقة اللي موجودة جوايا اتجاه الإنسانية !
...
مكنتش أكيد بقدر اقدم كتير بسبب ساعات الزحمة عالشباك أو ضغط الشغل أو إرهاق شخصي.. بس كنت بعمل اللي اقدر عليه.. كان في مكان بعمل فيه حاجة عالأقل.. كفاية بس الناس تلاقي معاملة كويسة في الحكومة و أغلب الناس دي بتبقى تعبت من كتر سوء المعاملة في أماكن كتير أقربهم بيكون الدكتور اللي كتب العلاج قبل ما يوصلولي.. قد إيه كنت بحس بسعادة لما حد يقولي ان الصيدلية أحسن مكان في التأمين بسببي :)))
كانت آه وظيفة حكومية مفهاش طموح مهني.. بس لاقيت فيها طموحي الإنساني :)))))
........
يا رب ارجع بقى.. يا رب :):
13_10_2015
ليست هناك تعليقات:
إرسال تعليق