شوية أفكار !!!

شوية أفكار رايحة و جاية !!!

هو ممكن لو واحد غلط , و مش عارف اللي بيحصله ده عقاب له و لا لأ , يصبر ؟ , يمكن يكون عقاب و الحاجة اللي غلط في حقها ترجعله بعد ما يصبر على عقابه ؟ و بعدها يكمل فيها من غير غلطات ؟ :)
يااااااا رب !!!

------------------------

طب ممكن واحد يكون قدامه طريق يفكر بس مش عارف علشان هو من جواه واخد قراره بس مش عايز يواجه نفسه بيه ؟!!!
فكل ما ييجي يفكر يلاقي نفسه بيرجع لنقطة البداية ؟
او يمكن خايف لحسن قراره ده يتغير ؟!! , و هو مش عايزه يتغير ؟!
أو يمكن علشان حاسس ان هو واخد قراره من غير تفكير ؟ فخايف يطلع غلط لو هو فكر؟
او ممكن كمان يكون مش عايز يواجه نفسه بقراره علشان خايف تطلع الحاجة اللي بيتمناها مش هي و يتصدم ؟
بس لو كده فعلا , فين التوكل على الله ؟!!!
------------------------


ساعات بتكون عايز تقول للشخص اللي قدامك كلام كتير كتييييير جدا جداااااا
بس مش بينفع
علشان الظروف مكنتش مناسبة
او الوقت مكنش مساعدك
او مكنش اصلا وقتها
او اتحرجت تقول
او اجلتها لفرصة تانية و يا عالم هتيجي و لا لأ !!!
هل انت كده غلطان ؟ مش بيقولوا برضه في التأني السلامة ؟!!
:)

------------------------

و هل ممكن نخاف نتأخر على حد لحسن على ما نرجع يكون هو مشي ؟
او بمعنى تاني هل ممكن نخاف نتأخر على حد علشان خايفين يغيـّر رأيه ؟!!!
و لا المفروض اللي بيفكر في حاجة و عايزها فعلا مش هيغير رأيه فيها مهما طال الزمن ؟
و لا اخر احتمال ده مستحيل يحصل ؟!!!

-----------------------

و تساؤل اخير ::: هو ممكن لو حد نــط نــطة زي دي

يقع على دماغه تتكسر ؟ D:

رد القضاء !!!

اتعلمت شيء جديد الفترة اللي فاتت
ان القضاء يمكن رده بالدعاء
مكنتش اعرف حاجة زي دي

اللي عايز يفهمها زي ما فهمتها يدخل عاللينك ده
http://www.youtube.com/watch?v=EnDTg7Hb9RE
--------------

اللهم إني أسألك رد القضاء , إذا لم يكن فيه خيرٌ لنا
و أسألك اللطف فيه , إذا كان يجب أن نتعلم منه شيئا
و أسألك أن تبارك فيه , إذا كان فيه خيرٌ لنا
:)

لآلـئ نــادرة !!!

هل يمكن للآلئ أن تلمع في الظلام ؟ أو أن يبرق الألماس و ينير لك الطريق ؟
نعم !!!
يمكن للآلئ أن تلمع في الظلام الدامس دون أن يسقط أي ضوء عليها !
تلك اللؤلؤة التي قابلتها و أنارت لي طريقي و أزالت عني همّي عندما كنت في أشد أزماتي ... ربما أرسلها الله لي عندما دعوته بشدة و قد كنت في قمة كربي و حزني و دعوت الله أن يفك عني كربي و أزمتي فأرسل لي هذه اللؤلؤة النادرة المضيئة!

أن يتغاضى شخص عن نفسه من أجلك ، و أن يكون بكل هذا التفاهم و التضحية و التوكل على الله بكل صدق ، أن يتخلى عن كل شيء في سبيل سعادتك و أن يكون كل شغله الشاغل هو كيف يقف بجانبك بشكل حيادي تماما و يساعدك في أزمتك بغض النظر عن كل ما يريده و يتمناه ... أن يفعل شيء يستحيل أي شخص عادي أن يفعله ...وأن يتحلى بكل هذه الروح الطيبة النقية ... و أن يذهلك هذا القدر من الإيثار و الصلح مع النفس و الهدوء الداخلي و التوكل على الله ، الذين ينتقلون إليك دون أن تدري !
فتجد هذه عدوى مفيدة و يزور قلبك الهدوء و السكينة :)
فتتخيل ذلك الشخص امامك كلؤلؤة طيبة القلب مضيئة نادرة ثمينة !

و تكون أنت على يقين أن الله لن يخذل هذه اللؤلؤة أبدا في حياتها و لن يطفئ نورها مهما حدث!
انني أدعو الله من كل قلبي أن يرزقها بثواب عظيم لا أعلم كيف أقدّره أو أفترضه لأنني حقا لا أدري كم تستحق من ثواب... فهو صعب الحسبان و مهما كانت القيمة التي سوف أقدرها ستكون أقل مما تستحق تلك اللؤلؤة !!!
أرجو من الله أن يديم نورها دائما و أبدا و أن يهديها سبيلها بذلك النور الذي رزقها فتستفيد منه كما أفادت به غيرها !
أرجو من الله أن يرعاها و ألا تــُخدش أو تــُجرح هذه اللؤلؤة أبدا أبدا و أن يوهبها الله القوة التي تجعلها تقاوم كل من يحاول عبثا عن قصد أو دون قصد ايذائها و أن تكون أقوى لؤلؤة في الوجود ، لأنها تستحق ذلك ، تستحق تلك الحماية من الله عز و جل !!!
و مهما حدث بعد ذلك و سواء كنت سأستطيع الاحتفاظ بها معي دائما أو سوف تذهب لشخص آخر ، سأظل أتذكر فضلها عليّ و لن انسى نورها أبدا أبدا باذن الله
:) :') :)

26-07-2011

يا رب !!!

ضاقت بيا الدنيا يا إلهي و انت الحبيب

و ابتعدت كل الأشياء عني و انت القريب
و تاه عقلي و ذاب قلبي و ضاق صدري

فاكتب لي من حبك نصيب

و اغفرلي و سامحني

لا أدعو سواك فأجبني بعفوك يا مـُجيب

!!!

:'(

آخر سكشن عملي !!!

امبارح قضيت أصعب سكشن فارما في حياتي !

يمكن كل سكاشن الفارما صعبة و بتعتمد على حظك في اختيار الجهاز و الpiece بتاعة الintestine او ال ileum اللي هتقع في ايدك و ضيف على كده كمان مشكلة الحبر و هل الابرة بتاعة الحبر هتكمل كتابة معاك و لا هتخلص منك ؟! و لو خلصت منك هل و انت بتملاها تاني هتقطع الpiece و لا هتقدر تحافظ عليها ؟! و كمان أثناء ما انت بتعلق الpiece هل تقدر تحافظ عليها سليمة و لا هتبهدلها ؟ ^__^

لكن امبارح بالذات كان أصعبهم ,الجهاز بايظ و الحبر مش راضي يكتب و كنت ما صدقت ان القطعة بتاعة الileum اتحركت و في الآخر طلعت هي ضعيفة أصلا ..... غيرنا الجهاز و خدنا جهاز ناس تانية بالقطعة اللي فيه و احتجنا نزود الdose لحد 0.7 مللي علشان نتاكد ان ال0.4 مللي دي كويسة , في الحالات العادية كانت 0.2مللي تكفي , تخيلوا بدأنا ب 0.2 , 0.3 , 0.4 , 0.5 و أخيرا 0.7 مللي علشان نحدد بس هندي كمية قد ايه بعد كده ! و درجة الحرارة اللي كانت كل دقيقتين بتنزل تاني !

بالرغم من كل الصعوبات اللي كانت بتواجهني انا و صديقتي راندا في المعمل اليوم ده , إلا ان أعصابنا كانت هااااااااادية بشكل غريب و مريب و كان الوقت بيمر علينا و احنا لسه مأخدناش قرايات و لسه محددناش الdose الكويسة و لما حددناها مكناش لسه بدأنا في أول Antagonist و زمايلنا في منهم اللي خلص و في اللي بيمتحن شفوي و في اللي زي حالاتنا محتاس !!!

مش عارفة هل السر في الهدوء العجيب ده اننا كان أصابنا برود الأعصاب لاننا بالخبرة عارفين ان الدكاترة هيسيبونا لحد ما نخلص ؟! و لا علشان السبب التاني اللي مكناش نعرفه ساعتها أصلا ؟!

و كمان ده الامتحان العملي الوحيد اللي نطلع منه عارفين هنجيب كام او جبنا كام بالفعل و عرفنا درجتنا بالصدفة الغريبة و لو مكناش عرفناها كانت راندا هتفضل حزينة طول اليوم لاعتقادها اننا جبنا درجة وحشة ! صحيح في امتحانات عملي بنكون متوقعين هنجيب كام , لكن المرادي كنا عارفين و متأكدين !!!

هل علشان السبب التاني ده برضه , ربنا قدّر اننا نطلع من الامتحان ده بالذات فرحانين ؟ و علشان تبقى نهاية سعيدة ؟!!

السبب التاني ده لما عرفته قدرت أجاوب على أكبر تساؤلين كانوا في ذهني اليوم ده!!!

قابلت زميل محترم و قالي ان ده هيكون تقريبا آخر سكشن عملي في صيدلة ! و اننا مش هنشوف معمل الفارما ده تاني ! و ان سنة رابعة مفهاش غير سكشن عملي سيوتيكال متكرر و مفهوش جديد و ان باقي السكاشن شرح !!!!!! نزل الخبر على أذني كالصاعقة , مش قادرة اتخيل صيدلة بلا سكاشن عملي , سنة كاملة من الملل !!!!! ^__^

و أصبحت متأكدة ان انا هستمتع بسكشن السيوتيكال (الممل ده) السنة الجاية قدر الإمكان !!!!!!

يمكن تحسوا اني اووووووڤــر قوي , بس بجد انا بحب العملي ده جدا و سر حبي للكلية دي هي السكاشن !!!

انا بعتذر علشان يمكن كلامي مش هيبقى واضح لغير الصيادلة بس المضمون النهائي بيتهيألي واضح !!!

:)

الأربعاء 1_6_2011

من أجلك !!!

حافظت على قلبي من أجلك , فلم أقل لأحد أحبك , حتى تأتي أنت و تكون أول من يسمعها مني , حتى تكون أول من أقولها له بملئ احساسي و أول من أعطيه قلبي !

حافظت على قلبي من أجلك , فإذا أعجبني شخصٌ و أحسست أنه ربما يكون أنت , لا أتعجل الأمور و لا أقول شيئا و ألتزم الصمت حتى تأتي أنت سواء كنت هو أو لم تكن !

حافظت على قلبي من أجلك , فلم أسمح لنفسي أن تترك أحدا يقول لها أحبك , و إذا حاول أحد أن يقولها , طلبت منه أن يقولها بطريقة صحيحة , فإذا فعل , أعطيت له الفرصة !

من فضلك , كما حافظت على قلبي من أجلك كل هذا الوقت , عندما تأتي و تأخذه مني , حافظ عليه أنت أيضا و لا تجرحه .... أرجوك !!!

فإذا خدشت قلبي عن دون قصدٍ ربما يستطيع الشفاء و لكن إذا جرحته , سينزلق من بين يديك و لن يعود أبدا !

أرجوك !

فبراير 2011

شفتك !!!

شـفـتـك

شفت ضحكتك

نظرة عينيك

نظرة صافية

ضحكة هادية

شفت ملاك قدام عينيا

أول مرة أشوف كده

لكن مقدرش أشوفك تاني

مقدرش أفتح عينيا

علشان

علشان ...... غض البصر !

"آسـفـــيــن يا ريــــّـس " !!!

"آسـفـــيــن يا ريــــّـس " !!!

بقلم : خديجة غتوري

آسفين يا ريّس ...

ع المفاجأة

الشعب كله قام

و فجأة .. الأرض هزّت

و وقعت من عالكرسي

آسفين يا ريّس ...

مش كنت فاكرنا شعب مهيّس؟

متــيــّس ؟!!

ملناش غير في الكورة و السيما

و الكافيهات ...

و الموضة و الخروجات ...

و تقول كويّس

خليني قاعد لحد ما اشبع

و في البنك نوت أكيّس أكيّس!

و ياخدها من بعدي ضنايا

و هو يديها لضناه ..

اللي هيديها لضناه ...

لكن يا خسارة يا ولداه ..

ملحقتش تكمّل ..

و خسرت كله في وقت واحد

حب و قوة و سلطة و جاه

و مهما قعدت تزوّق ..

و ف كلام تجمّل ..

علشان يسيبوك شوية

آسفين يا ريّس ..

محدش قادر يتحمّل

طلع الشعب جريء و صاحي

الشعب فـــــاق !!!

و كل اللي قالوا بنحبك

آسفين ... ده كان نفــاق

و لما وقعت سابوك

و عارفك هتبكي من الفراق

لكن معلش ... نصيب

و لو تعبان ..

و لو زعلان عليه قوي

خد معاك الكرسي

و هنجيب كرسي جديد لمصر !

ماهو بفضلك بقينا

عايشين في عصر

فيه الكرسي جوّه القصر

حواليه عيون ملهاش حصر

عيون حزينة ..

عيون خايفة على مصر

و عيون تانية طمعانة !!!

-------------------------

آسفين يا ريّس ...

ع الخضة

بس الدهب و الفضة

غــِـليوا قوي في السوق

سألنا قالوا أصلنا

بنعمل بيهم معالق

من واسطة

للناس الكبيرة

ياكلوا بيها الحقوق!

-------------------------

آسفين يا ريّس ...

ع الشتايم !

دي مش أخلاقنا

بس انت كنت فاكرنا بهايم

و بنتساق زي الغنم

و احنا اتخنقنا !

و شايف الفقير عاللقمة دايخ

و تطلع تقول ف كلام عالفاضي

الشعب راضي .. الشعب راضي ..

الشعب راضي ..

بذمـّــتك .. مش كنت بايخ ؟

و تقول لنفسك ..

بينك و بينها ...

الشعب نايم !!

و طول ما الفقير لوحده

هيسكت و يكتم في قلبه

و لا حد عارف .. و لا حد حاسس ..

ولا حد فاهـم !!!

-------------------------

آسفين يا ريّس لما قلنا

تمشي انت بالتحديد

انت و نظامك البغيض

يمكن كان أسلوبنا شديد

لكن حقــنا ...

ده انت كنت شايفنا عبيد

و مش بيهمك حالنا ايه

و لا الفقير إزاي هيعيش

و هو مش لاقي الرغيف

و بياكل اللحمة ...

من العيد للعيد !!!

و ف بحر من الشقا غرقان

و يا ريته بحر نضيف

و انت عامل نظرك ضعيف

و مش شايفه من بعيـــد

و مهما قعدت تعيد وتزيد

ف كلام

برضه مفيش جديد !!!

-------------------------

آسفين يا ريّس ...

ع المقاطعة

بس كل يوم المـيـّة قاطعة

جرّبت تشرب مية صفرا ؟

مية مجاري ؟

كنت بايع بلدك و لا شاري ؟!

جرّبت تعيش جمب مصنع أسمدة ؟

جرّبت تتنفس هوا من غير فلاتر ؟

كنت فين يا شاطر من كل ده ؟!

جرّبت تقرا على شمعة ..

و لمبة جاز ؟

جربت تتبهدل علشان ..

أنبوبة البوتاجاز ؟!

-------------------------

آسفين يا ريّس ...

ع الاعتراض

بس احنا بنواجه أمراض

أمراض كتيــر .. وهمية

و قبل ما نعالج الأعراض

كان لازم نشيل راس الفساد !!

-------------------------

آسفين يا ريّس ...

ع الاستعجال !

لكن سياستك ..

كانت كلها استغفال

و مش معقول بعد تلاتين سنة

كدب و تزوير و وعود بور

هنصدق وعودك في ست شهور

يــا عم خلاص ما قلنا غور

و لازم نعملك استـئصال

و لو انت شايف ده استهبال

فمعلش .. من حقنا نثور

و من حقنا الانفعال !!!

-------------------------

آسفين يا ريّس ...

ع الإقالة

انت كنت شايل رسالة

بتقول للشعب لأ

و رجالتي هما الحق

و نسيت معنى العدالة

و ف زمنك ظهرت وظيفة

جديدة ... اسمها البطالة !

و سايب ولاد بلدك

ياكلوا من صناديق الزبالة

و تهتم ليه ! ..

ما احنا ف نظر سيادتك ...

حــثــالة !!!

-------------------------

آسفين يا ريّس ...

ع الشماتة !

بس انت كنت خيال مآتة

ياما استنجدنا بيك

و سبت رجالتك

يتحكّموا فينا بعباطة !

و ماسك في حكمك باستماتة

قلنا ماشي ...

يمكن عايز تخدم زيادة

و تصلــّح ... بس تاتا تاتا

و سيبناك ..........

لقينا كل الأفلام إعادة !

-------------------------

آسفين يا ريّس ...

ع الرحيل

بس انت بجد ملكش مثيل

قلبك كان في البداية طيـّب

لكن بيحركه ألف عميل

لحد ما اتحوّل حجر !

و كان ممكن تثبت حبك

لمصر ...

بمليون دليل و دليل !

شوف لما مشيت ازاي

الدنيا اتغيرت ؟

شوف لما مشيت ازاي

الشباب عيونهم نوّرت ؟

و الحياة و النشاط

عادوا من تاني

بعد ما كان الشعب مات

عرفت دلوقتي ...

مصدر اليأس و الإحباط ؟!

-------------------------

آسفين يا ريّس علشان قولنا

مــــــــــش بنــحــبــك

بس احنا ياما بسببك اتألمنا

لكن مقدرناش نقولها

و الا كنا

اكتر ماحنا متبهدلين ...

اتبهدلنا !!!

و عمرنا ما نافقناك زي رجالتك

و لما لقينا فرصة اتكلمنا !

-------------------------

آسفين يا ريّس علشان نسينا

كل خير عملته لمصـر

ده احنا ياما صرخنا و بكينا

و لا حد سمع بكانا

و لا حد طبطب علينا

و انت شايف اللي بيجرا فينا

و تقول شوية و الحياة هتاخدهم

و كنت فاكر مرور الوقت هينسينا

و ان 6 أكتوبر و انتصاراتك

باقية لينا ..

و هتخلينا نسكت و نقول

ده فضله كبير علينا !

و كل سنة

بشوية احتفالات بتخدعونا

علشان نعيش في وهم النصر

و ندوّر على سعادتنا في الماضي

و ف الآخر ... كله فشـنـك

و ع الفاضي !

و انتصرنا على اسرائيل

لكن من جوّة مـُـحتـَـلين

و مطحونين و مقهورين

و حتى برّة متهانين

و ملناش ضهر !

و الصمت هو لغـتـنا

و الخوف هو حياتنا

و اسمنا في البطاقة مصريين

و كإن كل حقوقنا خدناها

كــامـــلة

في تلاتة و سبعين !

-------------------------

و قبل ما تقول افتكروا

أنــا عملت ايه لمصر

شوف النسبة كام

بين نجاحك و الفشل

بين جهد و عمل ...

و بين نظام مليان خلل

غرقان خلل !!!

هتلاقيها متساويش نسبة نجاح

و كان مصيرها أكيد رسوب

و ركــود ...

و اختفاء نور الصباح ...

عن عيوننا

و كانت اكيد هتجيب

ريــــاح عاصفة

من الشمال للجنوب

و انتهت شمسك ..

و جه وقت الغروب !!!

-------------------------

آسفين يا ريّس ع الرحيل

بس انـت تــوب ...

ف الوقت الباقي من عمرك

و استغفر ربك م الذنوب

و ع التقصير ف حق وطنك

هو عارف صدق القلوب

و عارف مصيرك فين

هو علاّم الغـيــوب !!!

-------------------------

تاريخ الانتهاء من كتابته :

28-2-2011